پاكىستاندا پويىزدار سوقتىعىستى

جەرگىلىكتى بيلىكتىڭ حابارلاۋىنشا, جاراقاتتان­عاندار مەن قازا تاپقانداردى ءۇيىندى استىنان شىعارۋ ءالى ءجۇرىپ جاتىر. قۇتقارۋ جۇمىستارىنا تاياۋ ماڭ­داعى اۋىل تۇرعىندارى دا جۇمىلدىرىلعان. اپات ورنىنا قۇتقارۋ جۇمىستارىنا قاتىسۋ ءۇشىن اسكەريلەر دە كەلگەن.

 Millat Express پويىزىنىڭ استىندا جيىرما شاقتى جولاۋشى قالعان. سيندح پروۆينتسياسىنداعى گوتكي اۋدانىنىڭ پوليتسيا شەريفى ۋمار تۋفايلدىڭ ايتۋىنشا, ولاردى قۇتقارۋ ءۇشىن اۋىر تەحنيكا ال­دىرىلماق.

گوتكي كوميسسارىنىڭ ورىنباسارى ۋسمان ابدۋل­لانىڭ سوزىنە سۇيەنسەك, Millat Express رەلستەن شىعىپ كەتىپ, ىلە ونى Sir Syed Express پويىزى كەلىپ سوققان. ازىرگە رەلستەن شىعىپ كەتۋ مەن سوقتىعىسۋعا نە اسەر ەتكەنى بەلگىسىز.

«الدىمىزدا تۇرعان مىندەت – سىنىقتاردىڭ استىندا قالعان جولاۋشىلاردى تەز ارادا قۇتقارۋ», دەيدى ۋ.ابدۋللا. ونىڭ ايتۋىنشا, قازىردىڭ وزىندە 30 ادام قازا تاپقان. تەمىر جول وكىلدەرى ەكى پويىزدا شامامەن مىڭعا جۋىق جولاۋشى بولعانىن ايتىپ وتىر. سونداي-اق امان قالعانداردى ورنالاستىرۋ جۇمىستارى دا ءجۇرىپ جاتىر.

جەرگىلىكتى باق-تىڭ حابارلاۋىنشا, جولاۋشى­لاردىڭ ءبىر بولىگى Millat Express پويىزىمەن ۇيلەنۋ تويىنا بارا جاتقان. بىراق قايتىس بولعاندار مەن جاراقات العانداردىڭ اراسىندا ولاردىڭ بار-جوعى بەلگىسىز.

تەلەديدار كادرلارىندا جاراقات العان جولاۋشىلاردى اۋرۋحانالارعا جەتكىزىپ جاتقان جەدەل جاردەم ماشينالارى كورسەتىلگەن. پاكىستان تەلەارنالارىنىڭ مالىمەتىنشە, اپاتتان كەيىن ءتورت ساعات وتسە دە اۋىر تەحنيكا وقيعا ورنىنا جەتپەگەن.

پاكىستان تەمىرجول قىزمەتى وكىلدەرى تەرگەۋگە تاپسىرىس بەرگەندەرىن جانە قۇتقارۋ جۇمىستارى ءالى جالعاسا بەرەتىنىن ايتتى. جاراقات العان جولاۋ­شى­لاردىڭ كەيبىرەۋلەرى اۋرۋحانادا اۋىر حالدە جاتىر.

پاكىستاندا پويىز اپاتتارى ءجيى كەزدەسەدى. سوعان قاراماستان, بيلىك ەسكىرگەن سيگنال جۇيەسىن جاڭارتۋعا, توزعان تەمىر جولداردى اۋىستىرۋعا كوڭىل بولمەيدى. ماسەلەن, پاكىستاننىڭ وڭتۇستىگىندە 1990 جىلى جولاۋشىلار تولى پويىز جۇك پويىزىنا سوقتىعىسىپ, وسى ەل تاريحىنداعى ەڭ اۋىر تەمىرجول اپاتىندا 210 ادام قازا تاپقان.