اقمولا ءوڭىرى 5 ساۋىردەن باستاپ «قىزىل ايماقتىڭ» قۇرساۋىندا بولدى. سوڭعى تاۋلىكتەردە داۋاسىز دەرتتىڭ بەتى ءبىرشاما قايتۋىنا بايلانىستى ەكى ايدان كەيىن «سارى ايماقتىڭ» ساناتىنا ەندى. سوڭعى تاۋلىكتە زەرتحانالىق جولمەن 75 ادام كوروناۆيرۋس ينفەكتسياسىن جۇقتىرعانى انىقتالعان.
سوڭعى اپتادا COVID-19-دىڭ 613 جاعدايى تىركەلدى. دەمەك بۇرناعى اپتاداعى 928 جاعدايمەن سالىستىرعاندا, ىندەتتىڭ تومەندەگەنىن بايقاۋعا بولادى.
سىرقات شەڭگەلىنە ىلىككەندەرمەن بايلانىستا بولعان 9 ادام – اۋرۋدى تاسىمالداۋشىلار. ءبىر تاۋلىكتە 14 جاسقا دەيىنگى بالالار اراسىندا 10 جاعداي كەزدەسىپ وتىر. جالپى, قاۋىپتى ىندەتتى جۇقتىرۋشىلار اراسىندا بۋراباي اۋدانى مەن كوكشەتاۋ قالاسى ءالى دە كوش باستاۋدا. سوندىقتان وبلىستىق سانيتارلىق-ەپيدەميالىق باقىلاۋ دەپارتامەنتى بارشا اقمولالىقتاردى كارانتين تالاپتارىنا سايكەس, قوعامدىق ورىنداردا الەۋمەتتىك اراقاشىقتىقتى, بەتپەردە رەجىمىن قاتاڭ ساقتاۋعا شاقىرادى. سەبەبى ءوڭىر «سارى ايماققا» وتكەنىمەن, «قىزىل ايماقتاعى» شەكتەۋلەر الىنىپ تاستالۋى ءۇشىن 14 كۇن بويى وبلىستىڭ سانيتارلىق-ەپيدەميالىق احۋالى تۇراقتى بولۋى كەرەك.
قازىر مادەني-كوپشىلىك شارالار مەن جيىن-تويلارعا قاتاڭ تىيىم سالىنعانىنا قاراماستان, كەيبىر ادامدار ەلەي بەرمەيدى. «سارى ايماقتىڭ» ساناتىنا ەنىسىمەن بۇرىنعىشا توي-تومالاق, قۇدالىق, جانازا وتكىزۋ جيىلەپ كەتتى. اۋەل باستا دا قاتەرلى دەرتتىڭ قابىنۋىنا ءوزىمىزدىڭ بەيقامدىعىمىز سەبەپكەر بولىپ ەدى. داۋاسىز دەرتكە دە ادامداردىڭ ەتى ۇيرەنىپ كەتەتىن ءتارىزدى مە, قالاي؟! قاۋىپتى ەسكەرە بەرمەۋدىڭ قاتەرى مول ەكەنىن كوزىمىز كورگەنىمىزبەن, دۇرىستاپ كوڭىل بولمەيتىنىمىز وكىنىشتى-اق. ادامدار كوپ جينالاتىن جيىننىڭ ۆيرۋستىق ينفەكتسيانىڭ تارالۋى مەن ەپيدەميالىق احۋالدىڭ تومەندەۋىنە اكەپ سوقتىرۋى مۇمكىن ەكەنىن ەستەن شىعارىپ الا بەرەمىز.
اقمولا وبلىسى