ەلىمىزدەگى ەڭ كونە تەاترلاردىڭ ءبىرى – الماتى قالاسىنداعى مەملەكەتتىك قۋىرشاق تەاترىنىڭ نەگىزى 1935 جىلى قالانعان. قازاقستاننىڭ باسقا قالالارىندا قۋىرشاق تەاترلارى كەيىنىرەك 80-جىلدارى قۇرىلسا, 85 جىلدىق تاريحى بار قۋىرشاق تەاترىنىڭ جۇزدەگەن پەساسى بار.
ەل ىندەتتەن امان كەزدە, اپتا سايىن الماتىنىڭ كىشكەنتاي كورەرمەندەرى ارتىستەردىڭ تىنىمسىز ەڭبەگىنىڭ ارقاسىندا حالىق ەرتەگىلەرىمەن تانىسىپ وتىردى.
«بىلتىر تەاترلاردىڭ كارانتينگە جابىلاتىنى تۋرالى ەستىگەننەن كەيىن ءبىز جۇمىستى قايتا فورماتتاپ, سپەكتاكلدەردى تىكەلەي ەفير مەن جازبالار ارقىلى كورسەتە باستادىق. «الماتى» تەلەارناسى قولداۋ كورسەتتى. سونىڭ ناتيجەسىندە وننان استام سپەكتاكل ءتۇسىرىلدى. تەاتر ديرەكتورى تالعات ەسەناليەۆتىڭ باسشىلىعىمەن جاڭا ونلاين-فورماتتى مەڭگەردىك. تۇسىرىلگەن جازبالار ارقىلى سپەكتاكلدەردىڭ بەينەمۇراعاتى پايدا بولدى», دەيدى قۋىرشاق تەاترىنىڭ كوركەمدىك جەتەكشىسى اقجارقىن سارسەنبەك.
ونەر ادامدارى تەاتردىڭ شەكتەۋ شارالارىنان قاجىعانى بايقالادى. ويتكەنى كورەرمەندەر شىعارماشىلىق ۇدەرىستەردى تىرىدەي كورۋى كەرەك. ونىڭ ۇستىنە, قۋىرشاق تەاترىنىڭ رەپەرتۋارىندا ءاربىر جاس الماتىلىق كورۋى ءتيىس 30-دان اسا سپەكتاكل بار. ىندەت كەزىندە اكتەرلەر جاڭا فورماتتا 15 باعدارلاما قۇرىپ, ەرتەگى مەن قۋىرشاقتاردىڭ قالاي جاسالاتىنىن تىكەلەي ەفيردە ايتتى. قازىرگى ۋاقىتتا تەاتر ترۋپپاسىنىڭ ءبىر بولىگى دەمالىستا, اكتەرلەردىڭ جارتىسى جۇمىس ىستەيدى. بۇل رەتتە تەاتر ۇجىمى كورەرمەندەردىڭ جينالۋىن, جاندى ەموتسيالار مەن قولداۋلاردىڭ بولعانىن قالايدى.
«مەن ۆاكتسيناعا سانالى تۇردە كەلدىم. نۇر-سۇلتان قالاسىندا تۇراتىن ۇلىمنىڭ قوڭىراۋىنان كەيىن بىردەن ەكپە الدىم. بالامنىڭ دوسىنىڭ اكەسى كوروناۆيرۋس ينفەكتسياسىنان قايتىس بولعان ەكەن. مەن بالالارىم مەن نەمەرەلەرىمنىڭ الاڭداعانىن قالامايمىن. سول ءۇشىن №7 كلينيكاعا تىركەلىپ, 4 ساۋىردە ۆاكتسينانىڭ ءبىرىنشى كومپونەنتىن الدىم. 21 كۇننەن كەيىن ەكىنشى ۆاكتسينانى الدىم. جاناما اسەرلەر بولعان جوق, تەك ينەكتسيا ورنى ءسال اۋىردى. رەسمي اقپاراتقا سەنۋ كەرەك. ۆاكتسينا الماس بۇرىن, ول تۋرالى رەسمي اقپاراتتى وقىدىم. حالقىنىڭ بارلىعى ۆاكتسينا العان يزرايلگە قاراڭىز, اقش-تا ۇجىمدىق يممۋنيتەت 70%-دى قۇرايدى. بىزگە وسى ەلدەردەن ۇلگى الۋ كەرەك», دەدى الماتى قۋىرشاق تەاترىنىڭ كوركەمدىك جەتەكشىسى.
