قاراعاندى اكىمىنىڭ بۇرىنعى ورىنباسارى جاقسىلىق شالابەكوۆ لاۋازىمدىق وكىلەتتىكتەرىن اسىرا پايدالانعانى ءۇشىن كىنالى دەپ تانىلىپ, ءبىر جارىم جىلعا باس بوستاندىعىنان ايىرىلدى, دەپ حابارلايدى Egemen.kz.
بۇگىن قاراعاندى قالاسى قازىبەك بي اۋداندىق سوتى جاقسىلىق شالابەكوۆ پەن كاسىپكەر ەرمەك قاسەنوۆكە قاتىستى ۇكىم شىعاردى. سوتتالۋشىلار قاراعاندى قالاسىنىڭ وڭتۇستىك-باتىس اۋدانىندا ەكى كوپ قاباتتى ءۇيدىڭ قۇرىلىسىنا بولىنگەن 120 ميلليون تەڭگەدەن اسا بيۋدجەت قاراجاتىن جىمقىردى جانە نەگىزسىز جاراتتى دەپ ايىپتالعان.
سوت ايىپتاۋ باپتارىن قايتا سارالاپ, جاقسىلىق شالابەكوۆتى قىزمەت بابىن تەرىس پايدالانعانى ءۇشىن, ال ەرمەك قاسەنوۆتى الاياقتىق جاساعانى ءۇشىن كىنالى دەپ تانىدى. سوت كاسىپكەر ەرمەك قاسەنوۆكە 5 جىلعا شارتتى تۇردە باس بوستاندىعىنان ايىرۋ جازاسىن تاعايىندادى.
«شالابەكوۆ پەن قاسەنوۆ, سونداي-اق باسقا دا تۇلعالار اراسىندا 120 ميلليون تەڭگە بيۋدجەت قاراجاتىن جىمقىرۋ ءۇشىن الدىن الا ءسوز بايلاسۋ بولعانى سوت تەرگەۋى بارىسىندا دالەلدەنبەدى. ايىپتاۋ بولجامدارعا نەگىزدەلگەن. سوندىقتان سوت ايىپتاۋ باپتارىن قايتا سارالادى», دەدى سۋديا سايان اققوجين.
ايتا كەتەيىك, قاراعاندى اكىمىنىڭ بۇرىنعى ورىنباسارى جاقسىلىق شالابەكوۆ 2020 جىلعى قىركۇيەكتە ۇستالعان بولاتىن. ول 2020 جىلعى اقپانىندا اكىمنىڭ ورىنباسارى بولىپ تاعايىندالعان. 2011 جىلدان 2019 جىلعا دەيىن شەنەۋنىك قالالىق قۇرىلىس ءبولىمىن باسقاردى. اكىم ورىنباسارىنىڭ لاۋازىمىندا شالابەكوۆ جەردى پايدالانۋ, قالا قۇرىلىسى, ساۋلەت, تۇرعىن ءۇي جانە جاڭا الەۋمەتتىك نىساندار سالۋ ماسەلەلەرىنە جەتەكشىلىك ەتكەن.