كەيدە قىرىق جىل بۇرىنعى ەستىگەن ءبىراۋىز ءسوز نەمەسە ءبىر عانا وقيعا ەسىمىزدەن شىقپاي, ەتەگىمىزگە جارماسادى دا جۇرەدى. سەبەبى ءبىزدى ويعا باتىرىپ, قىر سوڭىڭنان قالمايتىن ساتتەردى جاڭعىرتىپ تۇراتىن جايتتار بار. بۇل وقيعالار ءبىزدىڭ تىكەلەي تىرشىلىگىمىزگە قاتىستى ەكەنى داۋسىز.
وسىدان ءبىراز جىل بۇرىن ترانسۇلتتىق كومپانيانىڭ ءباسپاسوز قىزمەتىنە اۋىسقان ءبىر جۋرناليست سول كومپانياداعى شەتەلدىك ارىپتەستەرىمەن بىرگە الماتىعا ۇشىپ كەلگەندە اۋەجايدا ورىن العان كەلەڭسىز ءبىر جاعدايدى جانى كۇيزەلىپ جازىپ ەدى. ۇشاق كەشىككەندىكتەن, جولاۋشىلاردى كۇتىپ العان ادام كولىگىمەن اۋەجاي تۇراعىندا ءبىراز تۇرىپ قالادى. شلاگباۋمنان شىعاردا سول جەردەگى قىزمەتكەرلەر جۇرگىزۋشىدەن تەرمينالعا تولەنۋگە ءتيىس اقىنى تولەمەي-اق وزدەرىنە 200 تەڭگە بەرىپ ءوتىپ كەتۋگە بولاتىنىن بىلدىرەدى. بۇل وقيعا شەتەلدىكتەردى دە, ءبىزدىڭ ارىپتەسىمىزدى دە تاڭعالدىرعانى بەلگىلى. ويتكەنى زاڭدى كاسسانى اينالىپ ءوتۋ – باسقا ەشبىر ەلدىڭ ميىنا كىرىپ-شىقپايتىن جاعداي.
وسى كۇندەرى اقتوبە قالاسىنىڭ جۇرگىزۋشىلەرى قوعامدىق كولىكتەردە جولاقىسىن قولما-قول اقشامەن تولەۋ ءتارتىبى جويىلعاننان كەيىن, جۇمىسقا دەگەن ىنتاسى بىردەن ازايىپ, قالادا حاوس پايدا بولعانى تۋرالى وڭىرلىك باق-تار جازىپ جاتىر. ونسىز دا بۇل وڭىردە مارشرۋتتىق اۆتوبۋستار مەن جۇرگىزۋشىلەر جەتىسپەۋشىلىگى بار. قۇزىرلى مەكەمەلەر بۇل ماسەلەگە شوپىرلاردىڭ جاسىرىن تابىس كوزىنەن ايىرىلۋى سەبەپشى بولىپ وتىرعانىن جاسىرمايدى.
ءبىزدى ۇشپاققا ەشقاشان شىعارمايتىن كولدەنەڭ تابىس جولدارىنا, كولەڭكەلى ەكونوميكاعا دا مۇرىندىق بولىپ وتىرعان دا جانە ونىڭ زاردابىن شەگىپ جاتقاندار دا – ءوزىمىز. ۇيىنە, جۇمىسىنا جەتە الماي جۇرگەن دە – سول ءوزىمىز. قالالىقتاردىڭ مۇشكىل ءحالىن پايدالانىپ قالۋعا جانتالاسىپ جاتقان دا – ءوز تاكسيستەرىمىز.
ال قوعامدىق كولىك جۇرگىزۋشىلەرى جولاقىسىن كارتامەن تولەۋگە كوشۋ وزدەرىنە ءتيىمدى ەمەس ەكەنىن اشىقتان اشىق مالىمدەگەن. شىندىعىنا كەلسەك, جۇرگىزۋشىلەردىڭ مۇنداي «ەرەۋىلى» الماتىدا دا بولعانى ەسىمىزدە. بىراق وسىنىڭ بارىنە قاراماستان, ءبىز جاقسى ءومىر سۇرگىمىز, دامىعان ەلدە تۇرعىمىز كەلەدى.
