وسىدان 40 جىلدان دا استام ۋاقىت بۇرىن كەشەگى – «سوتسياليستىك قازاقستان», بۇگىنگى – «Egemen Qazaqstan» باسىلىمى فوتوتىلشىلەر اراسىندا بايقاۋلار ۇيىمداستىرىپ, ەلدى ەلەڭ ەتكىزگەن سۋرەتتەر توپ جارىپ جۇرەدى.
ال 1975 جىلدارى قازىر رەسپۋبليكاعا بەلگىلى ءفوتوتىلشى بولات وماراليەۆ فوتوەتيۋدتەرمەن اۋەستەنىپ, كوپ ۋاقىتىن سوعان الدىرىپ جۇرەدى. جارتى عاسىرلىق شەجىرەسى بار سول بايقاۋلاردا بايىرعى ءفوتوتىلشىنىڭ «اتى تالاي بايگەدەن كەلگەن». سول تاماشا جۇمىستاردىڭ ءبىرى قالاي ءتۇسىرىلدى؟
«ول كەزدە ءبىز اۋداندىق گازەتتە ىستەيمىز. ءبىر كۇنى ءبىزدىڭ ۇيدەن تۇسكى اس ءىشىپ وتىرعاندا مەن بولاتقا: «سەن فوتوەتيۋد تۇسىرگىش بولساڭ ساعان ءبىر-ەكى سيۋجەت بەرەمىن, سونى ءتۇسىرىپ الساڭ ەلدەن وزاسىڭ», دەدىم ازىلدەپ.
شاي ءىشىپ بولعان سوڭ 4 جاسار ۇلكەن ۇلىم شىڭعىستىڭ قولىنا دومبىرا ۇستاتىپ, ديۆانعا وتىرعىزدىق. بولات فوتواپپاراتىن دايىنداپ وتىر. اشەيىندە دومبىرانى قولىنا ۇستاپ وڭكەيىپ وتىراتىن بالام بۇل جولى بولاتتان ۇيالدى ما, قىرسىقتى دا قالدى. «شىڭعىس, ولەڭ ايت, مىنانى ايت, انانى ايت» دەپ وبەكتەپ, جالىنىپ جاتىرمىن, بولمايدى.
داعدارعان كەزىمدە مۇنىڭ ەركەلىگىن وزىنە پايدالانايىن دەدىم دە, «شىڭعىس, بولات يت قوي», دەپ ايقايلا دەدىم. قيقايىپ وتىرعان بالا قۇلپىرىپ سالا بەردى. ءوزى ديۆاندا, دومبىرا قولىندا, كوزى جۇمۋلى, الگى ءسوزدى ايقايلاپ قويا بەرسىن. مەن تاعى ايت دەپ, كوتەرمەلەيمىن, ەركە بالاعا ءبىر ەرمەك تابىلدى. ال مۇنداي سيۋجەتتى ىزدەسە دە تابا المايتىن بولات بالا يت دەمەك تۇگەلى شوشقا دەسەدە قارايتىن ەمەس, مۇرنى پىسىلداپ, جان جاعىنان سۋرەتتى سارتىلداتىپ ءتۇسىرىپ جاتىر.
وبالى نە كەرەك, بولاتتىڭ ءوزى دە سۋرەتتىڭ ءپىرى عوي, ادەمى فوتوەتيۋد 4 جاسار بالا شىرقاپ وتىرعانداي شىقتى. كەيىن 1979 جىلى «سوتساليستىك قازاقستان» گازەتى «بەس جىلدىق جانە ءبىز» فوتو بايگە جاريالادى. كۇن سايىن, جىل اياعىنا دەيىن فوتوبايگەنىڭ سۋرەتتەرى جاريالانىپ تۇردى.
بايقاۋعا مىڭداعان سۋرەتپەن جۇزدەگەن فوتوتىلشىلەر قاتىستى. بولات باس بايگە,1 ورىندى ء«ان سالايىن اۋەلەتىپ» دەگەن وسى سۋرەتپەن جەڭىپ الدى.
«سق» جىگىتتەرى بىلەدى. گازەت شىعىپ كەتكەننەن كەيىن وندا جاريالانعان سۋرەتتەردىڭ تۇپنۇسقاسى كوپكە دەيىن ساقتالادى. سودان «سق» سەكرەتارياتىنا اسقار سۇلەيمەنوۆ بارىپ قالماي ما. الگى سۋرەت قىزىقتى كومپازيتساسىمەن اسەكەڭنىڭ كوزىنە وتتاي باسىلىپ, قولىنا الىپ:
– جىگىتتەر مىنا سۋرەت قايدان؟ – دەپ سۇرايدى.
– قىزىلوردادان. بولات وماراليەۆ دەيتىن شتاتتان تىس ءتىلشىمىزدىڭ دۇنيەسى.
– ولاي بولسا وسى بالا يا يرانبەكتىڭ, يا اسقاردىڭ بالاسىنىڭ سۋرەتى.ءتىپتى باسقا ايەلىنەن تاپسادا, سول ەكەۋىنىڭ بالاسى دەپتى دە, سۋرەتتى قالتاسىنا سالىپ الىپتى.
بۇل سۋرەت اسەكەڭ اكادەميالىق تەاتردا ادەبيەت ءبولىمنىڭ مەڭگەرۋشىسى بولعان كەزىندە, ءبىراز جىل جاقتاۋعا سالىپ, ءىلۋلى تۇردى», دەپ ەسكە الادى اقىن اسقار كىرەباەۆ.
سۋرەتتى تۇسىرگەن بولات وماراليەۆ
الماتى