جالپاق الەمدى جامان تۇماۋ جايلاعالى قالتالى ازاماتتاردىڭ قايىرىمدى ءىسى كوبەيدى. قۇپتارلىق شارۋا. سىن ساعاتتا ءبىر-بىرىمىزگە قارايلاسىپ, قولۇشىن بەرگەنگە نە جەتسىن, ءسىرا؟!
اكەلى-بالالى زاكۋسيلوۆتار – «سۆوبودنوە» جانە «ماكسيموۆكا» سەرىكتەستىكتەرىنىڭ باسشىلارى. اۋداننىڭ تولايىم تابىس جونىندە ۇزەڭگى قاعىستىرىپ, تاسى ورگە دومالاپ تۇرعان شارۋاشىلىقتارى دا وسى. يگىلىكتى ىستەرى كوپكە تانىمال. تانىمال ەتكەن قاسيەت – جومارتتىقتارى. ولار جىل سايىن اۋىل تۇرعىندارىنىڭ الەۋمەتتىك-تۇرمىستىق جاعدايىنىڭ جاقسارۋىنا كومەكتەسىپ كەلەدى. اسىرەسە بالالارعا دەگەن ىقىلاسى ءتىپتى ەرەكشە.
اكەسى الەكساندر زاكۋسيلوۆقا ۇلتتىق قوعامدىق «التىن جۇرەك» قايىرىمدىلىق سىيلىعىنىڭ بەرىلۋى تەگىن ەمەس. شىنتۋايتىندا بۇل قىرۋار يگىلىكتى ءىستىڭ ىزەتپەن كومكەرىلىپ, ىلتيپاتپەن ادىپتەلگەن قارىمتاسى. ولار وبلىستى بىلاي قويعاندا, ەلىمىزدەگى شاعىن بالالار ورتالىقتارىن سالۋدىڭ باستاۋىندا تۇردى. جەرگىلىكتى ۇلت ءتىلىن وقىتاتىن كابينەتى بار العاشقى تەگىن بالالار باقشاسى وسى ماكسيموۆكا مەكتەبىندە اشىلدى. شارۋاشىلىق ديرەكتورى قازاقستاندى مەكەن ەتەتىن ءار تۇرعىننىڭ مەملەكەتتىك ءتىلدى ءبىلۋ كەرەكتىگىن ۇدايى ايتىپ جۇرەدى. ايتىپ قانا قويماي, ناقتى ىسىمەن دالەلدەۋدە. جاس ەرەكشەلىكتەرىنە بايلانىستى ەرەسەكتەردىڭ جاعدايى كەلە بەرمەسە, بالالاردىڭ ءبارى ەلگە دەگەن قۇرمەتتەرىن كورسەتىپ, ءتىلدى وقىپ ۇيرەنۋى قاجەت دەپ ەسەپتەيدى.
الەكساندر الەكساندروۆيچ مادەني جانە گۋمانيتارلىق سالالاردا قايىرىمدىلىق پەن دەمەۋشىلىك قىزمەتى ءۇشىن قازاقستان رەسپۋبليكاسى تۇڭعىش پرەزيدەنتىنىڭ قۇرمەت ديپلومىنىڭ يەگەرى. جىل سايىن الەۋمەتتىك سالاعا مول قارجى باعىتتاپ, ويعا العان ءىسى وڭىنان ورالۋدا. ناقتىلاپ ايتاتىن بولساق, شارۋاشىلىق جەرگىلىكتى مەكتەپكە, مادەنيەت ۇيىنە, ۋچاسكەلىك پوليتسيا پۋنكتىنە, دارىگەرلىك امبۋلاتورياعا ۇنەمى كومەك كورسەتىپ وتىرادى. بۇل بۇگىن عانا اتقارىلىپ جاتقان شارۋا ەمەس, قايىرىمدىلىق جاساۋ قانىنا بىتكەن قاعىلەز باسشى 2008 جىلدىڭ وزىندە ۋچاسكەلىك دارىگەرگە تۇرمىسقا قولايلى پاتەردىڭ كىلتىن تاپسىرعان بولاتىن. شارتتا پاتەراقى تولەنبەيتىندىگى, ون جىلدان كەيىن ساتىپ الۋ ارقىلى جەكەشەلەندىرۋگە بولاتىنى تايعا تاڭبا باسقانداي كورسەتىلگەن. كەيىن سولاي بولدى دا.
