قازاقستاندا كامەلەتتىك جاستى 18-دەن 16-عا دەيىن تومەندەتۋ قاجەت. بۇل زورلىققا ۇشىراعان جەتكىنشەكتەردىڭ ءتيىستى مەديتسينالىق قىزمەتكە جۇگىنۋىنە مۇمكىندىك بەرمەك. داعدارىس ورتالىقتارىنىڭ وداعى بۇگىن وسىنداي ۇسىنىس تاستادى, دەپ حابارلايدى Egemen.kz.
مۇنداي قادام بالالاردى الىمجەتتىكتەن قورعاپ, وڭالتۋ شارالارىن ءتيىمدى جۇرگىزۋگە جول اشپاق. جالپى بالالارعا ارنالعان جابىق مەكەمەلەر باقىلاۋ كامەرالارىمەن تولىق قامتىلماعان, جەتكىنشەكتەردىڭ زورلىق-زومبىلىققا ۇشىراعانىنا قاتىستى شاعىم تۇسىرەتىن ارنايى جەلى جوق. بۇدان بولەك, جابىق مەكەمە قىزمەتكەرلەرى كامەلەتتىك جاسقا تولماعان تاربيەلەنۋشىلەردىڭ قۇقىعىنا قاتىستى بىلگەنى از. سوندىقتان كوپ جاعدايدا, بۇلدىرشىندەردىڭ قۇقىعى اياق استى ەتىلەدى دەيدى قوعامدىق ۇيىمداردىڭ وكىلدەرى.
سونداي-اق تۇرمىستاعى زورلىق جاساعانى ءۇشىن جازانى كۇشەيتىپ, قىلمىستىق جاۋاپكەرشىلىككە تارتۋ ءالى قولعا الىنبادى. باس پروكۋراتۋرانىڭ رەسمي مالىمەتى بويىنشا بىلتىر كامەلەتتىك جاسقا تولماعانداردى زورلاۋعا قاتىستى 199 قىلمىس تىركەلگەن. بۇل الدىڭعى جىلمەن سالىستىرعاندا ەكى ەسەگە ارتىق.