ايگىلى امەن قايداروۆتىڭ تۋعان كۇنىندە «قازاقفيلم» كينوستۋدياسى ماڭىزدى وقيعاعا مۇرىندىق بولدى. ۇلتتىق مۋلتيپليكاتسيامىزدىڭ نەگىزىن قالاۋشىنىڭ نەمەرەسى دانيار حاسانوۆ ش.ايمانوۆ اتىنداعى قازاق كينوسىنىڭ مۇراجايىنا اتى اڭىزعا اينالعان اتاسىنىڭ جەكە قۇجاتتارى, بۇيىمدارى مەن مەملەكەتتىك ماراپاتتارىن تاپسىردى. ءىس-شاراعا ءار جىلدارى كينوستۋديادا مەترمەن بىرگە جۇمىس ىستەگەن انيماتسيا ارداگەرلەرى قاتىستى.
– قازاق انيماتسياسىنىڭ جاندانۋى مەن دامۋى امەن قايداروۆتىڭ ەسىمىمەن تىعىز بايلانىستى. امەن ءابجان ۇلىنىڭ ارىپتەستەرى مەن شاكىرتتەرى, سونداي-اق كوپتەگەن جاس كينوگەر ونى ارقاشان ۇلكەن قۇرمەتپەن, جىلى ريزاشىلىقپەن ەسكە الادى. وتباسىلىق مۇرالاردى سىيعا تارتۋ – بۇل تاڭعالارلىق يگى ءىس. سوندىقتان مەن امەن ءابجان ۇلىنىڭ وتباسىنا ۇلكەن العىسىمدى بىلدىرەمىن. قازاق كينوسى مۇراجايىنىڭ قورىن تولىقتىرا الاتىن باسقا كينو قايراتكەرلەرىنىڭ تۋىستارى مەن جاقىندارىنا ءسىزدى ۇلگى ەتكىم كەلەدى. ءبىزدىڭ ماقساتىمىز – ۇلتتىق كينەماتوگرافقا بايلانىستى باعا جەتپەس مۇراعاتتىق ەكسپوناتتاردى, ونىڭ بىرەگەي تاريحىن ساقتاۋ, – دەدى ۆيتسە-پرەزيدەنت ايدارحان ادىلباەۆ.
– امەن ءابجان ۇلىنىڭ ەسىمىن ارداقتاعاندارىڭىزعا مىڭ العىس! ول كينوستۋديانى وتە جاقسى كورەتىن جانە قازاق انيماتسياسىمەن بايلانىستى بارلىق دۇنيە «قازاقفيلمگە» تيەسىلى ەكەنىن ءجيى ايتاتىن, سوندىقتان دا وتباسىمىزبەن ونىڭ زاتتارىن كينوستۋديا جانىنداعى قازاق كينوسى مۇراجايىنا بەرۋگە شەشىم قابىلدادىق. بۇل وسكەلەڭ ۇرپاقتى تاربيەلەۋ ءۇشىن دە وتە ماڭىزدى, – دەدى نەمەرەسى دانيار حاسانوۆ.
سونداي-اق مۇراجايعا امەن ءابجان ۇلىنىڭ قىلقالامىنان شىققان كارىم قايداروۆتىڭ ء(ا.قايداروۆتىڭ ۇلى) پورترەتى تاپسىرىلدى.
كوزكورگەندەر 1948 جىلى ستۋدەنت كەزىندە تانىسقان امەن مەن ۆالەنتينا قايداروۆتاردىڭ ماحاببات حيكاياسىنا قانىق بولسا كەرەك. ۇلتتىق ستۋدياعا امەن ءابجان ۇلىنىڭ جۇبايى – ۆالەنتينا قايداروۆانىڭ مەدالدارى مەن قۇجاتتارى تۇراقتى ساقتاۋعا بەرىلدى. ارىپتەستەرى ۆالەنتينا كونستانتينوۆنا امەن ءابجان ۇلى ءۇشىن ەڭ ۇلكەن ماحاببات پەن ادال دوس قانا ەمەس, سونىمەن بىرگە جانقيارلىق كومەكشى, ارينە سوسىن مۋزاسى بولعانىن ەسكە الدى.
امەن قايداروۆ الماتى كوركەمسۋرەت ۋچيليششەسىندە, ۆالەنتينا كونستانتينوۆنا قازمۋ-ءدىڭ فيلولوگيا فاكۋلتەتىندە وقيدى. ولاردى امەن ءابجان ۇلىنىڭ اپاسى – رايحان تانىستىرادى. ءۇش جىلدان كەيىن ولار وتاۋ قۇرىپ, انيماتور قايتىس بولعانعا دەيىن 60 جىلدان استام ۋاقىت بىرگە ءومىر سۇرەدى.
الماتى