بۇگىن, 11 ماۋسىمعا قاراعان ءتۇنى قازاقستاندىق ارالاس جەكپە-جەك شەبەرى ارمان «سۇڭقار» وسپانوۆ (11-3) امەريكالىق Professional Fighters League پروموۋشەنىندەگى ءبىرىنشى ايقاسىن وتكىزەدى, دەپ حابارلايدى Egemen.kz Vesti.kz سايتىنا سىلتەمە جاساپ.
اتلانتيك-سيتي قالاسىندا وتەتىن PFL 4 تۋرنيرىندە ارماننىڭ قارسىلاسى كريس ۋەيد (18-6) بولادى. «لونگ-ايلەندتەن شىققان باسكەسەر» لاقاپ اتتى امەريكالىق سپورتشى 2014 پەن 2017 جىلدارى UFC-دە ونەر كورسەتكەن.
ترانسلياتسيانىڭ باستالۋى قازاقستان استاناسىنىڭ ۋاقىتىمەن 05:00.
ەسكە سالايىق, ارمان سوڭعى رەت شارشى الاڭعا ناۋرىزدا شىعىپ, ءبىرىنشى راۋندتا رەسەيلىك راسۋل ميرزاەۆتى (18-3) نوكاۋتقا تۇسىرگەن. ۋەيد بولسا ساۋىردە جۇدىرىقتاسىپ, فرانتسيالىق ەنتوني ءديزيدى (13-4) تورەشىلەر شەشىمىمەن جەگەن.