Facebook Inc وتكەن اپتادا اقش-تىڭ بۇرىنعى پرەزيدەنتى دونالد ترامپتىڭ الەۋمەتتىك جەلىدەگى پاراقشاسىن 2023 جىلعا دەيىن بۇعاتتادى. سونداي-اق كومپانيانىڭ ەرەجەلەرىن بۇزعان كەز كەلگەن الەم باسشىسىنا دا وسىنداي شارا قولداناتىنىن ەسكەرتتى.
ەستەرىڭىزدە بولسا, Facebook كومپانياسى 6 قاڭتاردا كاپيتوليگە جاسالعان شابۋىلدان كەيىن زەرتتەۋ جۇرگىزىپ, ترامپ بۇزاقىلىققا شاقىرعانىن العا تارتىپ, ونىڭ اككاۋنتىن ۋاقىتشا وشىرگەن-ءدى. ەندى ەكى جىلعا بۇعاتتاۋعا شەشىم قابىلدادى.
ترامپتىڭ Twitter-گە كىرۋىنە ءبىرجولا تىيىم سالىنعان. كاپيتوليگە جاسالعان شابۋىلدان كەيىن Alphabet كومپانياسى YouTube-كە كىرۋىن ۋاقىتشا شەكتەدى. ترامپ جاقىندا عانا جەكە بلوگ اشقان, بىراق كوپ ۇزاماي ول دا جابىلىپ تاستالدى. ايتسە دە, ول ءوزىنىڭ جەكە پلاتفورماسىن اشۋدى جوسپارلاپ وتىرعانىن مالىمدەدى.
«ترامپ مىرزانىڭ قىزمەتىنەن ۋاقىتشا شەتتەتىلۋىنە سەبەپ بولعان جاعدايلاردىڭ اۋىرلىعىن ەسكەرە وتىرىپ, ونىڭ ارەكەتتەرى ءبىزدىڭ ەرەجەلەرىمىزدىڭ ورەسكەل بۇزىلۋىنا اكەپ سوقتىردى دەپ سانايمىز. بۇل حاتتامالارىمىزعا سايكەس ەڭ جوعارى جازاعا لايىق ارەكەت», دەدى Facebook-ءتىڭ جاھاندىق ماسەلەلەر جونىندەگى باسشىسى نيك كلەگ.
ءوز كەزەگىندە ترامپ بۇل شەشىمدى تسەنزۋرانىڭ ءبىر ءتۇرى جانە سايلاۋشىلارىنا ءتىل تيگىزۋ دەپ سىنادى. وسىلايشا, 2022 جىلعى قاراشادا وتەتىن ارالىق سايلاۋدا ترامپ الەۋمەتتىك جەلىسىز قالماق. دەگەنمەن, كەلەسى پرەزيدەنتتىك سايلاۋدا پاراقشاسىن قايتا اشا الادى.
«Facebook-ءتىڭ شەشىمى – 2020 جىلعى ورەسكەل بۇزىلعان پرەزيدەنتتىك سايلاۋدا بىزگە داۋىس بەرگەن 75 ميلليون ادامدى قورلاۋ. مۇنداي تسەنزۋرا مەن ۇنسىزدىككە جول بەرۋگە بولمايدى. ءبىز جەڭىسكە جەتەمىز. ەلىمىز ەندى مۇنداي قورلىقتى قابىلداي المايدى», دەدى د.ترامپ ءوز مالىمدەمەسىندە.
سونىمەن قاتار ترامپ اقۇي تىزگىنىن قولىنا ۇستاي قالسا, Facebook-ءتىڭ نەگىزىن سالعان مارك تسۋكەربەرگتى «وڭدىرمايتىنىن» ىممەن جەتكىزدى.