...كەشەگى كەڭەس وكىمەتى كەزىندە جامبىل وبلىسىنىڭ شالعايدا جاتقان مويىنقۇم اۋدانىندا قۇرىلعان «مويىنقۇم» ءان-بي ءانسامبلىنىڭ اتاعى دۇرىلدەپ شىعىپ ەدى. ولاي دەيتىنىمىز, بۇل ونەر ۇجىمى قاز تۇرىپ, قادام باسقان سوڭ-اق كوپ ۇزاماي 1978 جىلى ماسكەۋدەگى بۇكىلوداقتىق حالىق شارۋاشىلىعى جەتىستىكتەرى كورمەسىندە ەكى-ءۇش كونتسەرت قويىپ, الىپ قالا تۇرعىندارى مەن قوناقتارىنىڭ ريزاشىلىعىنا بولەنگەن. بۇل تۋرالى ەلدىڭ ەڭ باستى گازەتى «پراۆدا» «پويۋت دومبرى» دەگەن كولەمدى ماقالا جاريالاعان.
كەلەسى 1979 جىلى كسرو-نىڭ پورتۋگالياداعى مادەنيەت كۇندەرى وتكىزىلىپ, ونىڭ اياسىندا سول جاققا باراتىنداردىڭ تىزىمىنە «مويىنقۇم» ءانسامبلى دە, ەرەكشە سەنىم ءبىلدىرىلىپ, ەنگىزىلگەن بولاتىن. ال بۇعان, ارينە ۇلكەن دايىندىق كەرەك. سوندىقتان دا ونەرپازداردىڭ اسا جاۋاپتى ساپارعا ازىرلىگىن جامبىل وبلىستىق پارتيا كوميتەتىنىڭ يدەولوگيالىق حاتشىسى عاينيكەن بيباتىروۆانىڭ ءوزى (قازىر الماتى قالاسىندا تۇرادى) تىكەلەي قاداعالاپ وتىردى. سول سياقتى مارقۇمدار – اۋپارتكومنىڭ ءبىرىنشى حاتشىسى ايتباي نازاربەكوۆ پەن ءۇشىنشى حاتشىسى جۇمابەك ورىنباەۆ ەكەۋى ءاردايىم اۋىل ارتىستەرىنىڭ وسى ورايداعى ءاربىر ارەكەتىنە ەرەكشە نازار اۋداردى. ءتىپتى ونەرپازداردىڭ شەبەرلىگىن شىڭداۋ ءۇشىن سول كەزدەگى استانامىز الماتى قالاسىنان ارنايى ماماندار دا شاقىرىلدى.
سونىمەن الىستاعى پورتۋگاليادا وزگە دە ارىپتەستەرىمەن مويىنقۇمدىقتار ءبىر ايداي بولدى, ونىڭ ىشىندە باس قالاسى ليسسابون مەن مادەيرا ارالى بار, 12 كونتسەرت قويىپ, ايدى اسپانعا ءبىر-اق شىعاردى. قىزۋ قاندى پورتۋگالدىقتار كوك جۇزىندە قالىقتاي ۇشقان وزدەرىنە تاڭسىق وزگەشە سيپاتتاعى تاماشا قازاق ءان-اۋەندەرىن تاپجىلماي وتىرىپ تىڭدادى, مىڭ بۇرالعان ءبيشى قىزداردىڭ كوزدى تارتىپ, كوڭىلدى كورىكتەندىرگەن ونەرىنە سۇيسىنە قول سوقتى. ءيا, سوندا زيناكۇل قايماقوۆا, رىسقۇلبەك ەسبەرگەنوۆ, ەلميرا مۇقاشەۆا, تۇرسىن مەيىرقۇلوۆ, مۇقان سارتوۆ, تورەحان نۇرمانباەۆ, عالىم سەيىلحانوۆ, قىرعىز زايىرقۇلوۆ, تۇرار بەردىقوجاەۆ, ساتىلعان تۇيەباەۆ, ايسۇلۋ رسالديەۆا جانە ت.ب. مويىنقۇمدىقتاردىڭ ونەرىنە شەتەلدىكتەر ىستىق ىقىلاسىن تانىتقانى انىق.
بۇل ساپارعا ءانسامبلدى وبكوم حاتشىسى ع.بيباتىروۆا مەن اۋپارتكوم حاتشىسى ج.ورىنباەۆ باستاپ بارىپ ەدى. ەندى «پراۆدا» گازەتى «براۆو, مويىنكۋم!» اتتى ماقالا شىعاردى.
مىنا سۋرەتتە سول پورتۋگاليا ساپارىنان ءبىر كورىنىس بەينەلەنگەن. انسامبل مۇشەلەرىنىڭ ءبىرازى عيماراتقا ىلىنگەن وزدەرىنىڭ افيشاسىنىڭ جانىندا تۇر. سول جاق شەتتەگى مۇعالىم, مىقتى دومبىراشى اباشحان كولباەۆ, ال وڭ جاقتان ءبىرىنشى تۇرعان كوپتەگەن ادەمى ءاننىڭ اۆتورى, قازاقستان كومپوزيتورلار وداعىنىڭ مۇشەسى, بۇگىندە 76 جاستاعى سادىق قۇنانباەۆ. شىنىمىزدى ايتساق, ورتاداعى تورتەۋدى انىقتاۋعا مۇمكىندىك بولمادى...
ايتقانداي,1980 جىلى ماسكەۋ وليمپياداسى بولىپ ەدى عوي. افيشادان ونىڭ سيمۆولى – ايۋدىڭ قونجىعى ميشكانىڭ دا بەينەسىمەن مۇندالايدى.