كوروناۆيرۋس پاندەمياسى ءالى دە كۇشىندە. اسىرەسە, ءۇندىستاننان تابىلعان جاڭا مۋتاتسيا – «دەلتا» الەمدى ابىگەرگە سالاتىن ءتۇرى بار. قازىردىڭ وزىندە اتالعان شتامم شارتاراپتىڭ بىرقاتار ەلىنەن تابىلىپ ۇلگەردى. دەگەنمەن ۆاكتسينا سالدىرۋ بويىنشا الدا تۇرعان ەلدەردەگى ەپيدەميالىق احۋال تۇزەلىپ كەلەدى. سوعان بايلانىستى كارانتيندىك شەكتەۋلەر جەڭىلدەتىلىپ جاتىر.
ءۇندىستاننىڭ مادحيا-پرادەش شتاتىندا سovid-19-دىڭ جاڭا مۋتاتسياسى – «دەلتا پليۋس» شتامىنىڭ سالدارىنان العاشقى ناۋقاس قايتىس بولدى. قاتەرلى دەرت ايەل ادامنىڭ ءومىرىن جالماعان. ونىڭ جاسىنا قاتىستى ازىرگە ەشقانداي مالىمەت جوق. تەك ونىڭ جۇبايىنىڭ دا بۇعان دەيىن كوروناۆيرۋس جۇقتىرعانى جانە كەيىنىرەك ۆاكتسينانىڭ ەكى دوزاسىن العانى بەلگىلى.شتات ءمينيسترى ۆيشۆاس سارانگتىڭ ايتۋىنشا, قازىرگى ۋاقىتتا جاڭا شتامدى جۇقتىرعان بەس ادام انىقتالعان. ىندەتتى جۇقتىرعان ازاماتتاردىڭ ىشىندە كوروناۆيرۋس ينفەكتسياسىنا قارسى ەكپەنى تەك قايتىس بولعان ايەل سالدىرماپتى. ۆاكتسينانى العان وزگە ءتورت ادامنىڭ جاعدايى قازىرگى تاڭدا قالىپتى.ال ماحاراشترا جانە كەرالا شتاتتارىندا انىقتالعان «دەلتا پليۋس» مۋتاتسياسى وتە اگرەسسيۆتى ەكەن. ۆيرۋس ادامعا كوزدى اشىپ-جۇمعانشا جۇعۋى مۇمكىن. ءۇندىستاننىڭ مەديتسينالىق ۋنيۆەرسيتەتتەرى قاۋىمداستىعىنىڭ باسشىسى رانديپ گۋلەريانىڭ ايتۋىنشا, ۆيرۋستى تاسىمالداۋشى كوشەدە ءوتىپ بارا جاتىپ-اق بىرنەشە ادامنىڭ اۋرۋىنا سەبەپشى بولا الادى. ۇندىستاندىق مۋتاتسيانىڭ جاڭا شتامىنىڭ ءۇش ەرەكشەلىگى بار كورىنەدى. جۇقپالى اۋرۋ تەز تارالادى, وكپە جاسۋشالارىنىڭ رەتسەپتورلارىمەن بايلانىسۋ قابىلەتى جوعارى جانە انتيدەنەلەرگە ءتوزىمدى. «دەلتا پليۋس» شتامىنىڭ ۆاكتسينالارعا قانشالىقتى توتەپ بەرەتىنى ءالى بەلگىسىز. ءۇندىستاننان بولەك, كوروناۆيرۋستىڭ جاڭا شتامىن جۇقتىرۋ وقيعالارى ۇلىبريتانيا, اقش, كانادا, پورتۋگاليا, جاپونيا, نەپال, پولشا, شۆەيتساريا, تۇركيا, رەسەي, بەلارۋس, وزبەكستان سياقتى ەلدەردە تىركەلگەن.