قازاقتا «كۇش اتاسىن تانىماس» دەگەن ءسوز بار. ۇلى دالامىزدا ەگەۋلى نايزا قولعا الىپ جاۋعا شاپقان باتىرلار دا, الىسقانىن الىپ جىققان بالۋاندار دا وتكەن. سول تەكتىلەردىڭ جالعاسىنداي بولعان ازاماتتار ارامىزدا بۇگىن دە بار. قازىرگى زاماننىڭ قاجىمۇقانى دەۋگە تۇرارلىق ايبار ەرجانوۆ بۇل كۇندە اۋىر جۇك كولىكتەرىن جالعىز ءوزى سۇيرەپ, كوپتى تاڭداندىرۋدا. ول اۋەلى جول تالعامايتىن جاپوندىق ءۇش «دجيپ» اۆتوكولىگىن قاتارىنان جالعىز تارتىپ كوپتىڭ ىقىلاسىنا بولەنسە, جۋىردا سالماعى 15 توننا بولاتىن اۋىر جۇك كولىگىن تاعى دا جالعىز سۇيرەپ ەرەكشە قابىلەتىن تانىتتى.
ارينە, ايباردىڭ بۇل ارەكەتىن قولداۋشىلار دا, ونى باعالاۋشىلار دا كوپ بولدى. اۋەلگى قولداۋشىلارى اكەسى تۇرعانباي ەرجانوۆ پەن اناسى كۇنبالا ەرمەكوۆا ەكەن. «انام مەنىڭ ناعاشىلارىمنىڭ وتە مىقتى كىسىلەر بولعانىن ايتادى. اكەم دە, انام دا ەڭبەكقور ادامدار. اكەم قارا كۇش جاعىنان مىقتى كىسى», دەيدى سپورتشىنىڭ ءوزى.
دەيتۇرعانمەن, ايبار ءبىرىنشى كەزەكتە مۇنى ماقتانىش نەمەسە ەلگە تانىلۋ ءۇشىن ەمەس, قازاقتىڭ قايسارلىعىن ناسيحاتتاۋ ءۇشىن قولعا الىپتى. ءارى بيىل ايگىلى قاجىمۇقان مۇڭايتپاس ۇلىنىڭ تۋعانىنا 150 جىل تولۋىنا وراي كولىك تارتۋدى ۇيىمداستىرۋدا. سارىسۋ اۋدانى ساۋداكەنت اۋىلىندا قاراپايىم وتباسىندا تاربيەلەنگەن ايبار بالا كۇنىنەن سپورتشى بولۋدى ارمانداپتى. ۋاقىت وتە كەلە ول بەلەستەردى باعىندىرىپ, سپورت الەمىندە بىرقاتار جەتىستىككە جەتكەن. جەرلەسىمىز پاۋەرليفتينگتىڭ 8 تۇرىنەن سپورت شەبەرى اتانعان. ماسەلەن, 2017 جىلى «كلاسسيكالىق جاتىپ سىعىمداۋدان قازاقستان رەسپۋبليكاسىنىڭ سپورت شەبەرى», 2018 جىلى «قازاقستان رەسپۋبليكاسىنىڭ سپورت شەبەرى», 2019 جىلى «اسكەري جاتىپ سىعىمداۋدان قازاقستان رەسپۋبليكاسىنىڭ سپورت شەبەرى» اتاقتارىنا جانە وزگە دە ماراپاتتارعا قول جەتكىزگەن. «قازىرگى ۋاقىتتا بۇل سپورت ءتۇرى شەت مەملەكەتتەردە كوپ تارالعان. ءبىزدىڭ ەلىمىزدە ساناۋلى جىگىتتەر عانا اۋىر جۇك كولىكتەرىن تارتىپ ءجۇر. وسىدان ەكى جىل بۇرىن كولىك سۇيرەۋ تۋرالى ويىما كەلگەن. الايدا الەمدى جايلاعان ىندەتكە بايلانىستى ءبىراز دايىندىقتار شەگەرىلىپ قالدى. بىراق بۇل شارۋاعا فيزيكالىق تۇرعىدان دايىن ەدىم. وسى جىلدىڭ باسىندا قايتادان دايىندالا باستادىم», دەيدى ايبار ەرجانوۆ. ناتيجەسىندە, سالماعى ونداعان توننا بولاتىن اۋىر كولىكتەردى كەدەرگىسىز تارتىپ, كۇش-قۋاتىن تاعى دا دالەلدەدى.
قازاق جاستارىن وتانسۇيگىشتىككە باۋلۋ ماقساتىندا اۋىر سپورت تۇرىمەن اينالىسىپ جۇرگەن ايبار بۇگىندە جانىنا شاكىرت جيناپ, بىلگەنىمەن ءبولىسىپ كەلەدى. جانىنداعى باۋىرجان كاماليەۆ, ەرجان جاقاەۆ, سەرىك سەڭگىرباەۆ سياقتى جىگىتتەرمەن بىرگە ءالى تالاي جەتىستىكتەرگە جەتۋدى جوسپارلاۋدا. جول تالعامايتىن كولىكتەردى دە, اۋىر جۇك كولىگىن دە جالعىز سۇيرەگەن ايبار ەندى الداعى ۋاقىتتا پويىز ۆاگونىن تارتۋدى دا كوزدەپ وتىر. بۇل دا ۋاقىتىندا كوپشىلىكتىڭ تاڭدانىسىن تۋدىرىپ, قىزىعۋشىلىعىن ارتتىراتىن وقيعا بولاتىنى ءسوزسىز.
جامبىل وبلىسى