بۇۇ-نىڭ جاڭالىقتار ورتالىعىنىڭ حابارلاۋىنشا, قازىرگە دەيىن شىعارىلعان ۆاكتسينالار ءادىل تۇردە بولىنگەندە الەمدەگى مەديتسينا قىزمەتكەرلەرى مەن قارت كىسىلەردىڭ بارىنە جەتەتىن ەدى.
دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى دوكتور تەدروس گەبرەيەسۋس 2021 جىلعى بەس ايدا كوروناۆيرۋس جۇقتىرۋ جانە ءولىم جاعدايلارى 2020 جىلعا قاراعاندا كوبىرەك تىركەلگەنىن مالىمدەدى. .
ونىڭ سوزىنە سەنسەك, ۆيرۋستىڭ تارالۋىن ءار ەل باقىلاۋعا المايىنشا, پاندەميا اياقتالمايدى. ال قازىر كەز كەلگەن مەملەكەت حالقىن ەكپەمەن جاپپاي قامتاماسىز ەتسە دە, كوروناۆيرۋستى جەڭدىك دەپ ايتۋىنا ءالى ەرتە.
«قازىرگى ۆاكتسينالاۋ سالاسىنداعى داعدارىس پاندەميانى ۇزارتىپ, تەڭسىزدىكتى ايقىن كورسەتەدى. مىسالى, سالىنعان بۇكىل ەكپەنىڭ 75 پايىزى – 10 ەلگە تيەسىلى.
بۇل يدەيانى ەشقانداي ديپلوماتيالىق فورمادا ۇستاۋ مۇمكىن ەمەس. ۆاكتسينالاردىڭ كوپ بولىگىن وندىرەتىن جانە ساتىپ الاتىن ەلدەردىڭ شاعىن توبى الەمنىڭ قالعان بولىگىندەگى جاعدايدى باقىلايدى», دەدى ددۇ باسشىسى.
تەدروس گەبرەيەسۋستىڭ كەلتىرگەن مالىمەتىنە ساي, وسى كۇنگە دەيىن جاسالعان ەكپەلەردىڭ دوزالارى نەعۇرلىم ءادىل بولىنگەن جاعدايدا الەمدەگى بارلىق مەديتسينا قىزمەتكەرى مەن ەگدە جاستاعى ادامدارعا جەتەتىن ەدى. سونداي-اق ول بۇگىنگى تاڭدا COVAX باستاماسى اياسىندا 125 ەلگە 72 ميلليون ۆاكتسينا دوزاسىن جەتكىزۋگە بولاتىنىن ەسكە سالدى. ددۇ باسشىسى دامىعان ەلدەردى پرەپاراتتاردى كەدەي مەملەكەتتەرمەن, سونىڭ ىشىندە COVAX ارقىلى بولىسۋگە شاقىردى. بۇعان قوسا, دۇنيەجۇزىلىك دەنساۋلىق ساقتاۋ ۇيىمىنىڭ حالىقارالىق قوعامداستىقتىڭ الدىنا قويعان ماقساتتارى تۋرالى ايتتى. بيىلعى قىركۇيەككە دەيىن ءار ەل حالقىنىڭ كەمىندە 10 پايىزىن جانە جىلدىڭ سوڭىنا قاراي 30 پايىزىن ۆاكتسينالاۋى ءتيىس.
«بۇل ءولىم جاعدايلارى مەن اۋرۋدىڭ اۋىر ءتۇرىنىڭ الدىن الادى, مەديتسينا قىزمەتكەرلەرىن قورعايدى جانە ەكونوميكا مەن قوعامدىق ءومىردى قايتا قالپىنا كەلتىرەدى», دەدى تەدروس گەبرەيەسۋس.