وكىنىشكە قاراي, ءۇندىستان تاياۋ ارادا ۆيرۋس جۇقتىرۋ كورسەتكىشى بويىنشا ءبىرىنشى ورىنعا شىعۋى مۇمكىن. قازىرگى تاڭدا ەلدە 30 ميلليوننان استام ادام ناۋقاستانعان. كۇن سايىن شامامەن 40-50 مىڭ ادامنىڭ ينفەكتسيا جۇقتىرعانى انىقتالادى. الەمنىڭ باسقا ەلدەرىندە دە ەپيدەميالىق احۋال ءالى دە كۇردەلى. اۋستراليانىڭ ەڭ ءىرى قالاسىندا ۋاقىتشا كارانتين جاريالاندى. سيدنەيدىڭ ءتورت اۋدانىندا COVID-19-دى جۇقتىرۋ وقيعالارىنىڭ ارتۋىنا بايلانىستى شەكتەۋلەر ەنگىزىلدى. جاڭا وڭتۇستىك ۋەلس شتاتىنىڭ پرەمەر-ءمينيسترى گلەديس بەرەجيكلياننىڭ سوزىنە سۇيەنسەك, كارانتين ءبىر اپتاعا سوزىلۋى مۇمكىن. بۇل اۋداندارعا ازاماتتار تەك قاجەت بولعان جاعدايدا عانا كىرە الادى. جەرگىلىكتى تۇرعىنداردىڭ ۇيدەن تەك ازىق-ت ۇلىك پەن قاجەتتى تاۋارلاردى الۋ ءۇشىن دۇكەنگە, مەديتسينالىق مەكەمەلەرگە, قاشىقتان جۇمىس ىستەۋگە نەمەسە وقۋعا مۇمكىندىك بولماعان جاعدايدا جۇمىس نەمەسە وقۋ ورنىنا شىعۋىنا رۇقسات بەرىلگەن. توپتا تەك 10 ادامعا دەيىن سەرۋەندەي الادى.بانگلادەشتە دۇيسەنبىدەن باستاپ قاتاڭ شەكتەۋ كۇشىنە ەندى. مۇنىڭ باستى سەبەبى – ەلدە ۇندىستاندىق شتامم تەز تارالىپ بارادى. جەرگىلىكتى بيلىك مەملەكەتتىك جانە جەكەمەنشىك جۇمىس ورىندارىن جابۋعا شەشىم شىعاردى. تۇرعىندار ۇيدەن تەك شۇعىل شارۋامەن عانا شىعا الادى. دەنساۋلىق ساقتاۋ دەپارتامەنتىنىڭ مالىمەتىنە سۇيەنسەك, قاۋىپسىزدىكتى ساقتاۋدى قامتاماسىز ەتۋ ءۇشىن پوليتسيا مەن شەكارا قىزمەتكەرلەرى تارتىلادى. قاجەت بولعان جاعدايدا اسكەريلەر دە وسىعان جۇمىلدىرىلۋى ىقتيمال. وزبەكستان استاناسى ەپيدەميالىق جاعدايدىڭ ۋشىعۋىنا بايلانىستى ەكى اپتالىق كارانتينگە جابىلدى. مۇنداي شەشىمدى كوروناۆيرۋسقا قارسى ءىس-قيمىل جونىندەگى ارنايى رەسپۋبليكالىق كوميسسيا قابىلدادى. «28 ماۋسىمنان باستاپ 12 شىلدەگە دەيىن تاشكەنتكە كورشى وبلىستاردان اۆتوكولىك قۇرالدارىمەن (اۆتوموبيلدەر مەن اۆتوبۋستار) كىرۋگە شەكتەۋ قويىلادى. 28 ماۋسىمنان باستاپ بۇكىل ەل بويىنشا بارلىق ويىن-ساۋىق نىساندارى (مەيرامحانالار, تۇنگى كلۋبتار, كاراوكە, بيليارد جانە كومپيۋتەر زالدارى, قوعامدىق تاماقتانۋ ورىندارى ءدامحانالار, اسحانالار مەن شايحانالار) كەستە بويىنشا 8.00-دەن 20.00-گە دەيىن جۇمىس ىستەيدى. ال وسى مەكەمەلەرگە كەلۋشىلەر سانى جالپى كولەمنىڭ 50 پايىزىنان اسپاۋى ءتيىس», دەلىنگەن وزبەكستان رەسپۋبليكاسىنىڭ دەنساۋلىق ساقتاۋ مينيسترلىگىنىڭ حابارلاماسىندا.