تۇرعىندار ءۇشىن تۇتاستاي كوشەلەر سالىنىپ جاتقان اۋىلدى كوپ كورە قويمايسىز. ال ءبىز تۇرمىسىن تىلگە تيەك ەتىپ وتىرعان ماكسيموۆكا ەلدى مەكەنىندە سولاي. مۇندا قوس پاتەرلى, تۇرمىسقا قولايلى, كەڭ دە جارىق, ءارتۇرلى ارحيتەكتۋرالىق پىشىندەگى ۇيلەردەن تۇراتىن تۇتاس كوشەلەر بار. بۇل كوشەلەردى جەرگىلىكتى تۇرعىندار ءوزارا «رۋبلەۆكا» دەپ اتايدى ەكەن. تۇرعىندارى – ەڭبەك ارداگەرلەرى, قاراپايىم جۇمىسشىلار, «ديپلوممەن – اۋىلعا!» باعدارلاماسى بويىنشا جۇمىسقا كەلىپ, ىسكە كىرىسىپ كەتكەن جاس ماماندار, كوپبالالى وتباسىلار. بۇل كۇندەرى تاعى ءبىر قوس قاباتتى عيمارات تۇرعىن ۇيگە لايىقتالىپ, قايتادان جاڭعىرتىلۋدا. جوندەۋ جۇمىستارى بىتكەننەن كەيىن اۋىل تۇرعىندارىنىڭ ىشىندە جايلى باسپاناعا ءزارۋ بولىپ وتىرعان بىرنەشە وتباسى قونىس تويىن تويلايتىن بولادى.
العاش كارانتين باستالعان كەزدە حالىقتىڭ ابدىراپ قالعانى دا شىندىق. بۇرىن-سوڭدى كوز كورىپ, قۇلاق ەستىمەگەن داۋاسىز دەرتتىڭ ءدۇبىرى ەل اپشىسىن قۋىرىپ-اق تاستادى. مىنە, وسى كەزدە سەرىكتەستىك باسشىلارى اۋىلداستارىن قامقورلىقتارىنا الىپ, جاناشىرلىق ىستەرىن ۇدەتە ءتۇستى. اۋىلدا مونشا, كىر جۋ كەشەنى, ناۋبايحانا ءۇزىلىسسىز جۇمىس ىستەپ تۇر. ايتپاقشى, ءبىر بولكە ناننىڭ باعاسى نەبارى 40 تەڭگە ەكەنىن ايتا كەتەلىك.
سەرىكتەستىك ديرەكتورى, كىشى زاكۋسيلوۆ تا اكە ۇلگىسىن ونەگە ەتكەن ازامات. قات-قابات شارۋاسىن جىپكە تىزگەندەي ەتىپ ساناپ شىعۋدىڭ ءوزى قيىن. ءبىر عانا ءىسىن ايتايىقشى, مىسالى, سەرىكتەستىك تاياۋدا جابىق حوككەي كورتىن سالىپ بەردى. جالپى الاڭى 1,7 گەكتار, ۇزىندىعى 57, ەنى 27 مەتر. بۇل كونتينەنتالدى حوككەي ليگاسىنىڭ ستاندارتتارىنا تولىق جاۋاپ بەرەتىن ورىن. كورتتىڭ قۇرىلىسىنا سەرىكتەستىكتەن 140 ملن تەڭگە قاراجات ءبولىنىپ وتىر. بۇل جەردەن كوشە ترەناجەرلەرىنە, «جاساندى جامىلعىسى» بار فۋتبول الاڭىنا دا ورىن تابىلعان. كوركى كوزتارتارلىق كەشەندى جاسىل ساياباق كومكەرىپ تۇر. وسى ىسىمەن-اق تۋعان جەرىن تۇلەتۋگە ايانباي ۇلەس قوسىپ جۇرگەن جومارت جاندى, اكەلى-بالالى زاكۋسيلوۆتاردىڭ قامقورلىق كوكجيەگىنىڭ كورىكتى ەكەندىگىن دالەلدەپ تۇرعانىن قاپىسىز اڭعاراسىز.
كارانتين كەزىندە سەرىكتەستىك ءوز جۇمىسشىلارىن عانا ەمەس, توڭىرەكتەگى قامقورلىققا ءزارۋ ادامداردى دا ەلەپ-ەسكەرىپ, جۇزدەگەن ازىق-ت ۇلىك سەبەتىن تاراتتى. مەديتسينالىق قورعانىس قۇرالدارىن ساتىپ اپەردى. وسىنداعى فەلدشەرلىك-اكۋشەرلىك پۋنكتتىڭ بار كەرەگىن تۇگەندەدى.
– ءدال وسىنداي ۋاقىتتا حالىقتىڭ دەنساۋلىعىنا بارىنشا قامقور بولۋىمىز كەرەك, – دەيدى الەكساندر زاكۋسيلوۆ, – جەرگىلىكتى جۇرت ء«بىرىنشى بايلىق – دەنساۋلىق» دەيدى. ءبىز ءوزىمىز دە قانشا ساقتانساق تا, ءبىر اۋناپ تۇردىق. اۋرۋدىڭ نە ەكەنىن كوردىك. باسقا جۇرتتىڭ باسىنا بەرمەسىن. راس, دەنساۋلىقتى ساتىپ الىپ بەرە المايمىز, قالعانى قولدان كەلەتىن شارۋا. وسى جەردىڭ جومارت پەيىلىمەن ىرىزدىق جيناپ وتىرعان سوڭ ەلمەن بولىسپەسە بولا ما؟
اۋىل قازىر قوبالجيتىن ەمەس, باس اۋىرىپ, بالتىر سىزداسا, جاناشىرلارى جانىنان تابىلادى. قامقورشىڭنىڭ قاسىڭدا بولعانى قانداي جاقسى!
اقمولا وبلىسى,
ساندىقتاۋ اۋدانى