شارىن شاتقالى

بەلگىلى سۋرەتشى اندرەي ءلا­تىنيننىڭ «شارىن. قامال­دار جازىعى» كارتيناسى ءبىزدى شا­رىن شاتقالىنا قايتا سا­پارلاعانداي كۇيگە بولەدى. مۋ­زەيدە ورنالاسقان بۇل جا­دى­گەردى شەت­ەلدەن ساياحاتتاپ كەلگەن قو­ناقتار تاڭدانا دا, تاڭىر­قاي دا قاراي­تىنى كوپكە ءمالىم. كوركەم كارتيناعا قازاق دالاسىنىڭ بار­لىق بولمىسى سىڭگەندەي.

اقش-تاعى گراند-كانون تۋرالى ءبارى بىلەدى, بىراق سو­عان ۇقساس تابيعي جاراتىلىستى قا­زاق­­ستاننان دا كورۋگە بولاتىنىن ءبىرى بىلسە, ءبىرى بىل­مەسى حاق. ال­ما­تى قالاسىنان 200 شاقىرىم قا­شىقتىقتا ور­نالاسقان قۇتتى مەكەندى امە­ري­كالىق شاتقالدىڭ ء«ىنىسى» دەپ تە اتايدى. جەتىسۋدىڭ ور­تا بولىگىندە مىڭجىلدىقتار جۇم­باعىن ىشىنە بۇگىپ داڭقى الىستى شارلاعان شارىننىڭ جاس-شاماسىن ناقتى اتاپ بەر­گەن ەشكىم جوق. شوكپەلى جى­نىستاردان قۇرالعان تابيعي ەسكەرت­كىشتىڭ جاسى شامامەن 12 ميلليون جىلعا بارادى. جاسىل جازىقتىڭ ورتاسىنان اشىلعان جۇمىرتقاداي پايدا بولعان قىزعىلت ايلاق.

كارتينا رەاليزم ستيلىمەن تاۋ پەيزاجى جانرىندا مايلى بوياۋمەن جازىلعان. سۋرەتشى شاتقالداردىڭ اربىرىنە ەرەكشە ءمان بەرۋگە تىرىسقان. ار­قايسىسىنا جەكە-جەكە ما­عىنا بەرىپ, كەنەپ بەتىن ءتۇرلى رەڭككە تولتىرعان.

ءبىزدىڭ كوز الدىمىزدا عا­جايىپ تاۋ سىلەمدەرى, ۋاقىت پەن جەل تىلىمدەگەن جارتاس­تار, بەيمالىم ۇڭگىرلەر, قۋاڭ دالا جانە بۇلتتى كوگىلدىر اس­پان استىندا وسىلاردىڭ ارا­­سىمەن اعىپ جاتقان وزەن كە­­لەدى. سۋرەتشى كوك ءتۇس ار­قىلى كولەڭكەگە باسىمدىق بە­رەدى. بۇل كارتيناعا اسەر بەرىپ, جوسا, قۇم سياقتى جىلى تاۋ تۇس­تەرى مەن شاتقالدىڭ كو­لەڭ­كەلى جاقتارىنىڭ اراسىنا قاراما-قايشىلىق جاسايدى, ءارى شۋاقتى كۇندى ەرەكشە سەزىندىرەدى.

سۋرەتشى تۋىندىسىندا قازاقستان تابيعاتى قۇلا دالاسى دا, ورماندارى دا, شات­قالدارى دا بار سون­شا­لىقتى الۋان ءتۇرلى ءارى سان قىرلى ەكەنىن كورسەتەدى.