بۇگىن, 9 ماۋسىمدا الماتى قالاسىنىڭ تۇركسىب اۋدانىندا «لازۋرنىي بەرەگ» تك اۋماعىندا تۇرعىندار ءۇشىن العاشقى ءموبيلدى ەگۋ پۋنكتى اشىلدى, دەپ حابارلايدى Egemen.kz.
تۇركسىب اۋدانىنىڭ اكىمدىگى بۇل ءىستى ودان ءارى جالعاساتىراتىن بولادى. ءموبيلدى ەگۋ پۋنكتتەرى تۇرعىندار كوپ كەلەتىن جانە حالىق تىعىز ورنالاسقان جەرلەردە جۇمىس ىستەيدى.
ب.مايلين كوشەسىندەگى «لازۋرنىي بەرەگ» تك تۇرعىندارىنا ءۇيدىڭ جانىندا كوروناۆيرۋسقا قارسى ۆاكتسينا الۋ مۇمكىندىگى تۋدى. بۇگىن العاشقى بەس ادام ۆاكتسينا سالدىردى.
ءموبيلدى پۋنكتتەگى ۆاكتسينا سالۋ ستاتسيونارداعىداي. ناۋقاستار مىندەتتى تۇردە دارىگەرگە دەيىن تىركەۋدەن وتەدى, سودان كەيىن دارىگەر تەكسەرەدى. سودان سوڭ ەكپە سالىنادى, ۆاكتسينا العان ادام 30 مينۋت مامانداردىڭ باقىلاۋىندا بولادى.
9 ماۋسىمدا جىلجىمالى ەگۋ پۋنكتىندە «جاس قانات» ەمحاناسىنىڭ مەديتسينا قىزمەتكەرلەرى كەزەكشىلىك ەتەدى.
تۇركسىب اۋدانىندا 15 جەردە 25 ەگۋ پۋنكتى ورنالاسقان. وندا قۇرامىندا 159 مەديتسينا قىزمەتكەرى بار 32 مەديتسينالىق بريگادا جۇمىس ىستەيدى.
الماتى قالاسىنىڭ قوعامدىق دەنساۋلىق باسقارماسى 8 ماۋسىمداعى جاعداي بويىنشا قالادا 321 500 ادام ۆاكتسينا الدى دەپ حابارلادى. الماتىدا مەديتسينالىق ۇيىمداردا, مەكتەپتەردە, مادەنيەت, سپورت نىساندارىندا, بازارلار مەن قالانىڭ سوسو-دا 211 ەگۋ پۋنكتى جۇمىس ىستەيدى (250-گە دەيىن ۇلعايتۋ مۇمكىندىگىمەن). 1 257 ادامنان 304 ەكپە بريگادالارى بار.
سونداي-اق قالادا 54 كوشپەلى ەگۋ بريگاداسى جۇمىس ىستەيدى. ولاردىڭ التاۋى – المالى, بەسەۋى – الاتاۋ, تورتەۋى – بوستاندىق, ۇشەۋى – جەتىسۋ اۋدانىندا, ونى – اۋەزوۆ پەن مەدەۋ اۋداندارىندا, سەگىزى – ناۋرىزباي مەن تۇركسىب اۋداندارىندا.