قىزىلوردا وبلىسىندا جىل باسىنان بەرى 15 ادام سۋعا باتىپ كەتتى, دەپ حابارلايدى Egemen.kz
ايتا كەتەيىك, جىل باسىنان بەرى سۋ ايدىندارىندا 15 ادام قازا بولعان. ولاردىڭ اراسىندا 9-ى كامەلەت جاسقا تولماعاندار. بىلتىر ءدال وسى كەزەڭدە 12 ادام كوز جۇمسا, ولاردىڭ 4-ءى بالا بولاتىن. ال بىلتىر جىل بويىنا جەرگىلىكتى تۇرعىندار 39 جاقىن ادامىنان ايىرىلدى (ولاردىڭ 11-ءى بالا).
«بيىل اتالعان جاعدايدا قازا بولعان ازاماتتاردىڭ 3 (2-ءى كامەلەتكە تولماعان) سۋعا شومىلۋ ۋاقىتىندا (2-ءى كامەلەتكە تولماعان) قازا تاپتى. ال 2-ءى بالىق اۋلاۋ كەزىندە, 1-ءى قايىقتان قۇلادى, 9-ى جازاتايىم وقيعا (ونىڭ ىشىندە 7-ءى كامەلەتكە تولماعان) سالدارىنان ومىردەن ءوتتى», دەدى وبلىستىق جۇمىلدىرۋ دايىندىعى باسقارماسىنىڭ باسشىسى مەدەت ۋساين.
ونىڭ ايتۋىنشا, نەگىزگى سەبەپتەرى رەتىندە بالىق اۋلاۋ كەزىندەگى ابايسىزدىق, سۋ ايدىندارىندا قاۋىپسىزدىك شارالارىن ساقتاماۋ جانە بالالاردى اتا-انالارىنىڭ قاراۋىنسىز قالدىرۋ سەكىلدى جاعدايلاردى اتاپ وتۋگە بولادى.
«قاۋىپسىزدىك شاراسىنا ءمان بەرمەيتىندەر ازايماي وتىر. وكىنىشكە قاراي, ونىڭ سوڭى قايعىلى جاعدايمەن دە اياقتالىپ جاتادى. سۋعا كەتۋ فاكتىلەرى, نەگىزىنەن, ماس كۇيىندە شومىلۋ, سۋعا شومىلۋ كەزىندە بالالاردى قاراۋسىز قالدىرۋ جانە قاۋىپتى نەمەسە تىيىم سالىنعان اۋماقتا سۋعا شومىلۋدىڭ سالدارىنان بولادى. سوندىقتان اباي بولىڭىزدار. بالالاردى كوزدەن تاسا جىبەرمەڭىزدەر», دەدى باسقارما باسشىسى.