جامبىلدىق پوليتسەيلەر التى ايدا ءۇش ءجۇز كەلىدەن استام ەسىرتكى زاتتارىن تاركىلەدى, دەپ حابارلايدى Egemen.kz.
بيىلعى جىلدىڭ ءبىرىنشى جارتى جىلدىعىنىڭ قورىتىندىسى بويىنشا جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى زاڭسىز اينالىمنان 324 كەلى ءتۇرلى ەسىرتكى زاتىن تاركىلەدى.
ونىڭ ىشىندە 244 كەلى ماريحۋانا, 78 كەلى گاشيش, 796 گرامم گەروين جانە 17 گرامم سينتەتيكالىق ەسىرتكى قۇرالدارى بار.
«التى ايدىڭ ىشىندە جامبىل وبلىسىندا 324 ەسىرتكى قىلمىسى انىقتالدى, ونىڭ ىشىندە 61 ەسىرتكىنى وتكىزۋ, 32 اسا ءىرى كولەمدە ساقتاۋ, 12 ەسىرتكى قۇرالدارىن كونتراباندالاۋ جاعدايى, 10 قۇرامىندا ەسىرتكى بار وسىمدىكتەردى ءوسىرۋ, 1 ەسىرتكى, پسيحوتروپتىق نەمەسە ۋلى زاتتارمەن جۇمىس ىستەۋ قاعيدالارىن بۇزۋ جانە 209 قىلمىستىق تەرىس قىلىق دەرەگى», دەپ ءتۇسىندىردى جامبىل وبلىسى پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى اسقار جۇمابەكوۆ.