ءدال قازىر ەۋروپانىڭ بىرنەشە قالاسىندا قارت قۇرلىقتىڭ ءدۇبىرلى دوداسى ءوتىپ جاتىر. بەس جىل اسىعا كۇتكەن ايتۋلى باسەكەنىڭ ناعىز قىزعان شاعى ەندى كەلدى. كوماندالار شيرەك فينال جولدامالارى ءۇشىن جان الىسىپ-جان بەرىسىپ, جانكۇيەرلەرگە ناعىز فۋتبول سىيلاپ جاتىر دەسەك, ارتىق ايتقاندىق ەمەس. قازىردىڭ وزىندە كەلەسى كەزەڭگە وتكەن بىرنەشە كوماندا بەلگىلى. سونىڭ ىشىندە دانياعا ەرەكشە توقتالعان ءجون.
نەگە دەيسىز بە؟ سەبەبى مىنادا. وسىدان بەس جىل بۇرىن دانيا فيفا رەيتينگىندە 42-ورىندا تۇرعان. ال ۋەفا كوەففيتسيەنتىندە ەل بىرىنشىلىگى 24-ساتىعا جايعاسقان بولاتىن. بەس جىل ىشىندە ۇلتتىق قۇراما رەيتينگتەگى توپ-10 كوماندانىڭ قاتارىنا ەندى. دانيا چەمپيوناتى دا 12-ورىنعا كوتەرىلدى. ءتىپتى قارجىلىق تۇرعىدان دا ەلدەگى كلۋبتار قيىنشىلىق كورىپ وتىرعان جوق. ماسەلەن, 2018-2019 جىلدارى ەڭ تابىستى ون كلۋبتىڭ جارتىسى وسى دانيالىقتار ەدى. وسىنشالىقتى قىسقا مەرزىم ىشىندە اۋىز تولتىرىپ ايتارلىقتاي جەتىستىككە جەتۋدىڭ سىرى نەدە؟ مۇنىڭ باستى سەبەبى – مەملەكەتتىڭ سپورتقا قاتىستى ۇستانعان ساياساتىندا جاتىر. ەل بيلىگى كاسىبي سپورتقا قارجى مۇلدەم قۇيعان ەمەس. ونىڭ ورنىنا بۇقارالىق سپورتتى دامىتۋعا كوڭىل بولەدى.مىسالى, دانيادا سپورت مينيسترلىگى دەگەن اتىمەن جوق. بۇل سالاعا باقىلاۋ جاساۋ مادەنيەت مينيسترلىگىنە بەرىلسە, بۇقارالىق سپورتتى دامىتۋ – جەرگىلىكتى بيلىكتىڭ مىندەتىندە. ونىڭ وزىندە ءار اۋدان, قالانىڭ اكىمشىلىكتەرى تەك اۋەسقوي سپورتشىلاردى قولداۋعا عانا كوڭىل بولەدى. ستاديوندار, جاتتىعۋ زالدارىن سالىپ, تۇرعىنداردىڭ دەنە شىنىقتىرۋىمەن اينالىسۋىنا بارىنشا جاعداي جاساعان. كاسىبي سپورتشىلار مەن كلۋبتار ءوز كۇندەرىن وزدەرى كورۋى ءتيىس. مىسالى, دانياداعى فۋتبول كلۋبتارىنىڭ ءبارى بيۋدجەتتەن ءبىر تيىن قارجى المايدى. كەرىسىنشە, «كوپەنگاگەننەن» باسقالارى وزدەرى وينايتىن ستاديوندى مەملەكەتتەن جالعا العان. وعان قوسا, مەملەكەتكە قاتىسى بار زاڭدى تۇلعالاردىڭ كلۋبتارعا دەمەۋشىلىك جاساۋىنا تىيىم سالىنعان. ياعني كاسىبي سپورتقا سالىقتان جينالعان حالىقتىڭ اقشاسىن جۇمساۋعا رۇقسات جوق. دەگەنمەن, دانيا بيلىگى كاسىبي سپورتتى مۇلدەم قولدامايدى دەپ ايتۋ قيىن. مەملەكەت بۇقارالىق سپورتتى دامىتۋعا كۇش سالادى. سولاردىڭ اراسىنان قارا ءۇزىپ شىققانى عانا بۇقارالىق سپورتقا اۋىسادى. قالعانى – كاسىپقوي سپورتتىڭ ەنشىسىندە. سوندىقتان شىعار, دانيا فۋتبول كلۋبتارىنىڭ ەشقاشان مول قاراجات شىعارىپ, شەتەلدەن فۋتبولشى شاقىرىپ جاتقانىن كورمەيسىز. كەرىسىنشە, انگليا, يسپانيا سەكىلدى ەلدەردە ويناۋعا لايىق كاسىبي فۋتبولشىلاردى دايىنداپ شىعارادى. ايتسە دە, كەيىنگى ۋاقىتتا دانيا چەمپيوناتىنا قىزىعۋشىلىق ارتا ءتۇستى. ويتكەنى بەس جىل بۇرىن فۋتبولى دامىماي تۇرعان سوڭ كلۋبتار مەن فەدەراتسيا اقىلداسا كەلە, ەل چەمپيوناتىنىڭ فورماتىن وزگەرتۋگە شەشىم قابىلدايدى. ءسويتىپ, شەتەلدەن اتتاي قالاپ Hypercube كومپانياسىنا ءوتىنىش جاسايدى. ەلدەگى جانكۇيەرلەرمەن, فۋتبول كلۋبتارىنىڭ باسشىلارىمەن, كوماندا باپكەرلەرى مەن كاپيتاندارىمەن كەزدەسكەن كومپانيا وكىلدەرى دانيا نارىعىن زەرتتەي كەلە, بىرەگەي چەمپيونات فورماتىن ۇسىنعان ەكەن. سوعان سايكەس ەل بىرىنشىلىگىندەگى كوماندالار سانى 12-دەن 14-كە دەيىن ۇلعايادى. سونىمەن قاتار نەگىزگى اينالىم اياقتالعان سوڭ كلۋبتار توپقا ءبولىنىپ, چەمپيوندار ليگاسى مەن ەۋروپا ليگاسىنا بەرىلەتىن جولداماعا تالاسادى. دانيا چەمپيوناتىنداعى تاعى ءبىر ەرەكشەلىك مىنادا. كوماندالار تەلەكورسەتىلىمنەن تۇسكەن قاراجاتتى تۋرنير كەستەسىندەگى ورنىنا سايكەس ءبولىپ الادى. ياعني جوعارى تۇرعانى كوبىرەك قارجىنى قالتاسىنا باسادى. وسىنداي ەرەكشەلىكتەردىڭ ناتيجەسىندە ەل بىرىنشىلىگى شەتەلدىك ينۆەستورلاردىڭ قىزىعۋشىلىعىن ارتتىردى. قازىرگى تاڭدا دانياداعى 24 كلۋبتىڭ 9-ىنىڭ يەلەرى –شەتەلدىكتەر. بىلاي قاراساڭىز, دانيا – 6 ميلليونداي تۇرعىنى بار شاعىن مەملەكەت. سويتە تۇرا فۋتبولى قارىشتاپ دامىپ, بۇگىندە ەۋروپا چەمپيوناتىنىڭ شيرەك فينالىنا جولداما الىپ وتىر. وسىندايدا, كلۋبتارىنا ميللياردتاعان تەڭگە قارجى شاشىپ, بالىقشىلاردان ۇتىلىپ جۇرگەن قازاقستاندىق كومانداعا قاراپ قارنىڭ اشادى...