بوليۆيا پارلامەنتىندە ءىىم باسشىسى ەدۋاردو دەل كاستيلونىڭ 2019 جىلعى مەملەكەتتىك توڭكەرىس تۋرالى بايانداماسى كەزىندە دەپۋتاتتار جاپپاي توبەلەسىپ قالدى, دەپ حابارلايدى Egemen.kz.
ءمينيستردىڭ ءسوزى مەن كورسەتىلگەن بەينەماتەريالدار وپپوزيتسيالىق دەپۋتاتتاردىڭ نارازىلىعىن تۋدىردى, ولار شەنەۋنىكپەن كەلىسپەيتىنى تۋرالى ايعايلادى. ءمينيستردى «سوتسياليزمگە قوزعالىس» (MAS) وكىلدەرى قولداپ شىقتى.
Creemos «سەنەمىز» اليانسىنىڭ سەناتورى ەنري مونتەرو مەن MAS-ءتىڭ دەپۋتاتى انتونيو كولكەنىڭ اراسىنداعى ۇرىس توبەلەسكە ۇلاستى. ولاردى بىرنەشە ادام اراشالاۋعا تىرىسادى. الايدا ەكەۋىن اراشالاپ جاتقاندار اراسىندا دا توبەلەس باستالادى: ايەل دەپۋتاتتار تاتيانا انەس پەن ماريا الانوكا ءبىر-ءبىرىنىڭ شاشىنان ۇستاپ, ءوزارا قارسىلىق تانىتادى.
دەرەۋ پارلامەنت سەسسياسى توقتاتىلىپ, مونتەرو مەن كولكە كەيىنىرەك جۋرناليستەردەن كەشىرىم سۇرادى. ال ءىىم باسشىسى قىسقا ۇزىلىستەن كەيىن بايانداماسىن اياقتادى.
ايتا كەتەيىك, بوليۆيانىڭ وپپوزيتسيا وكىلدەرى 2019 جىلعى 20 قازانداعى پرەزيدەنتتىك سايلاۋدا جاپپاي بۇزۋشىلىقتار بولعانىن مالىمدەگەننەن كەيىن, پرەزيدەنت ەۆو مورالەس اسكەري قىسىمنان جانە ەلدەگى نارازىلىقتار كەزىندە لاۋازىمىن بوساتىپ, ەلدەن كەتىپ قالعان. ونىڭ ارتىنان بوليۆيانىڭ بارلىق جوعارعى باسشىلىعى وتستاۆكاعا كەتتى.
بيلىك سەناتتىڭ وپپوزيتسيالىق ۆيتسە-سپيكەرى جانين انەسكە ءوتتى. 2020 جىلعى جاڭا پرەزيدەنتتىك سايلاۋدا مورالەستىڭ جاقتاۋشىسى بولعان سوتسياليست لۋيس ارسە جەڭىسكە جەتتى. انەسكە قاتىستى مەملەكەتتىك توڭكەرىس تۋرالى تەرگەۋ ءىسى اياسىندا تەرروريزم, كوتەرىلىسكە ارانداتۋشىلىق جانە قاستاندىق جاسادى دەگەن ايىپ تاعىلدى.