كوپسالالى قالالىق اۋرۋحانالاردىڭ اكۋشەرلىك بلوكتارىندا ەلوردا كۇنىندە تۋعان بالالاردى ءداستۇرلى تۇردە قۇتتىقتاۋ ءراسىمى ءوتتى, دەپ حابارلايدى ەلوردا اكىمدىگىنىڭ رەسمي سايتى.
ەسىل, الماتى اۋدانى اكىمدىكتەرى جانە قالالىق قوعامدىق دەنساۋلىق ساقتاۋ باسقارماسىنىڭ اتىنان اكىمنىڭ ايەلدەر ىستەرى جانە دەموگرافيالىق ساياسات جونىندەگى باس ينسپەكتورى س.بيسەمباەۆا سابيلەر مەن ولاردىڭ انالارىنا قۇتتىقتاۋ حات پەن گۇل شوقتارىن تابىستاپ, زور دەنساۋلىق تىلەدى.
«سىزدەردى بۇگىن ايتۋلى كۇنمەن قۇتتىقتايمىن! نارەستەلەرىڭىزدىڭ دەنى ساۋ بولىپ, سىزدەردى قۋانىشقا بولەيتىن, ەلگە قىزمەت ەتەتىن ازامات بولىپ ءوسسىن! ءبىز سىزدەردى ەلوردا كۇنىمەن قۇتتىقتاۋ ءۇشىن ارنايى كەلدىك. ەل ازاماتتارى جىل ساناپ كوبەيە بەرسىن!», دەدى س.بيسەمباەۆا.
ساۋلە بيسەمباەۆا اكۋشەرلىك بلوكقا كۆي-مەن اۋىرىپ تۇسكەن انالاردى دا قۇتتىقتادى. مۇندا 5 دەنى ساۋ بالا ومىرگە كەلدى: 4 ۇل جانە ءبىر قىز.
«دارىگەرلەر بەلگىلەگەن ۋاقىتقا سۇيەنسەك, ءسال كەيىنىرەك بوسانۋىم كەرەك ەدى. الايدا, بالام ءدال وسى كۇنى ومىرگە كەلۋدى تاڭداعان ەكەن. بۇل بەكەر ەمەس, مۇندا ءبىر سىر بار دەپ ويلايمىن», دەيدى جاڭا بوسانعان انالاردىڭ ءبىرى.
ەلوردا كۇنىندە بوسانعان انالارعا ەستەلىك سىيلىقتار مەن سابيگە ارنالعان كەرەك-جاراقتار بەرىلدى.
كەشە, ياعني 6 شىلدە كۇنى ەلوردادا 77 بالا ومىرگە كەلدى, ونىڭ ىشىندە 37 ۇل جانە 40 قىز بالا.