قازاقستان قارجىگەرلەر قاۋىمداستىعى تالداۋ ورتالىعى ماۋسىم ايىندا قازاقستاننىڭ ۇلتتىق قورىنان 1,1 ميلليارد دوللار ساتىلعانىن, بۇل سوڭعى 12 ايداعى ەڭ جوعارعى كورسەتكىش ەكەنىن حابارلايدى, دەپ جازادى Egemen.kz.
ءوتىپ بارا جاتقان اپتاداعى KASE ۆاليۋتا ساۋدا-ساتتىعىنىڭ اشىلۋىندا ۇلتتىق ۆاليۋتاعا دەگەن سۇرانىستىڭ وسكەنى بايقالدى. دۇيسەنبى كۇنگى ساۋدا-ساتتىق ناتيجەسىندە ءبىر دوللار 427,43 تەڭگەگە تەڭەستىرىلىپ, تاۋلىگىنە 1,81 تەڭگەگە دەيىن ارزاندادى.
«USDKZT_TOM قۇرالىمەن ساۋدا-ساتتىق كولەمى 201,7 ملن دوللارعا جەتتى. اعىمداعى جىلى دوللارمەن ساۋدانىڭ ورتاشا تاۋلىكتىك كولەمى 130,1 ملن دوللاردى قۇرايتىنىن ەسكەردىك. نارىقتاعى كوڭىل-كۇيدىڭ جاقسارۋىنا سىرتقى نارىقتىڭ سالىستىرمالى تۇردە تۇراقتى سيگنالدارى سەبەپ بولدى» دەپ ايتىلدى قازاقستان قارجىگەرلەرى قاۋىمداستىعى حابارلاماسىندا.
حابارلامادا تەڭگەنى قولداۋ ءۇشىن بيۋدجەتكە ترانسفەرتتەر ءبولۋ شەڭبەرىندە ۇلتتىق قوردان ۆاليۋتانى تۇراقتى ساتۋ شارالارى ىسكە اسقانى تۋرالى جازىلعان.
«وسىلايشا, ۇلتتىق قوردان شەتەل ۆاليۋتاسىن ساتۋ كولەمى ماۋسىم ايىندا 1093,3 ميلليون دوللارعا دەيىن ءوستى. بۇل سوڭعى 12 ايداعى ەڭ جوعارى كورسەتكىش. ءبىرىنشى جارتىجىلدىقتىڭ قورىتىندىسى بويىنشا ۇلتتىق قوردان ساتىلىمنىڭ جالپى كولەمى 4,3 ميلليارد دوللاردى قۇرادى» دەپ حابارلايدى ققق.
تاڭەرتەڭگىلىك سەسسياسى ءبىر دوللار 426,62 تەڭگەگە باعالانىپ, ۇلتتىق ۆاليۋتا 1,11 تەڭگەگە نىعايدى.
بۇعان دەيىن ۇلتتىق بانك توراعاسىنىڭ ورىنباسارى ءاليا مولدابەكوۆا 2021 جىلى مامىردا ۆاليۋتا نارىعىنداعى جاعداي تەڭدەستىرىلگەن, قارجىلىق رەتتەۋشى ارالاسپادى دەپ مالىمدەدى.
ونىڭ ايتۋىنشا, ۆاليۋتا نارىعىندا بيۋدجەتكە اۋدارىمدار جاساۋعا 553 ميلليون دوللار اۋدارىلدى, كۆازيمەملەكەتتىك سەكتوردىڭ ساتۋ كولەمى شامامەن 340 ميلليون دوللاردى قۇرادى.