ەل تاۋەلسىزدىگىنىڭ 30 جىلدىعى اياسىندا جانە استانا كۇنى مەرەكەسى قارساڭىندا قىزىلوردا قالاسىنداعى ء«نۇرسات» تەننيس ورتالىعىنىڭ جانىنان جازعى تەننيس كورتى پايدالانۋعا بەرىلدى. نىساننىڭ اشىلۋ راسىمىنە وبلىس اكىمى گۇلشارا ابدىقالىقوۆا قاتىسىپ, ايماقتاعى بۇقارالىق سپورتتى دامىتۋ باعىتىنداعى اتقارىلىپ جاتقان جۇمىستاردى اتاپ ءوتتى, دەپ حابارلايدى Egemen.kz.
«بۇگىندە ەلباسى ن.نازارباەۆتىڭ باستاماسىمەن, ەل پرەزيدەنتى ق.توقاەۆتىڭ قولداۋىمەن سپورتتىڭ بۇقارالىق سيپات الۋىنا ەرەكشە كوڭىل ءبولىنىپ, بۇقارالىق سپورتپەن شۇعىلدانۋشىلار سانى ارتۋدا. وڭىردە بۇقارالىق سپورتپەن شۇعىلداناتىن تۇرعىندار ۇلەسى 31,3 % قۇرادى. حالىقتىڭ سپورتتىق نىساندارعا قولجەتىمدىلىگىن ارتتىرۋ ماقساتىندا «اۋىل - ەل بەسىگى» باعدارلاماسى اياسىندا وسى جىلى وبلىس بويىنشا ارال اۋدانىنداعى قامىستىباس جانە امانوتكەل اۋىلدارى, قازالى اۋدانىنداعى ءپىرىموۆ اۋىلى, قارماقشى جانە جالاعاش اۋداندار ورتالىقتارىندا 5 سپورت كەشەنىنىڭ قۇرىلىسى جۇرگىزىلەتىن بولادى. سونىمەن بىرگە, «سامۇرىق» كورپوراتيۆتىك قورىنىڭ دەمەۋشىلىگىمەن قىزىلوردا قالاسىنداعى ج.ماحامبەتوۆ اۋىلدىق وكرۋگىنەن كوپبەيىندى سپورت كەشەنىن سالۋ باستالادى», دەدى ايماق باسشىسى.
سپورت سالاسىنىڭ ارداگەرى يۋري كيم تەننيسشىلەردى جاڭا كورت اشىلۋىمەن قۇتتىقتاپ, ەلباسىمەن ءبىر تەننيس كورتىندا كەزدەسكەنىن ەسكە الدى. سونداي-اق, تەننيستەن رەسپۋبليكالىق تۋرنيرلەردىڭ جەڭىمپازى ۋرسۋلا راحمەت وبلىس باسشىلىعىنا ايماقتا سپورت سالاسىن دامىتۋ بويىنشا جۇرگىزىلىپ جاتقان جۇمىسى ءۇشىن العىسىن ءبىلدىردى.
جاڭا تەننيس كورتىنىڭ عيماراتى جازعى مەزگىلدە ويناۋعا ارنالعان. عيماراتتىڭ ەنى 45, ۇزىندىعى 90 مەتر. عيماراتتا 4 تەننيس كورتى ورنالاسقان جانە باسقا دا سپورتتىق ويىن تۇرلەرىنىڭ الاڭى بار. نىساننىڭ قۇرىلىسى 3 جىل بۇرىن باستالىپ, بيىل ماۋسىمدا اياقتالدى. قازىرگى تاڭدا ء«نۇرسات» تەننيس ورتالىعىندا 120 سپورتشى مەن 3 جاتتىقتىرۋشى جۇمىس جاسايدى.
سالاداعى جاسالعان جۇمىستاردىڭ ناتيجەسىندە سپورتشىلارىمىز جوعارى جەتىستىكتەرگە قول جەتكىزىپ, ەل ابىرويىن اسقاقتاتۋدا. جىل باسىنان بەرى وبلىس سپورتشىلارى ەل چەمپيوناتتارى مەن كۋبوكتارىندا 557 مەدال ەنشىلەسە, الەم جانە ازيا چەمپيوناتتارىندا 47 مەدالعا قول جەتكىزدى. توكيودا وتەتىن XXXII جازعى وليمپيادا ويىندارىنا وبلىستان بوكستان الەم چەمپيوناتىنىڭ كۇمىس جۇلدەگەرى قامشىبەك قوڭقاباەۆ, ەركىن كۇرەستەن الەم چەمپيوناتىنىڭ كۇمىس جۇلدەگەرى داۋلەت نيازبەكوۆ جانە كاراتە-دودان ءۇش دۇركىن الەم چەمپيونى ءمولدىر جاڭبىرباي جولداما الىپ وتىر. سونىمەن قاتار, قامشىبەك قوڭقاباەۆ توكيو وليمپياداسىندا قازاقستان قۇراماسىنىڭ تۋىن ۇستاۋ قۇرمەتىنە يە بولدى.