جالپى, اقتوبە قالاسىنداعىداي جاعداي وڭتۇستىكتى دە اينالىپ وتپەدى. ەلەكتروندى تولەم كارتالارى ەنگىزىلەتىن كەزدە شىمكەنت قالاسىنىڭ جۇرگىزۋشىلەرى دە ءبىراز بۇلقىندى. جاقىندا الەۋمەتتىك جەلىدە ءبىر قولدانۋشى مىناداي جازبا قالدىرىپتى:
«اعايىن-تۋىسى كوپ قازاق ەمەسپىز بە, وسىدان ءتورت جىل بۇرىن قايىنسىڭلىمنىڭ كۇيەۋى اۆتوبۋسقا كوندۋكتور بولىپ جۇمىسقا كىرىپ ەدى. كولىك جەكەمەنشىك بولعان سوڭ, كەلىسىم بويىنشا كۇندىك ەڭبەكاقىسى 1 200 تەڭگە ەكەن. بىراق ءبىزدىڭ قىز 1 200 تەڭگە دەگەنى دۇشپان كوز ەكەنىن, كۇيەۋىنىڭ كۇندە كەشكە 5 مىڭ الىپ كەلەتىنىن ايتاتىن. مەيلى, ءتورت بالانىڭ نەسىبەسىنە سولاي بۇيىرتسا, امال نەشىك, «ەبىن تاۋىپ ەكى اسا» دەگەن ءسوز بوسقا ايتىلماعان. كۇيەۋ بالا ءوزى كوندۋكتور بولعاسىن بۇكىل باۋىرلارىن وسى جۇمىسقا تارتتى. ءالى ىستەپ كەلەدى. بۇگىن تاڭەرتەڭ جۇمىسقا كەلسەم, اۆتوبۋس جۇرگىزۋشىلەرى باس كوتەرىپتى دەگەندى ەستىدىم. دەرەۋ بالالارىما قوڭىراۋ سوعىپ قاتىنايتىن كولىكتىڭ جوقتىعىن ايتىپ, كۋرسقا بارماي-اق قويىڭدار دەدىم. ال جۇرگىزۋشىلەر نارازىلىعىنا كەلسەك, 150 مىڭ تەڭگە ايلىقتى 300 مىڭعا دەيىن كوتەرۋىن تالاپ ەتىپ, «شىمكەنت بۋس» اۆتوپاركىنىڭ اۆتوبۋستارى جۇمىسقا شىقپادى. نەگىزى, بۇرىننان قۇجات بويىنشا سولاي بوپ كەلگەن».
ءسويتىپ قوسىمشا تابىستان ايىرىلعان جۇرگىزۋشىلەر مەن كوندۋكتورلار ۆاليداتوردىڭ ىستەن شىققانىن ايتىپ, اقشانى قولما-قول الۋدى تىيا قويماعان. سودان كەيىن قالا اكىمىنىڭ تاپسىرماسى بويىنشا جولاقىسىن تولەۋگە جاڭا ءتارتىپ ەنگىزىلدى: ەگەر قوعامدىق كولىكتە ۆاليداتور ىستەن شىقسا, جولاۋشى تەگىن جۇرەدى. بۇعان كارتا قولداناتىن جولاۋشىلار قۋانعانىمەن, جۇرگىزۋشىلەر مەن كوندۋكتورلارعا ۇناماعان كورىنەدى.
وسى جۋىردا الماتىنىڭ ەڭ ادەمى شاتقالدارىنىڭ ءبىرى المااراسانعا جول تارتتىق. دەمالىس كۇندەرى كارانتيندىك شەكتەۋلەرىنەن مەزى بولعان, بۇرىنعىداي شەتەلدەرگە ساياحاتتاپ كەتە المايتىن الماتىلىقتاردىڭ بارلىعى تاۋعا ۇدەرە كوشىپ جاتقانداي اسەر قالدىرادى. تاۋعا قاراي اعىلعان كولىكتەردە ەسەپ جوق. ەكولوگيالىق بەكەت ورنالاسقان شلاگباۋمدا تۇرعان قىزمەتكەرلەر قولما-قول اقشانى شىتىرلاتىپ ساناپ الىپ جاتىر. تۇبىرتەك جوق. بۇل قالاي دەپ, ءار كولىككە, ادام باسىنا تاريف بويىنشا تولەپ, تۋريزمگە ۇلەسىن قوسىپ جاتقان پەندە دە جوق.
بىراق ءبىز ءوزىمىزدى ءوزىمىز توناپ جۇرسەك تە, الەۋمەتتىك ماسەلەلەرى شەشىلگەن, بايىعان مەملەكەتتە تۇرعىمىز كەلەدى.