ماحامبەت اۋدانىنداعى سارىتوعاي اۋىلىندا جاڭا زاۋىتتىڭ ىرگەتاسى قالاندى. شەتەلدىك تەحنولوگيامەن جابدىقتالاتىن زاۋىتتا ايىنا 18 مىڭنان استام سۋ ەسەپتەگىش قۇرالدارىن شىعارۋ كوزدەلىپ وتىر.
– قازىرگىدەي كۇردەلى كەزەڭدە جۇمىس ورنى مەن ءوندىرىس وشاعىن اشۋدىڭ ماڭىزى زور. سۋ ەسەپتەگىش قۇرالدارىن شىعاراتىن زاۋىت – ماحامبەت اۋدانىندا بوي تۇزەيتىن العاشقى ءوندىرىس ورنى. ەكونوميكاعا پايداسى تيەتىن وسىنداي جوبالاردى كوبەيتۋ الداعى ۋاقىتتا دا جالعاسادى, – دەيدى وبلىس اكىمى ماحامبەت دوسمۇحامبەتوۆ.
جاڭا زاۋىتتا 80 ادام جۇمىسپەن قامتىلادى. ونىڭ 60-تان استامى – جەرگىلىكتى تۇرعىن. سولاردىڭ قاتارىندا سارىتوعاي اۋىلىنىڭ تۇرعىنى ازامات سۇلتاشەۆ تا بار. ول بۇعان دەيىن تەڭىز كەنىشىندە جۇمىس ىستەپتى. ەندى ءوزى تۇراتىن اۋىلدا وتاندىق ءونىم شىعاراتىن زاۋىتتىڭ اشىلاتىنىن ەستىپ, وسىندا اۋىسىپتى. مۇندا ونىمەن بىرگە اۋىلداستارى دا جۇمىس ىستەيدى. ءبارى ارنايى وقۋ كۋرسىنان ءوتىپ, ەرەكشە زاۋىتتىڭ العاشقى قىزمەتكەرى بولعانىنا قۋانىپ ءجۇر.
ال Guryev جشس-ءنىڭ ديرەكتورى جەڭىس بەكباساروۆتىڭ ايتۋىنشا, بۇل – قازاقستانداعى وتاندىق سۋ ەسەپتەگىش قۇرالدارىن شىعاراتىن العاشقى زاۋىت. قاجەتتى شيكىزاتتىڭ بارلىعى ەل ىشىنەن اكەلىنەدى. ءارى ەكولوگيالىق تۇرعىدان قاۋىپسىز. العاشقىدا زاۋىت ءوز ونىمىمەن كاسىپورىندارىنىڭ سۇرانىسىن قامتاماسىز ەتەدى. كەيىن رەسپۋبليكانىڭ وزگە وڭىرلەرىنەن تۇسەتىن تاپسىرىستى ورىنداۋ جوسپارلانىپتى.
– ەلىمىزگە سۋ ەسەپتەگىش قۇرالدارى شەتەلدەن جەتكىزىلەدى. سونداي-اق شەتەلدەن اكەلىنگەن بولشەكتەرى قۇراستىرىلادى. سوندىقتان بۇل زاۋىت ەلىمىز ءۇشىن وتە پايدالى ءوندىرىس ورنى بولاتىنىنا سەنەمىز. باستاپقىدا زاۋىتتا مەحانيكالىق ەسەپتەگىش قۇرالدار, كەيىن ەلەكتروندى تۇرلەرى شىعارىلادى. مۇنىڭ تيىمدىلىگى – قۇرىلعىنىڭ اي سايىن تۇتىنىلاتىن سۋ مولشەرىن اۆتوماتتى تۇردە ەسەپتەۋ. وسى ورايدا, مۇنى ەلىمىزدە قولعا الىنعان اقپارات تاسىمالداۋ جۇيەلەرىن تسيفرلاندىرۋعا سەپتىگى تيەتىن ەرەكشە جوبا دەۋگە بولادى, – دەيدى جەڭىس بەكباساروۆ.
زاۋىت قۇرىلىسىن باستاعان سەرىكتەستىك باسشىلارى ەكى كومپانيامەن مەموراندۋمعا قول قويدى. ال زاۋىت قۇرىلىسى وسى جىلدىڭ قىركۇيەك ايىندا اياقتالىپ, وندىرىستىك جۇمىسىن باستاماق.