دۇنيەجۇزىلىك دەنساۋلىق ساقتاۋ ۇيىمى قازاقستان عالىمدارى ازىرلەگەن كوروناۆيرۋسقا قارسى QazCovid-in (QazVac) ۆاكتسيناسىن قاشان تىركەۋى مۇمكىن؟ بۇل ساۋالعا بيولوگيالىق قاۋىپسىزدىك ماسەلەلەرى جونىندەگى عىلىم-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا جاۋاپ بەردى, دەپ حابارلايدى Egemen.kz.
«دۇنيەجۇزىلىك دەنساۋلىق ساقتاۋ ۇيىمىنا ءوتىنىم بەرىپ قويدىق. پروتسەدۋرا كۇردەلى ءارى ۇزاققا سوزىلادى, قۇجاتتاردى دايىن بولۋىنا قاراي ۇسىنامىز. بۇگىندە بۇل ماسەلەگە وراي ەلىمىزدىڭ سىرتقى ىستەر مينيسترلىگى ۇلكەن كومەك كورسەتىپ جاتىر. سونىمەن قاتار دەنساۋلىق ساقتاۋ مينيسترلىگىنەن دە كەڭەس الىپ وتىرمىز», دەدى ول قازاقپارات تىلشىسىنە بەرگەن سۇحباتىندا.
ونىڭ ايتۋىنشا, قازاقستانداعى اقش ەلشىلىگى قازاقستاندىق تاراپقا كونسۋلتانتىنىڭ قىزمەتىن ۇسىنعان.
«ول بىزگە ۆاكتسينامىزدى تىركەۋ ماسەلەسى بويىنشا كەڭەس بەرەدى. ياعني, بۇل ماسەلەدە بىرنەشە تاراپ, اتاپ ايتقاندا سىرتقى ىستەر مينيسترلىگى, دەنساۋلىق ساقتاۋ مينيسترلىگى, قازاقستانداعى اقش ەلشىلىگى جانە ءبىزدىڭ ينستيتۋت تىعىز جۇمىس ىستەپ جاتىر», دەدى ينستيتۋت باسشىسى.
سونىمەن قاتار ول قازاقستان ۆاكتسيناسىن تىركەۋ پروتسەدۋراسى قانشا ۋاقىتقا سوزىلۋى مۇمكىن ەكەندىگىن دە ايتتى.
«تىركەۋ ماسەلەسىندە ۋاقىت شەكتەۋى جوق. مۇنىڭ بارلىعى قۇجاتتارىمىزدىڭ ساپاسىنا بايلانىستى. ەگەر ولاردىڭ كوڭىلىنەن شىقسا, تالاپتارى مەن نورمالارىنا ساي كەلسە, وندا ماسەلە تەزىرەك شەشىلەدى», دەدى كۇنسۇلا زاكاريا.