ەلوردالىقتار كورەي سۋرەتشىسىنىڭ تسيفرلىق تۋىندىلارىن تاماشالاي الادى

ەلورداداعى قر تۇڭعىش پرەزيدەنتى – ەلباسى كىتاپحاناسىنىڭ مۋزەيىندە كورەيا رەسپۋبليكاسى ەلشىلىگىنىڭ كورەي مادەني ورتالىعى ەلباسى كىتاپحاناسى جانە نۇرسۇلتان نازارباەۆ قورىمەن بىرلەسىپ ۇيىمداستىرعان كورەي سۋرەتشىسى لي ينامنىڭ تسيفرلىق ونەر تۋىندىلارىنىڭ كورمەسى اشىلدى.

كورمە اياسىندا الەمگە ايگىلى كورەي بەينە سۋرەتشىسى پەك نامدجۋننىڭ مۇراگەرى, ايگىلى كورەي مەديا ونەرىنىڭ شەبەرى لي ينامنىڭ جۇمىستارى ۇسىنىلدى. اۆتور لي ينام شىعىس ازيانىڭ كلاسسيكالىق كەسكىندەمەسىنىڭ ايگىلى كارتينالارىن نەگىزگە الا وتىرىپ, شىعىس جانە باتىس ونەرىن ۇيلەستىرىپ, تسيفرلىق ونەردى ۇسىندى.

«مەن پاندەمياعا بايلانىستى اشىلۋ راسىمىنە قاتىسا الماعانىما وكىنەمىن. بىراق سوعان قاراماستان, قازاقستاندا كورەي كلاسسيكالىق كەسكىندەمەسىنىڭ تانىمال كارتينالارىن پايدالانا وتىرىپ, تسيفرلىق ونەر تۋىندىلارىن كورسەتەتىن كورمەنىڭ ماڭىزى زور دەپ سانايمىن. وسى كورمە ءۇشىن مەن «جارىقتىڭ جاندانۋى» تاقىرىبىنا جۇمىستار دايىندادىم. ونىڭ باستى يدەياسى كورمە كەڭىستىگىن جانە كورەيا مەن قازاقستان اراسىنداعى ءوزارا قارىم-قاتىناستاردىڭ تاريحي سيپاتىن «جارىقتاندىرۋ» بولدى. سول ارقىلى ەكى ەل اراسىنداعى بەرىك دوستىق پەن ىنتىماقتاستىقتىقتىڭ ءمانى اشىلدى», دەدى كورمە اۆتورى لي ينام ونلاين بايلانىسقا شىعىپ.

كورەي مادەني ورتالىعىنىڭ ديرەكتورى لي حەراننىڭ ايتۋىنشا, بۇل كورمە كورەيا تۋرالى نەگىزىنەن K-pop جانە كورەي سەريالدارى ارقىلى بىلەتىن قازاقستاندىقتار ءۇشىن تسيفرلىق ونەر ارقىلى كورەي سۇلۋلىعىن سەزىنۋگە جانە بىلۋگە مۇمكىندىك بەرەدى. سونداي-اق ول قازاقستان مەن كورەيا اراسىنداعى ديپلوماتيالىق قاتىناستار ورناعاننان بەرى دامىپ كەلە جاتقان ەكى ەل اراسىنداعى مادەني جانە ەكونوميكالىق الماسۋدىڭ جاندانۋىنا ىقپال ەتەدى.

ء«بىزدىڭ مادەني ورتالىق قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋ اياسىندا قازاقستاندىقتارعا كورەي مەديا ونەرىنىڭ تۋىندىلارىن ۇسىنۋعا قۋانىشتى. اۆتور لي ينامنىڭ ەڭبەكتەرىنىڭ ارقاسىندا كورەيا تۋرالى كوبىرەك بىلە الاسىز, سونداي-اق ورتالىقتىڭ الداعى ءىس-شارالارىنا ۇلكەن قىزىعۋشىلىق تانىتىپ, قاتىسا الاسىز دەپ ۇمىتتەنەمىن», دەدى لي حەران.