شىمكەنت قالاسىندا تاكسي جۇرگىزۋشىلەرىن توناپ, ولتىرگەن قىلمىستىق توپ مۇشەلەرىنە ۇكىم شىعارىلدى. ءتورت قىلمىسكەردىڭ ەكەۋى قالعان ءومىرىن تەمىر توردىڭ ارعى جاعىندا وتەيتىن بولادى, دەپ حابارلايدى Egemen.kz.
قىلمىستىق توپ مۇشەلەرى ءساتسىز اياقتالعان ارەكەتتەردى ەسەپتەمەگەندە, 13 كۇندە ەكى ادامدى ءولتىرىپ, تاعى ەكەۋىن ۇرىپ-سوعىپ, توناپ كەتكەن.
سوتتالۋشىلار سوت ۇكىمىن ونلاين تىڭدادى. 22-37 جاس ارالىعىنداعى شىمكەنتتىكتەردىڭ قىلمىستىق ارەكەتتەرى وتكەن جىلدىڭ 4 قازانىندا باستالعان. سول كۇنى ولار ەكى تەلەفون مەن اقشا ۇرلاعان. 8 قازاندا قىلمىستىق توپتىڭ ەڭ كىشى مۇشەلەرى نۇرسۇلتان نۇرادينوۆ پەن مەيىرحان كەنجەبەك 23 جاستاعى جۇگىتتىڭ 37 مىڭ تەڭگەسىن ۇرلاپ قانا قويماي, ءولتىرىپ, دەنەسىن ورتەپ جىبەرگەن. بەس كۇننەن كەيىن ولار ءدال سول سحەما بويىنشا 38 جاستاعى ازاماتتى 60 مىڭ تەڭگە ءۇشىن ءولتىرىپ كەتكەن. سوت زالىندا مارقۇمنىڭ اعاسى بولدى.
ء«بىز سوت ۇكىمىمەن كەلىسەمىز, بىراق كىنالى تاراپ اپەللياتسياعا بەرگەن جاعدايدا, ءبىز سوڭىنا دەيىن كۇرەسۋگە دايىنبىز. ولار مەنىڭ اعامدى ءولتىردى. ەندى ونى ەشكىم قايتارا المايدى. ونىڭ ارتىندا ەكى بىردەي بالاسى قالدى», دەيدى مارقۇمنىڭ ءىنىسى اقجىگىت ياسيتوۆ.
قىلمىسكەرلەردىڭ تاعى ەكەۋى احمەتوۆ پەن كۇمىسوۆ كىسى ولتىرۋگە قاتىسپاعانى بەلگىلى بولدى. بىراق تاكسي جۇرگىزۋشىلەرىن توناعان ءدال سولار. سوت ولاردى 10 جانە 11 جىلعا باس بوستاندىعىنان ايىردى.
«2020 جىلدىڭ 11 قازانىندا قىلمىستىق توپ شىمكەنتتەگى د. ءۇيىنىڭ الدىنا كەلەجى. احمەتوۆ پەن كۇمىسوۆ اينالانى قاداعالاپ, ساق بولۋ ءۇشىن كولىكتە قالسا, نۇرادينوۆ پەن كەنجەبەك پىشاقتارمەن قارۋلانىپ, دۋال ارقىلى ۇيگە كىرمەك بولدى. بىراق تەرەزەلەرگە مەتالل تورلار ورناتىلعاندىقتان ىشكە كىرە المادى», دەلىنگەن سوت ۇكىمىندە.
قىلمىسكەرلەردىڭ بارلىعى بۇرىن سوتتى بولعان. وعان قوسا, بارلىق قىلمىستاردى ماس كۇيلەرىندە جاساعان. ولاردىڭ ۇشەۋى جازالارىن توتەنشە قاۋىپسىزدىك كولونيالارىندا وتەيدى.
بوتاگوز امالبەك