ايتسە دە, ۆاكتسينا سالدىرۋ كورسەتكىشى جوعارى ەلدەردە قاۋىپتى دەرتكە شالدىققان ناۋقاستار سانى ازايىپ كەلەدى. سوعان بايلانىستى كارانتيندىك شەكتەۋلەر بىرتىندەپ جەڭىلدەتىلىپ جاتىر. ماسەلەن, مىسىر بيلىگى كوروناۆيرۋستىڭ جاڭا شتامدارى تارالماعان ەلدەردەن كەلەتىن تۋريستەرگە مەملەكەتكە كىرۋ تالاپتارىن جەڭىلدەتتى. ولاردان پتر-تەستتىڭ تەرىس ناتيجەسى بار انىقتامالار تالاپ ەتىلمەيدى, بىراق مەيماندار ۆاكتسينا سالدىرۋى ءتيىس. مىسىردىڭ دەنساۋلىق ساقتاۋ مينيسترلىگىنىڭ دەرەكتەرىنە سۇيەنسەك, كەلگەن جولاۋشىلار كوروناۆيرۋسقا قارسى ەكپەنى العانىن راستايتىن كۋالىكتەرىن ۇسىنۋى ءتيىس. سونداي-اق قۇجاتتىڭ QR كودى بولۋى كەرەك.ايتا كەتەرلىگى, سپۋتنيك V, Pfizer, AstraZeneca, Moderna, Sinopharm, Sinovac سەكىلدى دۇنيەجۇزىلىك دەنساۋلىق ساقتاۋ ۇيىمى (ددسۇ) مەن مىسىردىڭ ءدارى-دارمەكتەر باسقارماسى ماقۇلداعان پرەپاراتتاردى سالدىرعاندار عانا ەلگە ەمىن-ەركىن كىرە الادى. بۇل رەتتە ۆاكتسينانىڭ ەكىنشى دوزاسىن قابىلداعاننان كەيىن 14 تاۋلىك ءوتۋى قاجەت. ال ۆاكتسينا الماعان تۋريستەرگە قويىلاتىن تالاپتار وزگەرگەن جوق. 6 جاسقا دەيىنگى بالالاردان باسقا ازاماتتاردىڭ ءبارى پتر زەرتتەۋ ناتيجەسى بار انىقتاما ۇسىنۋى كەرەك. شۆەيتساريادا 26 ماۋسىمدا ەلدە قاشىقتان جۇمىس ىستەۋ رەجىمى, كوشەدە بەتپەردە كيۋ مىندەتى الىنىپ تاستالدى. سونداي-اق ازاماتتار ءوزىنىڭ ەكپە سالدىرعاندىعىن راستايتىن كۋالىك, COVID-19 ينفەكتسياسىنان ساۋىعىپ شىققانى تۋرالى نەمەسە پتر -تەستتىڭ تەرىس ناتيجەسى بار انىقتاما ۇسىنعان جاعدايدا, مەيرامحانالارعا كىرۋىنە رۇقسات ەتىلمەك. شەنگەن ايماعىنداعى باسقا ەلدەردىڭ ازاماتتارى شۆەيتسارياعا كەلگەننەن كەيىن ەندى كارانتينگە جاتۋعا مىندەتتى ەمەس. بىراق ءۇندىستاننان, ۇلىبريتانيادان جانە كوروناۆيرۋستىڭ جاڭا نۇسقالارى قارقىندى تارالىپ جاتقان ەلدەردەن كەلەتىن ازاماتتار ءۇشىن شەكتەۋلەر كۇشىن جويعان جوق.