الەمدە حالىقتى ۆاكتسينالاۋ قالاي ءجۇرىپ جاتىر؟

شۆەيتساريا كارانتين تالاپتارىن جەڭىلدەتتى. ەلدە مەيرامحانالاردىڭ ىشكى جايلارى اشىلىپ, اۋديتوريالارداعى ستۋدەنتتەر سانى بويىنشا شەكتەۋلەر الىنىپ تاستالدى. سونداي-اق, شەكتەۋلەر ەنگىزىلگەن سالالار ءۇشىن قاشىقتان جۇمىس رەجيمى جويىلدى. الايدا بەرن بيلىگى جۇمىس بەرۋشىلەرگە قىزمەتكەرلەردىڭ ۇيدەن جۇمىس ىستەۋىنە مۇمكىندىك بەرۋدى ۇسىنادى. COVID-19-عا قارسى ۆاكتسينانى العان ەل تۇرعىندارى ەپيدەميولوگيالىق قاۋىپ دەڭگەيى جوعارى ەلدەردەن ورالعاننان كەيىن وقشاۋلانۋعا مىندەتتى بولمايدى.

قىتايدىڭ وڭتۇستىگىندە كوروناۆيرۋس ينفەكتسياسىن ەل ىشىندە جۇقتىرۋ جاعدايلارى ارتتى. گۋاندۋن پروۆينتسياسىندا وتكەن تاۋلىكتە ينفەكتسياعا 20 ادام شالدىققان. وقيعالاردىڭ 18-ءى گۋانچجوۋ اكىمشىلىك ورتالىعىندا انىقتالعان. سونىمەن قاتار, پروۆينتسيادا كوروناۆيرۋس ينفەكتسياسىنىڭ اسيمپتوماتيكالىق اعىمىنىڭ ءۇش جاعدايى تىركەلدى.

گەرمانيادا كۆي تارالۋ دەڭگەيى تومەندەپ كەلەدى. ينفەكتسيانى جۇقتىرعاندار كورسەتكىشىنىڭ كۇندەلىكتى ءوسىمى 1 978 جاعدايدى قۇرادى. بۇل ءبىر اپتا بۇرىنعى كورسەتكىشكە قاراعاندا 704 جاعدايعا كەم. پاندەميا باستالعاننان بەرى حالقىنىڭ سانى 84 ميلليوندى قۇرايتىن گەرمانيادا كوروناۆيرۋستىڭ 3 681 126 وقيعاسى انىقتالدى. ىندەتتەن 88 442 ادام كوز جۇمدى. سوڭعى 7 كۇندە 100 000 تۇرعىنعا شاققاندا ينفەكتسيانى جۇقتىرۋدىڭ 35,1 جاعدايى تىركەلدى.

سونداي-اق گەرمانيادا پاندەميا باستالعاننان بەرى كوروناۆيرۋستى جۇقتىرۋدىڭ بىردە-ءبىر جاعدايى تىركەلمەگەن اۋىل انىقتالدى. ول ەلدىڭ باتىسىنداعى رەينلاند-پفالتس جەرىندە ورنالاسقان 400 تۇرعىنى بار ليگ اۋىلى. وندا 14 اي بويى كوروناۆيرۋس ىندەتى تىركەلمەگەن.

باكۋدە مەترو قايتا جۇمىس ىستەي باستادى. ازەربايجان بيلىگى بۇگىننەن باستاپ استاناداعى مەتروپوليتەننىڭ جۇمىسىن قايتا جانداندىردى. باكۋ مەتروسى جولاۋشىلاردى 2020 جىلدىڭ قازانىنان بەرى قابىلداعان جوق. كارانتيندىك شارالاردىڭ السىرەۋىنە قاراماستان, مەترو باسقا دا قوعامدىق كولىكتەر سياقتى دەمالىس كۇندەرى جۇمىس ىستەمەيدى. ال, 10 ماۋسىمنان باستاپ ەلدە مەشىتتەر مەن حرامدار كەلۋشىلەر ءۇشىن ەسىگىن اشادى.

رەسمي كاير كارانتين تالاپتارىن جەڭىلدەتەدى. مىسىر بيلىگى ءدامحانالار, مەيرامحانالار, دۇكەندەر مەن ساۋدا ورتالىقتارىنىڭ جۇمىسىنا قويىلعان شەكتەۋلەردى الىپ تاستاۋ تۋرالى شەشىم قابىلدادى. ەرتەڭنەن باستاپ تاماقتانۋ ورىندارى مەن دۇكەندەر جازعى جۇمىس رەجيمىنە ورالىپ, تۇنگى ساعات 00:00 دەيىن جۇمىس ىستەي الادى. مىسىرلىق ۇكىمەت شەكتەۋلەردى جەڭىلدەتۋمەن قاتار, حۋرگادا مەن شارم-ەش شەيح سياقتى تۋريستەر اراسىندا ەڭ تانىمال ەكى كۋرورتتىڭ بارلىق تۇرعىندارىن ۆاكتسينالاۋعا نيەتتى ەكەندىگىن حابارلادى.

وڭتۇستىك كورەيادا حالىقتىڭ 10,5% سovid-19-عا قارسى ەگىلدى. وتكەن تاۋلىكتە عانا ەلدە 163 457 ادام ۆاكتسينالاندى. 30 مامىر ساعات 00:00-دەگى جاعدايعا سايكەس, ەلدە 5 399 015 ادام ەكپەنىڭ العاشقى دوزاسىن العان. ەگىلۋ دەڭگەيى 10,5% قۇرادى.

جاپونيا بيلىگى كوروناۆيرۋس ينفەكتسياسىنا تاپسىرىلعان پتر-تەست انىقتاماسى بولعان جاعدايدا جانكۇيەرلەردى توكيودا وتەتىن وليمپيادا مەن پاراليمپيادا ويىندارىنا كىرگىزۋگە نيەتتى. ەكپە سالدىرعان ازاماتتار دا ءتيىستى قۇجاتتى ۇسىنۋى شارت.

پتر-زەرتتەۋ ستاديونعا كەلگەنگە دەيىن جەتى كۇن بۇرىن جاسالۋى كەرەك. ستاديونعا كىرەر الدىندا ماماندار كورەرمەندەردىڭ تەمپەراتۋراسىن تەكسەرىپ, بەتپەردەنىڭ بولۋىن قاداعالايدى.

ال وليمپياداداعى جانكۇيەرلەردىڭ سانىن شەكتەۋگە قاتىستى ماسەلە ماۋسىم ايىندا شەشىلەتىن بولادى.