مودۋلدىك پوليتسيا بەكەتتەرى – «جۇرتقا جاقىن پوليتسيا» قاعيداتى بويىنشا ىسكە قوسىلعان رەفورمالاردىڭ ناقتى ءبىر كورىنىسى. جىل باسىنان بەرى وبلىس ورتالىقتارىندا بوي كوتەرىپ, تاۋلىك بويى جۇمىس ىستەۋدى باستاپ كەتكەن ستاتسيونارلىق بەكەتتەر ەل پرەزيدەنتىنىڭ جولداۋىنداعى «حالىق ۇنىنە قۇلاق اساتىن مەملەكەت» تۇجىرىمداماسىنان تۋىنداعان ىرگەلى باستاما بولىپ سانالادى.
ستاتسيونارلىق مودۋلدىك پوليتسيا بەكەتتەرىنىڭ جۇمىسى تۋرالى ءىىم-دە وتكەن بريفينگتە تولىعىراق ماعلۇمات بەرگەن اكىمشىلىك پوليتسيا كوميتەتى توراعاسىنىڭ ورىنباسارى سەرىك ءتۇسىپوۆ سوڭعى ەكى جىلدا ەل كولەمىندە 60-قا جۋىق مودۋلدىك بەكەت ورناتىلعانىن مالىمدەدى. وسى جىلدىڭ سوڭىنا دەيىن تاعى 36 بەكەت ورناتۋ جوسپارلانسا, قازىرگى تاڭدا ونىڭ 5-ءۋى – اقتوبە, 2-ءۋى – سولتۇستىك قازاقستان جانە تاعى 2-ءۋى تۇركىستان وبلىستارىندا اشىلعان.«ستاتسيونارلىق پوليتسيا بەكەتتەرى قۇقىق بۇزۋشىلىقتار مەن قىلمىستىڭ الدىن الۋعا باعىتتالعان پاترۋلدىك-بەكەتتىك قىزمەت اتقارۋدىڭ نەگىزگى نىسانى بولىپ سانالادى. بەكەتتەر سانىن كوبەيتۋدەگى باستى ماقسات – حالىق كوپ جينالاتىن قوعامدىق ورىندار مەن كريمينوگەندىك ۋچاسكەلەردە, سونداي-اق قۇقىق بۇزۋشىلىق ءجيى تىركەلەتىن اۋماقتاردا پوليتسيا قىزمەتكەرلەرىنىڭ تۇراقتى بولۋىن قامتاماسىز ەتۋ, سونداي-اق قوعامدىق ءتارتىپتىڭ جاي-كۇيىن تىكەلەي قاداعالاۋ جانە ازاماتتاردىڭ وتىنىشتەرى بويىنشا شارالاردى جەدەل قابىلداۋدى ۇيىمداستىرۋ», دەيدى كوميتەت وكىلى.زاماناۋي مودۋلدىك بەكەتتەردە قىزمەت اتقارۋ مەن ازاماتتاردى قابىلداۋ ءۇشىن قاجەتتى بارلىق جاعداي جاسالعان. اتاپ ايتقاندا, بەكەت بەينەباقىلاۋ, جارىقتاندىرۋ, جىلىتۋ, جەلدەتۋ, سۋ قۇبىرى, سانيتاريالىق تورابى بار كارىز جۇيەلەرىمەن, ءورت-كۇزەت سيگنالداندىرۋىمەن, دەربەس كومپيۋتەرمەن جانە باسقا دا قاجەتتى قۇرالدارمەن تولىقتاي جابدىقتالعان. بۇدان بولەك, بەكەتتەردە پوليتسيا قىزمەتكەرلەرى بولماعان جاعدايدا ازاماتتاردىڭ ءىىو بولىمشەلەرىنىڭ كەزەكشى بولىمدەرىنە حابارلاسۋىنا ارنالعان «شاقىرۋ دوموفونى» جۇيەسى ورناتىلعان.پوليتسيا قىزمەتكەرلەرى بەكەتتەردە اپتا بويى, تاۋلىگىنە 24 ساعات قىزمەت اتقارادى. بەكەتتە كۇندىز ۋچاسكەلىك پوليتسيا ينسپەكتورى, كەشكە پاترۋلدىك پوليتسيا قىزمەتكەرلەرى بولادى. العاشقىلارى حالىققا ىڭعايلى بولۋ ءۇشىن قۇقىق بۇزۋشىلىقتار تۋرالى وتىنىشتەردى قابىلداسا, پاترۋلدىك جاساق بەكەتكە ىرگەلەس اۋماقتاردا كوشەلەر مەن قوعامدىق ورىنداردى پاترۋلدەۋدى ۇيىمداستىرادى.Nur Otan پارتياسىنىڭ سايلاۋالدى باعدارلاماسىن ورىنداۋ جونىندەگى جول كارتاسىنا سايكەس ءىىم جەرگىلىكتى اتقارۋشى ورگاندارمەن بىرگە الداعى بەس جىل ىشىندە وڭىرلەردە 176 مودۋلدىك بەكەت ورناتۋدى جوسپارعا ەنگىزگەن. ال قازىرگى تاڭدا رەسپۋبليكالىق ماڭىزداعى ءۇش قالادا 64 مودۋلدىك بەكەت جۇمىس ىستەپ تۇر. ونىڭ 41-ءى الماتى قالاسىندا ورناتىلعان.س.ءتۇسىپوۆتىڭ ايتۋىنشا, قىلمىس ستاتيستيكاسى جاياۋ پاترۋلدەۋدى بىرىكتىرەتىن ستاتسيونارلىق بەكەتتەردىڭ وڭىرلەردەگى قوعامدىق ءتارتىپ پەن قاۋىپسىزدىك دەڭگەيىنە وڭ اسەرىن تيگىزگەنىن كورسەتكەن.