وتكەن جىلدىڭ قازان ايىنان بەرى قازاقستان اۋماعىندا 112 شەتەلدىك قىلمىسكەر ۇستالعان, دەپ حابارلايدى Egemen.kz.
بۇل جونىندە ىشكى ىستەر مينيسترلىگى مالىمدەدى.
«ىشكى ىستەر مينيسترلىگى ۇكىمەتتىك ەمەس ۇيىمدارمەن بىرلەسىپ, وتكەن جىلدىڭ قازان ايىنان بەرى ازاماتتىعى بەلگىسىز ادامداردى انىقتاۋ جانە قۇجاتتاندىرۋ بويىنشا جۇمىستار جۇرگىزۋدە. وسىنداي اكتسيا بارىسىندا 4636 قۇجاتسىز ادام انىقتالدى. قازىرگى ۋاقىتتا پوليتسيا قىزمەتكەرلەرى 3 408 ادامنىڭ قۇجاتتارىن قالپىنا كەلتىرىپ, 1 278 ادامعا قاتىستى ازاماتتىق راستاۋ ءراسىمىن اياقتاپ جاتىر. ايتا كەتەرلىك جايت, جىل باسىنان بەرى ادام ساۋداسىمەن بايلانىستى 103 قىلمىس تىركەلدى», دەدى ۆەدومستۆونىڭ ءباسپاسوز وكىلى شۇعىلا تۇرلىبەك.
ونىڭ ۇسىنعان مالىمەتى بويىنشا, اتالعان 103 قىلمىستىڭ 61-ءى وندىرىسپەن اياقتالىپ, سوتقا جولدانعان.
«قازىرگى ۋاقىتتا سوت 9 ادامعا قاتىستى ايىپتاۋ ۇكىمىن شىعاردى. تاعى 42 ءىس تەرگەۋ ساتىسىندا بولسا, 9 ادام ءتۇرلى مەرزىمگە سوتتالدى. ەڭبەك جانە جىنىستىق قۇلدىقتان 19 ادام قۇتقارىلدى. بۇدان باسقا «ميگرانت» جانە «زاڭسىز يمميگرانت-2» جەدەل ءىس-شاراسى بارىسىندا 14,5 مىڭنان استام كوشى-قون زاڭناماسىن بۇزۋ جاعدايى انىقتالدى», دەپ ءتۇسىندىردى شۇعىلا تۇرلىبەك.
مينيسترلىكتىڭ دەرەگى بويىنشا كۇزدەن بەرى شەتەلدىكتەردىڭ ەڭبەگىن زاڭسىز پايدالانۋدىڭ 3 666 فاكتىسى تىركەلگەن.
«قازاقستاننىڭ كوشى-قون زاڭناماسىن بۇزعان 987 شەتەلدىك ەلدەن شىعارىلدى. شەتەلدىكتەر تۋرالى پوليتسياعا حابارلاماعان 823 جۇمىس بەرۋشى مەن 5 966 ازامات جاۋاپكەرشىلىككە تارتىلدى. ناتيجەسىندە, پوليتسيا ىزدەۋدە جۇرگەن 112 قىلمىسكەردى ۇستاپ, زاڭسىز كوشى-قون ۇيىمداستىرۋدىڭ 33 فاكتىسىن انىقتادى», دەپ قورىتىندىلادى ءىمم ءباسپاسوز وكىلى.