وقۋ جىلىن اياقتاعان وقۋشىلاردىڭ ءبارى دە جاز مەزگىلىن ويداعىداي وتكىزگىسى كەلەدى. بۇگىندە ولاردىڭ جازعى ماۋسىمىن ءتيىمدى وتكىزۋ ماقساتىندا جامبىل وبلىستىق ءبىلىم باسقارماسى ءتيىستى جۇمىستار جۇرگىزۋدە. بۇل رەتتە ورىن الىپ وتىرعان احۋالعا بايلانىستى سانيتارلىق تالاپتار مەيلىنشە ساقتالاتىن بولادى.
بيىلعى جازعى دەمالىس ماۋسىمىندا وڭىردەگى 1 جانە 10-سىنىپ اراسىنداعى 223 432 وقۋشىنى تولىق ساۋىقتىرۋمەن قامتۋ جوسپارلانىپ وتىر. ونىڭ 70,3 پايىزى جازعى ساۋىقتىرۋ جانە دەمالىس شارالارىمەن, ال 30,7 پايىزى ەڭبەكپەن جانە دەمالىس شارالارىمەن قامتىلادى دەپ جوسپارلانعان.
«وسى ماقساتتا كوپبالالى, سونداي-اق از قامتىلعان وتباسى بالالارىنىڭ جازعى ساۋىقتىرۋ دەمالىسىنا جەرگىلىكتى بيۋدجەتتەن 555 ملن 877 مىڭ تەڭگە قاراستىرىلعان. وبلىس بويىنشا قالا سىرتىنداعى 11 ساۋىقتىرۋ لاگەرى جۇمىس ىستەيدى دەپ جوسپارلانۋدا. قازىرگى ۋاقىتتا قالا سىرتىنداعى ساۋىقتىرۋ لاگەرلەرىندە بالالاردى دەمالىسپەن قامتۋ ماقساتىنداعى كونكۋرس جاريالاندى. سونىمەن قاتار جاز ۋاقىتىندا سانيتارلىق-ەپيدەميالىق تالاپتاردى ساقتاي وتىرىپ, تۋريستىك ساياحاتتار مەن ەكسكۋرسيالاردى جانە سپورتتىق جيىنداردى ۇيىمداستىرۋ جوسپارلانۋدا. وعان شامامەن 22 مىڭعا جۋىق وقۋشىنى قامتۋ بويىنشا جۇمىستار جۇرگىزىلۋدە», دەيدى وبلىستىق ءبىلىم باسقارماسىنىڭ باسشىسى گۇلنار حودجابەرگەنوۆا.
سونداي-اق بۇگىندە وبلىستاعى مەكتەپتەر مەن مەكتەپتەن تىس ءبىلىم مەكەمەلەرىندەگى ءتىل ۇيرەنۋ, ونەر جانە تەحنيكا باعىتتارى بويىنشا ۇيىرمەلەرىنە 6 مىڭعا جۋىق بالالاردى تارتۋ كوزدەلگەن.
ال جەرگىلىكتى اكىمدىكتەر مەن ءتيىستى مەكەمەلەرگە قاراستى اۋلا كلۋبتارىندا 31 مىڭنان استام بالانى قىزىعۋشىلىقتارى بويىنشا قامتۋ جوسپارلانعان. باسقارما باسشىسى جەتىم جانە اتا-انالارىنىڭ قامقورلىعىنسىز قالعان, سونداي-اق قامقورلىققا الىنعان جانە پاتروناتتاعى 1 012 بالانى, 41 289 از قامتىلعان وتباسىلاردىڭ بالالارىن, مۇمكىندىگى شەكتەۋلى 915 بالانى, دياگنوزدارىنا بايلانىستى جانە دەۆيانتتى مىنەز-ق ۇلىقتى 1 136 بالانى جەرگىلىكتى احۋالعا بايلانىستى جازعى دەمالىسپەن قامتۋ جوسپارلانىپ وتىرعانىن دا جەتكىزدى.
«بۇگىندە جالپى ءبىلىم بەرەتىن مەكتەپتەر «جازعى دەمالىس كەزىندە ساۋىقتىرۋدى, دەمالىستى جانە جۇمىسپەن قامتۋدى ۇيىمداستىرۋدىڭ وزەكتى ماسەلەلەرى» تاقىرىبىندا اعىمداعى جىلعى 16 ءساۋىر كۇنى وتكەن رەسپۋبليكالىق كەڭەستىڭ ۇسىنىمدارى بويىنشا جۇمىستار جۇرگىزۋدە», دەيدى ول.