قايدان بىلگەنبىز؟! وسى ۋاقىتقا دەيىن ەلىمىزدەگى ەڭ بيىك سارقىراما جوڭعار الاتاۋىنداعى بۇرحان بۇلاق, التايداعى كوككول ەكەن دەپ جۇرسەك, ودان دا بيىگى بار ەكەن عوي. كونەكوزدەر ايتپاقشى, ءور التايدىڭ بۇككەن سىرى كوپ. انەۋگۇنى تاۋ كەزبە فوتوگراف ەۆگەني دوماشەۆ تىكۇشاقپەن مۇزتاۋعا قاراي ۇشىپ بارا جاتىپ, جاقپار تاستى شىڭنان قۇلاي اققان بيىك سارقىرامانى سۋرەتكە تارتىپتى.
ەۆگەني دوماشەۆ التايدىڭ تۇمسا تابيعاتىن فوتوعا تۇسىرۋمەن ونداعان جىلدان بەرى اينالىسادى. مۇزتاۋعا دەيىنگى جولدىڭ سوقپاعىن بەس ساۋساعىنداي بىلەدى. جو-جوق, التاي – جۇمباق. ءار بارعان سايىن تاڭعالدىرادى, ءار بارعان سايىن وزىنە عاشىق ەتەدى. بەس ساۋساعىنداي بىلەدى دەگەنىم, جالعانداۋ. شىعىستىڭ بۇل پۇشپاعىنداعى تىلسىم مەكەندەردى رەريحتەردىڭ ءوزى تولىقتاي اشا المادى-اۋ دەيمىن. ايتپەسە ە.دوماشەۆ تۇسىرگەن سارقىرامانى تاريحي جازبالاردان كوزىمىز شالار ەدى عوي. مۇمكىن كەيىن پايدا بولدى ما؟– مۇزتاۋدى تىكۇشاقپەن بەتكە الدىق. زەڭگىر كوكتە ەمەس, تاۋ-تاۋدىڭ اراسىمەن ۇشتىق. ءار ءساتتى سۋرەتكە تارتۋعا تىرىستىم. ءبىر كەزدە قارسى الدىمىزداعى بيىكتەن قۇلاي اققان سارقىرامانى كوزىم شالدى. التايدىڭ قويىن-قولاتىن قانشا ارالاسام دا, بۇل كورىنىستى ءبىرىنشى رەت كوردىم. عاجاپ! كەيىن 50 000 ماسشتابتاعى رەلەفتى كارتادان سۋدىڭ قۇلاۋ بيىكتىگىن ەسەپتەسەم, 292 مەتر ەكەن. ويلاڭىز, 300 مەترگە تاياۋ, – دەپ تاڭعالادى فوتوگراف ەۆگەني دوماشەۆ. فوتوگرافتىڭ ايتقان سارقىراماسى سوناۋ مۇزتاۋدىڭ مۇزدىقتارىنان باستالىپ, اقبۇلقاق وزەنىنە قۇياتىن كورىنەدى. ناقتى اقپارات ايتۋ ءۇشىن ادام اياعى باسپاعان بۇل ماڭعا زەرتتەۋشىلەر ات ءىزىن سالۋى كەرەك شىعار. ەڭ باستىسى, ۇلكەن جاڭالىق اشىلدى. ەندىگى كەزەكتە ارنايى ماماندار نازار اۋدارىپ, زەرتتەۋى كەرەك.
شىعىس قازاقستان وبلىسى