الماتى وبلىسىندا 22-24 جاستاعى ماس جىگىتتەر, ەرلى-زايىپتىنى سوققىعا جىققان. وقيعا جامبىل اۋدانىنىڭ قاسىمبەك اۋىلىندا بولعان, دەپ حابارلايدى Egemen.kz.
«2 ماۋسىم كۇنى جامبىل اۋدانىنىڭ پوليتسياسىنا قاسىمبەك اۋىلىنىڭ تۇرعىنى شاعىمداندى. ايەلدىڭ ايتۋنىشا, بەلگىسىز ءۇش جىگىت ءوزىن جانە كۇيەۋىن سوققىعا جىققان. تەكسەرۋ بارىسىندا 22-24 جاستاعى وسى اۋىلدىڭ تۇرعىندارى انىقتالدى. بۇل ءىس قىلمىستىق كودەكستىڭ 293-بابى 2-بولىگىمەن بۇزاقىلىق بويىنشا تىركەلدى», دەلىنگەن الماتى وبلىستىق پوليتسيا دەپارتامەنتى ءباسپاسوز قىزمەتىنىڭ اقپاراتىندا.
وقيعا بويىنشا جابىرلەنۋشىلەردىڭ جاراقات دارەجەسىن انىقتاۋ ماقساتىندا قاجەتتى ساراپتامالار تاعايىندالعان.
«ۇستالعان ءۇش ادامنىڭ ەكەۋىنىڭ ىشىمدىك ىشكەنى ارنايى مەديتسينالىق تەكسەرۋ بارىسىندا انىقتالدى», دەپ تولىقتىردى ءباسپاسوز قىزمەتى.
ازىرگە الماتى وبلىسىنىڭ پوليتسيا دەپارتامەنتىنىڭ ءباسپاسوز قىزمەتى جانجالدىڭ نەدەن شىققانى جونىندە مالىمەت بەرمەدى. ال بەيرەسمي اقپاراتقا سايكەس بەلگىسىز ەر ادام وزگەنىڭ تۇرعىن ءۇيىنىڭ قورشاۋىنىڭ جانىندا دارەت سىندىرعان. جانجال سول ساتتەن باستالعان كورىنەدى.