الماتىدا ۇشەم دۇنيەگە كەلدى

سابيلەر ۋاقىتىنان ەرتە تۋعان. ءار بالانىڭ سالماعى ءبىر كەلىگە دە جەتپەگەن. قازىر ولاردىڭ جاعدايى جاقسارىپ, اناسىمەن بىرگە ۇيىنە شىعارىلدى.

«الماتى قالالىق پەريناتالدىق ورتالىعىنىڭ دارىگەرلەرى 24 جاستاعى اياعى اۋىر كەلىنشەكتى قابىلداپ, تۇسكى ۋاقىتتا ۇشەمدى بوساندىرىپ الدى. سابيلەر مەرزىمىنەن بۇرىن 910 گرامم, 930 گرامم جانە 980 گرامم ارالىعىندا شالا تۋعان, بىراق دارىگەرلەر وسى ءۇش قىزدىڭ ءومىرىن ساقتاپ قالۋ ءۇشىن قولدان كەلگەننىڭ ءبارىن جاسادى. دۇنيەگە كەلگەن ۇشەم رەانيماتسيا بولىمشەسىنە جاتقىزىلدى. رەانيماتسيادان كەيىن قارقىندى تەراپيا بولىمشەسىندە ەم الدى. كۇتۋ كەزەڭى وڭ ديناميكاسىن كورسەتكەن سوڭ جاڭا تۋعان نارەستەلەردىڭ جاعدايى تۇراقتالىپ, جالپى بولىمشەگە اۋىستىرىلدى», دەدى الماتى قالالىق قوعامدىق دەنساۋلىق ساقتاۋ باسقارماسىنىڭ ءباسپاسوز قىزمەتى.

قازىرگى ۋاقىتتا بوسانعان ايەلدىڭ جانە 3 قىزدىڭ جاعدايى قاناعاتتانارلىق. جاس انا مەن ۇشەمدەر 47 كۇن پەريناتالدىق ورتالىقتا قاراۋدا بولدى. الداعى ۋاقىتتا بالالاردى وتباسىنىڭ تۇرعىلىقتى جەرى بويىنشا ەمحانانىڭ دارىگەرلەرى قاداعالايتىن بولادى.

«بوسانعاننان كەيىن سابيلەردى بىردەن رەانيماتسياعا الىپ كەتتى, دارىگەرلەر وتە جاقسى قارادى. رەانيماتسيا بولىمشەسىنەن 10-15 كۇن ارالىعىندا ءبىرىنشى ەكى قىز شىقتى, سودان كەيىن سەزىم دۇنيەگە كەلدى», دەدى جاس انا ايىم ساعاتبەك.

سابيلەردىڭ دەنساۋلىعى قازىر جاقسى. ءوز بەتىمەن ەمەتىن جاعدايعا جەتكەن. ۇشەۋى دە سالماق قوسىپ كەلەدى.