قاراعاندى وبلىسى اكىمىنىڭ ورىنباسارى سەرىك شايداروۆ ۇلىتاۋ اۋدانىندا دالا ورتىنەن زارداپ شەككەن ازاماتتاردىڭ قايسىسىنا جانە قانداي قولداۋ كورسەتىلەتىنىن ءتۇسىندىردى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
قازىرگى تاڭدا توتەنشە جاعدايدىڭ الدىن الۋ جانە جويۋ بويىنشا اۋداندىق كوميسسيا جۇمىس ىستەيدى. اۋداندا بارلىعى 39 جەر پايدالانۋشى زارداپ شەككەنى بەلگىلى بولدى. ولاردىڭ جايىلىمدارى ورتەنىپ كەتكەن. سونداي-اق بىر شارۋا قوجالىعىنىڭ باسشىسى 318 باس مالىنان ايىرىلعان.
سەرىك شايداروۆ فەرمەرلەرمەن, ونىڭ ىشىندە مالى قىرىلعان شارۋا قوجالىعىنىڭ باسشىسى ساعىنتاي ابدىبەكوۆپەن كەزدەسۋ بارىسىندا تاۋەلسىز ساراپشى شىعىندى باعالايتىنىن, سونان كەيىن نارىقتىق قۇنى بويىنشا وتەماقى تولەنەتىنىن ءتۇسىندىردى.
ال فەرمەر ساعىنتاي ابدىبەكوۆ كومەكتەسۋگە ۋادە بەرىپ, قول ۇشىن سوزعان اتقارۋشى بيلىك وكىلدەرىنە العىس ايتتى.
– مەن مال شارۋاشىلىعىمەن 1996 جىلدان بەرى اينالىسامىن. وسىنداي جاعداي ءبىزدىڭ فەرمادا العاش رەت بولدى. ءورت تەز تارادى. جەل ەكپىندى بولىپ, باعىتىن وزگەرتتى. ءبىز ءتىپتى مالدى قاۋىپسىز جەرگە شىعارىپ ۇلگەرمەدىك. ەندى, ءبارى ويداعىداي بولادى دەپ ۇمىتتەنەمىن. وبلىس اكىمىنىڭ ورىنباسارى, جەرگىلىكتى اكىم, اۋدان باسشىسى دا مەنىمەن بايلانىسقا شىقتى. كومەكتەسۋگە ۋادە بەردى, – دەيدى فەرمەر.
كەزدەسۋدە وبلىس اكىمىنىڭ ورىنباسارى جايىلىمدىق جانە شابىندىق جەرلەردەن ايىرىلعان فەرمەرلەرگە دە قيىن جاعدايدان شىعۋدىڭ شەشىمىن ۇسىندى.
– ءبىر شەشىم مىناداي – قازىر اۋداننىڭ كوپتەگەن فەرمەرلەرى زارداپ شەككەن قوجالىقتارعا ءشوپ شابۋ جانە مال جايۋ ءۇشىن ءوز جەرلەرىن بەرۋدى ۇسىنادى. ەكىنشىسى – ءبىر جىلعا وتەۋسىز مەملەكەتتىك جەر بولەمىز. مۇنداي شارتتى جاساۋعا «جەر كودەكسى» مۇمكىندىك بەرەدى, – دەدى س.شايداروۆ.
سوڭعى رەسمي مالىمەتتەرگە سەنسەك, ۇلىتاۋ اۋدانىنداعى تابيعي ءورت وشاقتارىنىڭ بارلىعى سوندىرىلگەن.