بۇگىن ەلىمىزدە ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى. بۇل تۋرالى اقپارات جانە قوعامدىق دامۋ ءمينيسترى ايدا بالاەۆا Facebook-تەگى پاراقشاسىندا جازدى, دەپ حابارلايدى Egemen.kz.
«وكىنىشكە وراي, بۇل – ءبىزدىڭ ۇلتتىق تاريحىمىزدىڭ قارا جامىلعان, قايعىمەن جازىلعان ناۋبەت كەزەڭىن ەسكە سالادى...
تاريحشىلاردىڭ ايتۋىنشا, 100 مىڭنان استام ادام قۋعىن-سۇرگىن كورىپ, 25 مىڭى اتىلعان. نەشە ميلليونى اشتىقتان قىرىلدى, قانشاسى شەت ەلدەرگە باس ساۋعالادى, وتباسىلارى مەن جاقىندارى قۋدالاۋعا ۇشىرادى. دەگەنمەن, «ورنىندا بار وڭالار» دەگەن. تاۋەلسىزدىك العاننان كەيىن ەلىمىز تاريحىمىزعا بايىپتى باعاسىن بەرىپ, ادىلەتتى قالپىنا كەلتىرۋدىڭ لايىقتى شاراسىن جاساپ كەلەدى. تاۋەلسىزدىكتىڭ 30 جىلدىعى اياسىندا بيىل مەملەكەت باسشىسىنىڭ تاپسىرماسىمەن «ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا» قۇرىلدى. ەندىگى جەردە, تاريحي قۇجاتتار جان-جاقتى سارالانىپ, رەپرەسسيا قۇرباندارى اقتالۋى ءتيىس. اسىرەسە اشارشىلىققا قاتىستى شىنايى اقيقات ايقىندالىپ, بۇل ناۋبەتتى وقيعانىڭ ناقتى تاريحي باعاسى بەرىلۋ كەرەك. تاريحي سانا نەعۇرلىم تەرەڭ بولعان سايىن ادام دا, قوعام دا رۋحاني باي بولادى. سوندىقتان, تاريحي سانانى قالىپتاستىرۋ تەك شىنايى تاريحقا نەگىزدەلۋى ءتيىس. وزبىرلىق ۇستەمدىك قۇرعان, ۇلت تاريحى قىل ۇستىندە تۇرعان كەزەڭدەر تاريحىنىڭ قايتا زەرتتەلۋى – الەمدىك تاجىريبەدە بار زاڭدىلىق, تاريحي ادىلدىك. جازىقسىز جاپا شەككەندەردىڭ رۋحىنا تاعزىم ەتۋ – ءبىزدىڭ بۇگىنگى بورىشىمىز, ونى ۇرپاق بويىنا ءسىڭىرۋ – پارىزىمىز! قۇربانداردىڭ رۋحى تىنىشتالىپ, جاندارى جاي تاپسىن», دەدى ايدا بالاەۆا.