تۇركىستان وبلىسىنداعى «سايرام-وگەم» شاتقالىندا ءىز-ءتۇزسىز جوعالىپ, مايىتتەرى تابىلعان ءتورت ءتۋريستىڭ ولىمىنە قاتىستى العاشقى بولجامدار ايتىلدى, دەپ حابارلايدى Egemen.kz.
ولاردى 28 كۇن بويى ىزدەستىرگەن ءوڭىردىڭ قۇتقارۋشىلارى مايىتتەردىڭ بارلىعى وگەم وزەنىنەن شىققانىن جەتكىزدى.
وبلىستىق تجد باستىعىنىڭ ورىنباسارى ەرىك سارىباەۆتىڭ ايتۋىنشا, جاياۋ جۇرىسپەن 2543 شاقىرىم قارالسا, اۋەدە تىكۇشاقپەن 16090 شاقىرىم اۋماقتا ىزدەستىرۋ شارالارى جۇرگىزىلگەن. سۇڭگۋىرلەر وگەم وزەنىنىڭ بويىمەن 22 شاقىرىم جەردى قاراپ شىققان. ناتيجەسىندە ءبىرىنشى جىگىتتىڭ ءمايىتى تابىلعان جەر مەن ەكىنشى ءتۋريستىڭ ءمايىتىنىڭ اراسى 6 شاقىرىمدى قۇراعان. ال, ءۇشىنشى مەن ءتورتىنشى ءمايىتتىڭ اراسى 7 شاقىرىم جەردەن اسقان. قۇتقارۋشىلار العاشقى بولجام رەتىندە تورتەۋى قول ۇستاسىپ, وگەم وزەنىنەن بىرگە وتپەك بولعان كەزدە سۋعا اعىپ كەتۋى مۇمكىن دەيدى. الايدا سۋدىڭ ەكپىنى تىم قاتتى بولعاندىقتان ولاردى اعىسى الىپ كەتۋى مۇمكىن ەكەنىن جوققا شىعارمايدى. ال, ەكىنشى بولجام رەتىندە ولاردىڭ وزەننىڭ تاستار كوپ جاتاتىن جەرى تاسكوپىردەن وتپەك بولعان دەپ ايتىلۋدا. الايدا سۋدا جاتقان تاستاردىڭ بەتى تايعاق بولعاندىقتان ءبىرى اعىپ كەتىپ, قالعاندارى قۇتقارامىز دەپ وقتالعان بولۋى مۇمكىن. ال, ءۇشىنشى بولجام رەتىندە ايۋلاردان قورىققان.
«ىزدەستىرۋ بارىسىندا وسى توڭىرەكتە ايۋلاردى وتە كوپ كەزدەستىردىك. ءبىر جيىرمادان اسا ايۋدى كوردىك. ال ايۋدىڭ وزىنە ءتان قاسيەتى - بالالارى ءۇشىن وتە اگرەسسيۆتى بولاتىن كەز بۇل. مۇمكىن, بۇل جىگىتتەر وزەندى بويلاپ جۇرگەن كەزدە الدارىنان ايۋ شىعىپ قالدى ما. سودان قورىققانىنان سۋعا سەكىرىپ كەتتى مە دەگەن جاعدايلاردى قاراستىردىق», دەيدى ەرىك سارىباەۆ.
ال, ىزدەستىرۋ-قۇتقارۋ جۇمىستارىنا تجم الماتى قالاسىنداعى رجقج-عى, شىمكەنت قالاسى تجد, «قازاۆياقۇتقارۋ» اق, تۇركىستان وبلىسىنىڭ پد, «سايرام-وگەم» مەملەكەتتىك ۇلتتىق تابيعي پاركىنىڭ, ەرىكتىلەر, وزبەكستان رەسپۋبليكاسى تجم, قر ۇقك تولەبي شەكارا قىزمەتى, قر ۇۇ 6506 اسكەري ءبولىمىنىڭ قىزمەتكەرلەرى جۇمىلدىرىلعان.