ۇلتتىق بانك جالعان اقشا مەن شىن اقشانى اجىراتۋدىڭ جولدارىن ءتۇسىندىردى, دەپ حابارلايدى Egemen.kz.
بانك ماماندارىنىڭ ايتۋىنشا, قولدان اقشا جاساۋشىلار نەگىزىنەن ۆيزۋالدى قورعانىش ەلەمەنتتەرىن يميتاتسيالايدى. ياعني, قولدان جاساۋ مۇمكىن ەمەس قورعانىش ەلەمەنتتەرىنە ۇقساس بەينەلەر جاسايدى.
ء«بىر قاراعاندا, ولار شىن اقشا سياقتى بولۋى مۇمكىن, بىراق بانكنوتتى مۇقيات زەردەلەپ كورگەن كەزدە قولدان جاسالعانىن انىقتاي الاسىز. تۇپنۇسقا بانكنوتتار ايقىن بەينەلەرىمەن ەرەكشەلەنەدى, اڭىزداعى سامۇرىق قۇسى تۇرىندەگى سۋ بەلگىسى, نومينالى, سونداي-اق جارىق تۇسىرگەن كەزدە انىق كورىنەتىن قورعانىش ءجىبى بار», دەپ جازىلعان تۇسىندىرمەدە.
شىن بانكنوتتى جالعان اقشادان اجىراتۋ ءۇشىن تۇپنۇسقاداعى بىرنەشە بەلگىنى ءبىلۋ جەتكىلىكتى. ەلىمىزدەگى جالعان بانكنوتتاردىڭ نەگىزگى بولىگى تۇپنۇسقانىڭ كەيبىر بەلگىلەرىن عانا يميتاتسيالايتىن جەڭىلدەتىلگەن تەحنولوگيامەن شىعارىلادى ەكەن. قولدان جاسالعان مۇنداي بانكنوتتى ارنايى جابدىقتىڭ كومەگىنسىز-اق «سەزىن – قارا – اۋدارىپ كور» ءادىسىن قولدانۋ ارقىلى انىقتاۋعا بولادى.
ياعني ەڭ اۋەلى بانكنوتتى ۇستاپ سەزىنۋ قاجەت.
«بانكنوت قاعازى ەرەكشە شىتىرلايدى. بارلىق بانكنوتتا بەدەر بەرەتىن ارنايى ءمور باسىلعان. ەگەر «قازاقستان ۇلتتىق بانكى» دەگەن اتاۋدى نەمەسە قازاقستان كارتاسىنداعى ارحيتەكتۋرالىق بەينەلەردى ساۋساقپەن ۇستاپ كورسە, بەدەردى سەزۋگە بولادى», دەپ جازادى ۇلتتىق بانك ماماندارى.
سونىمەن قاتار بارلىق بانكنوتتا كوزى ناشار كورەتىن ادامدارعا ارنالعان بەلگىلەر بار, ولار بانكنوتتىڭ تومەنگى بولىگىندە ورنالاسقان. بۇلار – ۇستاپ كورگەندە جاقسى اجىراتۋعا بولاتىن جوعارى بەدەرلى ەلەمەنتتەر.
ەكىنشىدەن, بانكنوتتى مۇقيات قاراۋ كەرەك.
«باستاپقىدا اقشا بەلگىسىنىڭ تازا, ايقىن, كونتراستى نەمەسە لاس بولۋىن, داقتارىنىڭ بولۋىن جالپى كوزبەن كورىپ زەردەلەۋ قاجەت. بانكنوتتى جارىققا قاراتىپ, اڭىزداعى سامۇرىق قۇسى تۇرىندەگى سۋ بەلگىسىن جانە نومينالدىڭ ساندىق بەينەسىن كورۋگە بولادى. ءدال وسى سياقتى, جازۋلارى بار نۇكتەلىك سىزىقتار تۇرىندە قاعاز بەتىندە پايدا بولاتىن ماگنيتتى (مەتالداندىرىلعان) ۇزىك ءجىپتى تەكسەرۋ قاجەت. ول ءبىرتۇتاس بولۋى كەرەك», دەلىنگەن تۇسىندىرمەدە.
اقشانىڭ جالعان ەمەس ەكەنىن انىقتاۋدىڭ ءۇشىنشى جولى - بانكنوتتى اۋدارىپ قاراۋ.
1000 تەڭگەدەن 20 000 تەڭگەگە دەيىنگى بانكنوتتاردا كولبەۋ بۇرىشىنا قاراي ءتۇسىن جاسىلدان التىن تۇسكە دەيىن وزگەرتەتىن ەرەكشە ەلەمەنت بار. بانكنوتتى ءار ءتۇرلى بۇرىشتارعا باياۋ بۇرعان كەزدە ەلەمەنت بويىمەن ءتۇستى جولاقتىڭ قوزعالىسىن كورۋگە بولادى.
سونداي-اق 2000 جانە 5000 تەڭگەلىك بانكنوتتاردىڭ سىرت جاعىندا گولوگرافيالىق جولاق بار. گولوگرامماداعى سۋرەتتەر جارقىرايدى جانە ديناميكالىق اسەرى بار.