ەلىمىزدەگى جوعارى وقۋ ورىندارىنا جاڭا باعدارلامالار ەنگىزىلدى

جاڭا ءبىلىم بەرۋ باعدارلامالارىنا جوعارى وقۋ ورىندارىندا بۇرىن-سوڭدى كادرلار دايارلاۋ جۇزەگە اسىرىلماعاندارى, ال يننوۆاتسيالىق باعدارلامالارعا ۋنيۆەرسيتەتتە العاش رەت ەنگىزىلىپ وتىرعان جانە باسقا جوو-دا جوق ءبىلىم بەرۋ باعدارلامالارى جاتادى.

جاڭا ءبىلىم بەرۋ باعدارلامالارىنىڭ باسىم بولىگى «پەداگوگيكالىق عىلىمدار» (20%), «بيزنەس, باسقارۋ جانە قۇقىق» (18%), «ينجەنەرلىك, وڭدەۋ جانە قۇرىلىس سالالارى» (16%) باعىتتارى بويىنشا اشىلدى. مۇنداي ءۇردىس پەداگوگتەردىڭ مارتەبەسىن ارتتىرۋمەن, سونىمەن بىرگە ەل ەكونوميكاسىنداعى وڭدەۋشى جانە قۇرىلىس سالالارىن دامىتۋعا دەگەن سۇرانىسپەن بايلانىستى.

«بعم-گە ۆەدومستۆولىق باعىنىشتى ۇلتتىق جانە مەملەكەتتىك جوعارى وقۋ ورىندارىنىڭ بارلىق جاڭا جانە يننوۆاتسيالىق باعدارلاماسى جوعارى جانە جوعارى وقۋ ورنىنان كەيىنگى ءبىلىم بەرۋ باعدارلامالارىنىڭ تىزىلىمىنە ەنگىزىلگەن. بۇل ولاردىڭ جوعارى وقۋ ورىندارىنىڭ ءبىلىم بەرۋ قىزمەتىنە قويىلاتىن بىلىكتىلىك تالاپتارىنا سايكەستىگىن راستايدى. قازىر ءبىز ءبىلىم بەرۋ ساپاسىنا دەگەن سۇرانىستى كۇشەيتىپ جاتىرمىز. ەنگىزىلىپ جاتقان باعدارلامالار جۇمىس بەرۋشىلەرمەن بىرلەسىپ, ولاردىڭ ماماندارعا قوياتىن تالاپتارى مەن سۇرانىستارىن ەسكەرە وتىرىپ ازىرلەنگەن», دەپ اتاپ ءوتتى قر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ.

ماسەلەن, قاراعاندى تەحنيكالىق ۋنيۆەرسيتەتىندە 2019 جىلدان باستاپ 7 جاڭا ءبىلىم بەرۋ باعدارلاماسى بويىنشا ماماندار دايارلاۋ جۇرگىزىلىپ كەلەدى. بۇل «ماشينا جاساۋ سالاسىنداعى تسيفرلىق تەحنولوگيالار», «باسقارۋدىڭ كىرىكتىرىلگەن تسيفرلىق جۇيەلەرى», «تاۋ-كەن كاسىپورىندارى مەن جەراستى قۇرىلىستارىن سالۋ», «تسيفرلىق اەروفوتوتۇسىرىلىم», «تاماق بيويندۋسترياسى», «IT-مەديتسينا» جانە «جەردى قاشىقتىقتان الدىن الا تەكسەرۋ».

ۇلتتىق جانە مەملەكەتتىك جوعارى وقۋ ورىندارى سونداي-اق «كيبەرپەداگوگيكا», «تسيفرلىق اناليتيكالىق ءبىلىم بەرۋ جۇيەلەرىن جوبالاۋ», «جاساندى ينتەللەكت تەحنولوگيالارى», «ۇشاتىن اپپاراتتاردىڭ ۇشۋ ديناميكاسى جانە قوزعالىسىن باسقارۋ», «مەديتسينالىق ينجينيرينگ» جانە باسقا دا يننوۆاتسيالىق ءبىلىم بەرۋ باعدارلامالارى بويىنشا ماماندار دايارلايدى.

تورايعىروۆ ۋنيۆەرسيتەتىندە (بۇرىنعى «س.تورايعىروۆ اتىنداعى پاۆلودار مەملەكەتتىك ۋنيۆەرسيتەتى») Computer Science يننوۆاتسيالىق جاڭا فاكۋلتەتى قۇرىلدى. ۋنيۆەرسيتەت ستۋدەنتتەرى كيبەرقاۋىپسىزدىك, باعدارلامالىق ينجەنەريا, ۆەب-ازىرلەۋ, DevOps-ينجەنەريا, گرافيكا جاساۋدى ۇيرەنەدى. ولارعا IT سالاسىنىڭ تاجىريبەلى ماماندارى ساباق بەرەدى.

سونداي-اق وتكەن ەكى جىلدىڭ ىشىندە جوعارى وقۋ ورىندارىندا «تسيفرلىق پەداگوگيكا», «STEM-ءبىلىم بەرۋ», «اقپاراتتىق قاۋىپسىزدىك», «ادام رەسۋرستارىن باسقارۋ» جانە باسقا دا ءبىلىم بەرۋ باعدارلامالارى جاڭارتىلدى.

جوعارى وقۋ ورىندارى باسقا دا ءبىلىم بەرۋ باعدارلامالارىن ودان ءارى جەتىلدىرۋ ءارى وزەكتەندىرۋ بويىنشا جۇمىس جۇرگىزەدى. بۇگىندە قولدانىستاعى باعدارلامالاردىڭ 40%-دان استامى جاڭارتىلدى. باعدارلامالارعا جاڭا پاندەر مەن تاجىريبەگە باعىتتالعان كۋرستار ەنگىزىلگەن.

ءبىلىم مەن عىلىمدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسى اياسىندا جاڭا ءبىلىم بەرۋ باعدارلامالارىن ەنگىزۋ جالعاساتىن بولادى.