ۆاكتسينانى قۋىرشاق تەاترىنىڭ قويۋشى رەجيسسەرى قابدىل ەركەبۇلان دا قولدايدى. ول ۆاكتسينانىڭ ءبىرىنشى كومپونەنتىن 19 ساۋىردە الدى. كەيىنىرەك ەكىنشى كومپونەنتتى الدى. رەجيسسەردىڭ ايتۋىنشا, ونلاين جۇمىس تەاتر ومىرىنە ءتان ەمەس. قابدىل ەركەبۇلاننىڭ ايتۋىنشا, تەاتر جۇمىس ىستەۋى كەرەك, اكتەرلەر جۇمىس فورماسىندا بولۋى كەرەك, كورەرمەندەر ونەردى ساعىنىپ ءجۇر. ءدال وسى سەبەپتەرگە بايلانىستى ۆاكتسينا قاجەت.
«بىرىنشىدەن, ول وتباسىنىڭ قاۋىپسىزدىگى, دەنساۋلىعى ءۇشىن ەكپە الدى. ەكىنشىدەن, ءبىز, تەاتر قىزمەتكەرلەرى, كۇن سايىن ءبىر-بىرىمىزبەن بايلانىستا بولامىز ءارى ءبىر-ءبىرىمىز ءۇشىن قاۋىپسىز بولۋىمىز كەرەك. ۇشىنشىدەن, تەاترعا كورەرمەندەر كەلەدى, ولاردىڭ كوپشىلىگى بالالار. مەنىڭ ويىمشا, ءبىز ءوز كورەرمەندەرىمىزدى قورعاۋىمىز كەرەك. گوگول كوشەسىندەگى ەمحانادا ەكپە الدىم, سەبەبى بۇل جۇمىس ورنىنا جاقىن بولدى», دەدى ول.
تەاترعا اكتەرلەر وزدەرى شاقىرعان ەكپە توبى بارعان, سودان كەيىن باسقا قىزمەتكەرلەر ۆاكتسينا الدى. ۆاكتسينانى تەاتر ءارتىسى رۋسلان ءابۋ 5 ساۋىردە الدى. اكتەر ءوزىنىڭ جۇمىسىنا قۇشتار ەكەنىن ايتتى. ول تەاتر الەمىنىڭ قالىپتى جاعدايعا ورالۋىن, كورەرمەندەردىڭ قويىلىمعا الاڭسىز كەلگەنىن قالايدى.
«بۇگىندە ۆاكتسيناعا كۇمانداناتىندار كوپ, بىراق بۇل – ءوزىڭىزدى جانە اينالاڭىزداعىلاردى قورعاۋدىڭ جالعىز ءتاسىلى. ءبىزدىڭ تەاتردا اكتەرلەردىڭ 90%-ى ەكپە الدى. بۇل تاڭداۋدا ءبىز ءبىر-ءبىرىمىزدى قولدادىق. ءبىز اۋرۋدىڭ تاسىمالداۋشىسى بولعىمىز كەلمەيدى», دەيدى رۋسلان ءابۋ.
ۇزاق مەرزىمدى شەكتەۋ شارالارىنان كەيىن تەاتر قىزمەتكەرلەرىنىڭ باستى قورقىنىشى – قويىلىمداردىڭ بولماۋى. بىراق ترۋپپانىڭ كوپتەگەن جوسپارلارى بار, ال ۆاكتسينا بۇل اۋرۋعا قارسى تۇرادى. اكتەرلەر قالا تۇرعىندارى ءوز دەنساۋلىعى ءۇشىن ۆاكتسينا الادى دەپ سەنەدى.
الماتى