ەلوردانىڭ اۋماعىندا سۋعا شومىلۋعا رۇقسات ەتىلەتىن ايماقتاردىڭ اتى بەلگىلى بولدى, دەپ حابارلايدى Egemen.kz.
بۇل تۋرالى نۇر-سۇلتان قالاسى توتەنشە جاعدايلار دەپارتامەنتى ازاماتتىق قورعانىس باسقارماسىنىڭ باستىعى راتبەك دەمەۋبەرگەن قالا اكىمدىگىنىڭ ونلاين بريفينگىندە ايتتى.
بيىل نۇر-سۇلتان قالاسى اكىمدىگىنىڭ قاۋلىسى بويىنشا سۋعا شومىلۋعا رۇقسات ەتىلگەن 3 اۋماق بەلگىلەندى. ولار – «ورتالىق جاعاجاي», «تري پەسكاريا» جانە «استانالىق اۋلا».
سونىمەن قاتار ءماسليحات شەشىمىنىڭ جوباسى شەڭبەرىندە شومىلۋعا تىيىم سالىناتىن 20 ۋچاسكە ايقىندالدى. قازىر ءماسليحات شەشىمى ادىلەت مينيسترلىگىنىڭ قارالۋىندا. ۆەدومستۆودان شىققاننان كەيىن بۇل قاۋلى قابىلداناتىن بولادى.
«20 اۋماقتىڭ 7-ءۋى الماتى اۋدانىندا, 4-ءۋى بايقوڭىر اۋدانىندا, 6-ۋى ەسىل اۋدانىندا جانە 3-ءۋى سارىارقا اۋدانىندا ورنالاسقان. ءماسليحات شەشىمى قابىلدانعاننان كەيىن ءتىزىم اقپارات قۇرالدارىنا جاريالانىپ, ۇگىت-ناسيحات جۇمىستارى جۇرگىزىلەدى», دەدى راتبەك دەمەۋبەرگەن.