ءىرى كولەمدە بيۋدجەت قاراجاتىن جىمقىردى دەپ ايىپتالعان قاراعاندى اكىمىنىڭ ەكس-ورىنباسارى جاقسىلىق شالابەكوۆ سوتتا سوڭعى ءسوزىن ايتتى. ول ءوزىنىڭ ۇستالۋىن جاڭساقتىق ەكەنىن ايتىپ, سوتتان ءىستى وبەكتيۆتى تۇردە شەشۋدى سۇرادى, دەپ حابارلايدى Egemen.kz.
ەسكە سالا كەتەيىك, قاراعاندى قالاسى اكىمىنىڭ بۇرىنعى ورىنباسارى جاقسىلىق شالابەكوۆ 2020 جىلى 14 قىركۇيەك كۇنى ۇستالعان بولاتىن.
ەكس-شەنەۋنىك سوتتاعى سوڭعى سوزىندە قازىر ومىرىندەگى قيىن كەزەڭدەر ءوتىپ جاتقانىن, سەگىز ايدان بەرى ەركىن دەمالىپ, ويلانۋ مۇمكىندىگىنەن ايىرىلعانىن ايتتى.
«ماعان تاعىلعان ايىپ ءۇشىن ءىشىم ورتەنىپ بارادى. ءوز ەلىنە قىزمەت ەتۋگە لايىق ەمەس ۇرى مەن جەكسۇرىن دەگەن اتاق. بارلىق ەڭبەك جولىم سىزىلىپ كەتتى. ءبىراز جىل ازاماتتىق قۇرىلىس سالاسىندا ىستەدىم. مەملەكەتكە كومەك كەرەك كەزدە ايەلىمىز بەن كامەلەتكە تولماعان بالامىزدى ۇيدە قالدىرىپ, العاشقىلاردىڭ ءبىرى بولىپ ارىس قالاسىنىڭ تۇرعىندارىنا كومەكتەستىك. مۇستافين اتىنداعى اۋىلدا سەل جۇرگەن كەزدە جۇزدەگەن ادام زارداپ شەگىپ, ءۇيسىز قالدى. سول كەزدە قۇرىلىس كومپانياسى از ۋاقىتتىڭ ىشىندە زارداپ شەككەندەرگە ونداعان ءۇي سالىپ بەردى. ارىپتەستەرىم قيىن جاعدايعا تاپ بولعان ادامداردىڭ وتىنىشىنە بەي-جاي قارامادى. ونداي مىسالدار كوپ», دەيدى جاقسىلىق شالابەكوۆ.
جاقسىلىق شالابەكوۆ قاراعاندى قالاسى اكىمىنىڭ ورىنباسارى بولىپ 2019 جىلى اقپان ايىندا تاعايىندالعان ەدى. ال 2011-2019 جىلدار ارالىعىندا قالانىڭ قۇرىلىس ءبولىمىن باسقارعان. شالابەكوۆ اكىم ورىنباسارى قىزمەتىندە ارحيتەكتۋرا, قالا قۇرىلىسى, جاڭا الەۋمەتتىك وبەكتىلەر مەن تۇرعىن ءۇي سالۋ ماسەلەلەرىنە جاۋاپ بەرگەن.