تامىلجىعان تابيعاتتى ساف كۇيىندە ساقتاۋدىڭ ماڭىزى وتە زور. تاياۋدا «كيەلى تابيعات» اكتسياسى اياسىندا وبلىستىق تۋريزم باسقارماسى مەن وبلىستىق جاستار رەسۋرستىق ورتالىعى بىلەك بىرىكتىرىپ كۋرورتتى ايماقتا ەكو-سەنبىلىك وتكىزدى.
جادىراعان جاز ايلارىندا بۇل وڭىرگە ات ءىزىن سالاتىن, ماڭگى جاسىل قاراعايى مەن قولدىڭ سالاسىنداي اق قايىڭى قاۋلاپ وسكەن ورماندى القابىن ەمىن-ەركىن ارالاپ, ساف اۋاسىن كوكىرەك كەرە قۇمارتا جۇتاتىن كەلىمدى-كەتىمدى كىسى از ەمەس. تۋريستەر دۇمەپ كەلگەن سوڭ ادەيى جاساماسا دا, ىشكى مادەنيەتتىڭ ولقىلىعىنان تابيعاتتىڭ اي جۇزىنە كىرەۋكە ءتۇسىپ جاتاتىنى دا بار. اكتسيانىڭ باستى ماقساتى – جاس تولقىندى تاربيەلەۋ. ەكولوگيالىق مادەنيەتتىڭ داعدىعا اينالۋىنا كۇش سالۋ. سايىپ كەلگەندە تابيعاتتى كۇتىپ, وعان جاناشىرلىقپەن قاراپ, قاشاندا قامقور بولۋدى جەتەلەرىنە جەتكىزىپ, سۇيەكتەرىنە ءسىڭىرۋ.
ىزگى نيەتپەن ادىپتەلگەن اكتسياعا وبلىس ورتالىعى مەن بۋراباي اۋدانىنىڭ ەرىكتىلەرى قاتىستى. ءسوز اراسىندا جاستاردىڭ بويىندا تۋعان ولكەمىزدى كۇتىپ ۇستايىقشى, تابيعاتقا ادامدار زالال كەلتىرمەسىنشى دەيتىن نيەتتىڭ بار ەكەندىگىن رازىلىقپەن ايتا كەتكەنىمىز ورىندى بولماق. قاتىسۋشىلار ەكى توپقا ءبولىنىپ, تازالايتىن اۋماقتارىنىڭ كەڭ بولۋىن قامتاماسىز ەتتى. ناتيجەسىندە, جۇزدەن استام قاپقا قوقىس جينالدى. وسىدان-اق كەيبىرەۋلەردىڭ تابيعاتتى ايالاي بەرمەيتىندىگىن اڭعارۋعا بولادى. ەرىكتىلەر توبى قوقىس جيناۋمەن قاتار, دەمالۋشىلار اراسىندا تۇسىنىك جۇمىستارىن دا جۇرگىزدى.
– بۇل شارانىڭ وزگەلەرگە ۇلگى بولاتىندىعى ءسوزسىز. الداعى ۋاقىتتا تابيعات جاناشىرلارىنىڭ قاتارى بۇگىنگىدەن دە كوبەيسە ەكەن, – دەيدى وب- لىستىق ەرىكتىلەردى قولداۋ ورتالىعى فرونت كەڭسەسىنىڭ ۇيلەستىرۋشىسى ءاسيا قاناشەۆا.
ءبىر مەزەتتىك ءىس-شارا بارىسىندا اۋقىمدى ءىس تىندىرىلعاندىعىن ايتا كەتكەن ءجون. ەڭ باستىسى, جاس تولقىن تۋعان ولكەنىڭ تابيعاتىنا جاناشىر. جاقسى ءىس جالعاسىن تاۋىپ, ساتىمەن ساباقتالىپ جاتسا, ويعا العان شارۋانىڭ وڭىنان ورالعانى ەمەس پە؟!
اقمولا وبلىسى