«ۇلكەن جەتىلىك» (G7) ەلدەرى كوپۇلتتى كورپوراتسيالارعا سالىق سالۋ جونىندەگى تاريحي كەلىسىمگە قول جەتكىزدى. لوندوندا وتكەن كەزدەسۋدە ەكونوميكاسى دامىعان ەلدەردىڭ قارجى مينيسترلەرى حالىقارالىق كورپوراتسيالار تىركەلگەن ەلدەرىندە ەمەس, تابىس تاباتىن ەلدەرىندە سالىق تولەۋى ءتيىس ەكەنىنە كەلىستى.
سونداي-اق ەڭ تومەنگى كورپوراتيۆتىك سالىق 15 پايىز دەڭگەيىندە بولماق. بۇل جەكەلەگەن ەلدەردىڭ سالىق مولشەرلەمەسىن ازايتۋ ارقىلى كورپوراتسيالاردى وزدەرىنە شاقىرۋىن توقتاتۋ ءۇشىن قاجەت.
جاڭا ەرەجەلەر Amazon جانە Google سەكىلدى الپاۋىت كورپوراتسيالارعا قولدانىلادى. ماسەلەن, Microsoft كومپانياسىنىڭ يرلاندياداعى فيليالى بىلتىر 315 ملرد دوللار تابىس تاپتى. الايدا اتالعان ەلدىڭ ۇكىمەتىنە ءبىر تيىن سالىق تولەمەگەن. ويتكەنى كومپانيا بەرمۋد ارالدارىندا تىركەلگەن.
سالىق كەلىسىمى اقش, ۇلىبريتانيا, فرانتسيا, گەرمانيا, كانادا, يتاليا جانە ەو ەلدەرى اراسىندا ورناتىلدى. سالىق جۇيەسىن بىرىزدەندىرۋ تۋرالى كەلىسىمگە كوپ جىل تالقىلاۋدان كەيىن قول جەتكىزىلدى.
قۇجات باسقا ەلدەرگە, سونىڭ ىشىندە «ۇلكەن جيىرمالىق» (G20) ەلدەرىنە قىسىم جاساۋعا قولدانىلۋى مۇمكىن. G20 جيىنى كەلەسى ايدا وتكىزىلەدى.
كوپتەگەن ەلدەردىڭ ۇكىمەتتەرى ترانسۇلتتىق كورپوراتسيالاردى بۇرىننان بەرى سول ەلدە تۇسكەن تابىسىنان سالىق تولەۋگە ماجبۇرلەمەك بولعان. الايدا الپاۋىت كومپانيالار فيليالىن بيزنەس جۇرگىزگەن ەلدە ەمەس, سالىعى از ەلدەردە تىركەپ, تاپقان تابىسىنىڭ بارلىعىن سول جەردە دەكلاراتسيالاعان. بۇل – جاڭا پايدا بولعان پروبلەما ەمەس. بىراق سوڭعى ونجىلدىقتا Google جانە Facebook سياقتى تەحنولوگيالىق الپاۋىتتار قۇرىلعاننان كەيىن وزەكتى بولا ءتۇستى.
دايىنداعان
اباي اسانكەلدى ۇلى,
«Egemen Qazaqstan»