سينگاپۋر تۋريستىك جانە ىسكەرلىك ساپارلاردى تەز ارادا قايتا جانداندىرۋ ماقساتىندا دەنساۋلىق سەرتيفيكاتتارىن ءوزارا مويىنداۋ پەرسپەكتيۆالارىن بىرقاتار ەلمەن تالقىلاۋعا باستاماشىلىق تانىتتى. بۇل تۋرالى رەسپۋبليكانىڭ ءسىم باسشىسى ۆيۆيان بالاكريشنان ء«بىر بەلدەۋ, ءبىر جول» جوباسى اياسىنداعى ازيا – تىنىق مۇحيتى بەينەكونفەرەنتسياسىندا مالىمدەدى.«سينگاپۋر كوپتەگەن سەرىكتەستەرىمەن, سونىڭ ىشىندە قحر-مەن قاۋىپسىز ساپارلار رەجىمىن جەڭىلدەتۋ ءۇشىن دەنساۋلىق سەرتيفيكاتتارىن ءوزارا مويىنداۋ ماسەلەلەرى جونىندەگى كەلىسسوزدەردى جۇرگىزە باستادى», دەدى مينيستر. بالاكريشناننىڭ ايتۋىنا قاراعاندا, مۇنداي شارا پاندەميادان كەيىن الەمدى قايتا قالپىنا كەلتىرۋ ءۇشىن اسا قاجەت.تۇركيا بيلىگى 1 شىلدەدەن باستاپ ەپيدەميالىق جاعدايدىڭ جاقسارۋىنا بايلانىستى كوروناۆيرۋسپەن كۇرەسكە قاتىستى شارالار تاعى دا جەڭىلدەتىلەتىنىن جاريالادى. ىشكى ىستەر مينيسترلىگى تاراتقان نۇسقاۋلىققا سايكەس, الداعى بەيسەنبىدەن باستاپ كومەندانت ساعاتى توقتاتىلىپ, قالاارالىق قاتىناس شەكتەۋلەرى الىنىپ تاستالادى. سونىمەن قاتار اتالعان مەرزىمدە بارلىق جۇمىس ورىندارى اشىلىپ, پاندەمياعا بايلانىستى قىزمەتىن توقتاتقان كينوتەاترلار قايتا جۇمىس ىستەي باستايدى. ءدامحانا مەن مەيرامحانالار كەلۋشى سانىن شەكتەمەي, عيمارات ىشىندە جانە دالادا قىزمەت كورسەتە باستايدى. بۇدان بولەك 1 شىلدەدە ۇيلەنۋ تويى اشىق جەردە قوناق سانىن شەكتەمەستەن وتكىزىلەدى. كونتسەرت جانە فەستيۆال وتكىزۋگە بۇعان دەيىن بەلگىلەنگەن ساقتىق شارالارى بۇزىلماسا, رۇقسات بەرىلەدى. ساياباق, دالاداعى سەرۋەن ورىندارى مەن كەمپينگتەر دە اشىق بولادى. كوروناۆيرۋس كولىك كومپانيالارى كىرىسىنىڭ ازايۋىنا سەبەپ بولدى. گەرمانيا فەدەرالدى ۇكىمەتى كوروناۆيرۋستىق داعدارىسقا بايلانىستى زارداپ شەككەن قوعامدىق كولىك كاسىپورىندارىنا قوسىمشا 1 ملرد ەۋرو مولشەرىندە قاراجات بولمەك. 2020 جىلى گەرمانيا ۇكىمەتى جولاۋشىلار تاپشىلىعىنا بايلانىستى قيىندىققا ۇشىراعان مۋنيتسيپالدىق جانە ايماقتىق كولىك قاجەتتىلىكتەرىنە 2,5 ملرد ەۋرو بولگەن ەدى.