قر قارجى نارىعىن رەتتەۋ جانە دامىتۋ اگەنتتىگى قازاقستاندا ليتسەنزيالانباعان كومپانيالاردىڭ ءتىزىمىن جاريالادى, دەپ حابارلايدى Egemen.kz.
وتكەن جىلدان باستاپ, اگەنتتىككە جوعارى كىرىستىلىك كەپىلدىگىنە ۋادە بەرە وتىرىپ, كليەنتتەردىڭ اقشاسىن ينۆەستيتسيالىق ماقساتتار ءۇشىن تارتاتىن ليتسەنزيالانباعان كومپانيالاردىڭ قىزمەتى ماسەلەلەرى بويىنشا 40-تان استام شاعىم مەن ءوتىنىش كەلىپ تۇسكەن.
«وسىنداي كومپانيالار كوپ جاعدايدا وففشورلىق ايماقتاردا تىركەلگەن جانە ولاردىڭ قارجى رەتتەۋشىسىنىڭ قارجى نارىعىنداعى قىزمەتتى جۇزەگە اسىرۋعا ارنالعان ليتسەنزياسى جوق. ولار كليەنتتەرگە كونسۋلتاتسيا بەرۋدى ۇسىنادى جانە ءوز سەرۆيستەرى ارقىلى قاراجاتتى ينۆەستيتسيالاۋ بويىنشا وقىتۋ جۇرگىزەدى. قازاقستان اۋماعىندا اتالعان كومپانيالار نەگىزىنەن قاشىقتان, وكىلدىكتەر مەن فيليالدار, نە سەنىمحات بويىنشا وكىلدەر ارقىلى جۇمىس ىستەيدى», دەلىنگەن حابارلامادا.
اگەنتتىكتىڭ مالىمدەۋىنشە, بۇل ۇيىمداردىڭ جۇمىس ىستەۋ سحەماسى كليەنتكە شەتەل ۆاليۋتاسىمەن جانە وزگە دە قارجى قۇرالدارىمەن وپەراتسيالار جاساۋ ءۇشىن جابىق ينتەرنەت سەرۆيستەرگە جانە ساۋدا پلاتفورمالارىنا قاشىقتان كىرۋ بەرىلەتىنىن بولجايدى. مۇنداي پلاتفورمالاردا كليەنتتەر وزدەرىنىڭ جەكە كابينەتىندە ءوز قاراجاتىنىڭ «ۇلعايۋىن» بايقاۋى مۇمكىن. كليەنت «تاپقان» كىرىسىن الۋعا ارەكەت جاساعان كەزدە, بۇل كومپانيالار اقشانى قايتارعانى ءۇشىن قوسىمشا سىياقى تالاپ ەتە وتىرىپ كليەنتكە ونىڭ اقشاسىن قايتارۋدان جالتارادى, نە قانداي دا ءبىر سەبەپتەرمەن كليەنتتەردىڭ شوتتارىنىڭ نەگىزسىز «كۇشىن جويادى», بۇل دا الاياقتىق ارەكەتتەر بەلگىسىنە يە.
«وسىنداي كومپانيالاردىڭ بانك سالىمدارى بويىنشا سىياقىنىڭ اعىمداعى مولشەرلەمەسىنەن كوپ اساتىن جوعارى پايدانى ۋادە ەتە وتىرىپ, ءوز قىزمەتتەرىن نەگىزىنەن الەۋمەتتىك جەلى ارقىلى اگرەسسيۆتى تۇردە جارناما جاسايتىنىنا نازار اۋدارعان ءجون.
وسىعان بايلانىستى, اگەنتتىك قازاقستان ازاماتتارىن اگرەسسيۆتى جارناماعا بەرىلمەۋگە شاقىرادى جانە تۇسىنىكتى ءارى ايقىن قۇقىقتىق رەجيمى بار كومپانيالارمەن جۇمىس ىستەۋگە ۇسىنىم بەرەدى», دەلىنگەن حابارلامادا.
ۋاكىلەتتى ورگاننىڭ قر باعالى قاعازدار نارىعىندا قىزمەتپەن اينالىسۋعا ليتسەنزيالارى بار بروكەرلىك/ديلەرلىك ۇيىمداردىڭ ءتىزىمى اگەنتتىكتىڭسايتىندا ورنالاستىرىلعان.
اتالعان كومپانيالاردىڭ قىزمەتى قازاقستان رەسپۋبليكاسىنىڭ زاڭناماسىندا قاتاڭ تۇردە رەگلامەنتتەلەدى. اگەنتتىك ويىنشىلاردىڭ قىزمەتىن باقىلاۋ مەن قاداعالاۋدى جۇزەگە اسىرادى جانە بۇل كومپانيالاردىڭ قىزمەتىن تۇتىنۋشىلاردىڭ قۇقىعى مەن زاڭدى مۇددەسىن قورعاۋدىڭ ءتيىستى دەڭگەيىن قامتاماسىز ەتەدى. «ليتسەنزيالانباعان كومپانيالاردىڭ قىزمەتىنە بايلانىستى ازاماتتاردىڭ تاۋەكەلدەرىن بولدىرماۋ ءۇشىن اگەنتتىك ازاماتتاردىڭ شاعىمدارى كەلىپ تۇسكەن كومپانيالاردىڭ تىزبەسى مەن سايتتارىن جاريالادى.
سونىمەن بىرگە اگەنتتىك وزدەرىن «ينۆەستيتسيالىق كومپانيالار» رەتىندە كورسەتەتىن ۇيىمدارمەن شارتتىق قاتىناستارعا تۇسكەن كەزدە IOSCO حالىقارالىق باعالى قاعازدار جونىندەگى كوميسسيالاردىڭ حالىقارالىق ۇيىمىنىڭ حابارلاماسى جانە ەسكەرتۋىمەن تانىسۋدى ۇسىنادى.
سونداي-اق قارجى قۇرالدارىمەن ساۋدا-ساتتىق جاساۋدىڭ ءتۇرلى نارىقتىق, كرەديتتىك, ۆاليۋتالىق تاۋەكەلدەرمەن قاتار جۇرەتىنىن ەستە ۇستاعان ماڭىزدى.
وسىعان وراي, ينۆەستورلارعا ينۆەستيتسيالاردى ليتسەنزيالانعان قازاقستاندىق كومپانيالار ارقىلى جۇزەگە اسىرۋدى ۇسىنىم بەرەمىز», دەلىنگەن حابارلامادا.