330 قازاقستاندىق شەتەلدىك جەتەكشى جوعارى وقۋ ورىندارىنا ۇسىنىلدى. ولار ءبىلىم جانە عىلىم مينيسترلىگىنىڭ باستاماسىمەن جاسالعان ۇكىمەتارالىق كەلىسىم شەڭبەرىندە ماجارستان, پولشا, قىتاي, ۋكراينا, سلوۆاكيا, ءازىربايجان جانە ۆەتنام ۋنيۆەرسيتەتتەرىندە تەگىن وقي الادى, دەپ جازادى Egemen.kz.
قر بعم ءباسپاسوز قىزمەتىنىڭ حابارلاۋىنشا, قازاقستانعا ورتالىق ازيا ەلدەرى اراسىندا ەڭ كوپ 250 ءبىلىم گرانتىن ماجارستان ءبولىپ وتىر. قىتاي – 47, پولشا – 11, ۋكراينا – 10, سلوۆاكيا – 3, ءازىربايجان – 8, ۆەتنام – 1 گرانت ۇسىنعان. گرانتتار باكالاۆريات, ماگيستراتۋرا, دوكتورانتۋرا جانە رەزيدەنتۋرا باعدارلامالارى بويىنشا بولىنەدى.
«اڭگىمەلەسۋ بارىسىندا ءاربىر ۇمىتكەرگە ماماندىق تاڭداۋعا دەگەن ىنتاسى مەن جىگەرى, تەوريالىق ءبىلىمى مەن وقۋداعى نەمەسە تاڭداعان ماماندىعى سالاسىنداعى جەتىستىكتەرىنىڭ دەڭگەيىن انىقتاۋ ءۇشىن سۇراقتار قويىلدى. سونداي-اق ءبىز ويلاۋ لوگيكاسىنىڭ دەڭگەيىن, سويلەۋ ساپاسىن, كەز كەلگەن جاعدايداعى ماسەلەلەردى شەشۋ بويىنشا ۇمىتكەرلەردىڭ جەكە قاسيەتتەرى مەن داعدىلارىن باعالادىق. ءبىلىم بەرۋ گرانتىن تاعايىنداۋ تۋرالى تۇپكىلىكتى شەشىمدى قابىلداۋشى تاراپ قابىلدايدى», دەدى قر بعم حالىقارالىق باعدارلامالار ورتالىعىنىڭ پرەزيدەنتى اينۇر كارىبوزوۆا.
ۇمىتكەرلەردى دەپۋتاتتار, ساراپشىلار, ينجەنەرلىك-تەحنيكالىق, مەديتسينالىق, گۋمانيتارلىق جانە جاراتىلىستانۋ عىلىمدارىنىڭ دوكتورلارىنان قۇرالعان تاۋەلسىز كوميسسيا ىرىكتەدى. تاۋەلسىز ساراپتاما كوميسسياسى نەگىزگى جانە رەزەرۆتىك تىزىمگە شەت ءتىلىن ءبىلۋ دەڭگەيى, ءبىلىمى تۋرالى قۇجاتتىڭ ورتاشا بالى جانە اڭگىمەلەسۋدىڭ ورتاشا باعاسىنىڭ جيىنتىعى بويىنشا ەڭ جوعارى ۇپاي جيناعان ۇمىتكەرلەردى ەنگىزدى.