سەمەي قالاسىندا پەريناتالدى ورتالىقتىڭ جاڭا كورپۋسى اشىلدى, دەپ حابارلايدى Egemen.kz.
جاڭا عيمارات جاماقاەۆ كوشەسى 100/ا مەكەنجايىنداعى بۇرىنعى مەديتسينالىق جەدەل جاردەم اۋرۋحاناسىنىڭ حيرۋرگيا كورپۋسىندا اشىلدى.
مۇندا «جۇمىسپەن قامتۋدىڭ جول كارتاسى»باعدارلاماسى اياسىندا كۇردەلى جوندەۋ جۇرگىزىلگەن. بۇل ماقساتقا مەردىگەر «بايسىن-ا» جشس-عا 713 ملن تەڭگە بولىنگەن. پاتسيەنتتەردى قابىلداۋ ەرتەڭنەن باستالادى.
«بۇل - بولاشاق انالاردى قابىلدايتىن مەكەمە. مۇندا 85 ورىن قاراستىرىلعان. اسا قاۋىپتى جاعدايداعى انالار ءبىرىنشى كورپۋستا بولسا,ال مىندا ەشقانداي پوتولوگياسى جوقتار قابىلدانادى. وسى جەردە بۇرىن بولماعان ورتالىق زارارسىزداندىرۋ بولىمشەسى جانە باك-زەرتحانا اشىلدى. وبلىستىق بيۋدجەتتەن قارجىلاندىرۋ نەگىزىندە عيمارات ەڭ زاماناۋي جابدىقتارمەن جابدىقتالعان. جۇكتى ايەلدىڭ ءوزى ءۇشىن دە, ونىڭ تۋىستارى ءۇشىن دە بارلىق قولايلى جاعدايلار جاسالىپ وتىر. ءبىز ناۋقاستاردى قابىلداپ, جۇمىس باستاۋعا دايىنبىز», دەيدى پەريناتالدى ورتالىقتىڭ باس دارىگەرى ارحات دايىربەكوۆ.
سەمەيدەگى پەريناتالدى ورتالىق قالا جانە جاقىن ماڭداعى اۋدانداردىڭ تۇرعىندارىنا قىزمەت كورسەتەدى. ونىڭ 3 كورپۋسى بار. ءبىرىنشىسى اسا قاۋىپتى توپتاعى پاتسيەنتتەردى قابىلدايدى. ال ءۇشىنشى كورپۋستىڭ اشىلۋى وسى جىلدىڭ قىركۇيەك ايىنا جوسپارلانىپ وتىر.