ەلىمىزدەگى يرريگاتسيالىق ينفراقۇرىلىمنىڭ جاعدايى سىن كوتەرمەيدى – ءالي بەكتاەۆ

اگروونەركاسىپتىك كەشەندى دامىتۋعا ەلىمىزدىڭ باسشىلىعى تاراپىنان باسا نازار اۋدارىلىپ وتىر. پرەزيدەنت قاسىم-جومارت توقاەۆ ءوزىنىڭ جولداۋىندا اۋىل شارۋاشىلىعىن دامىماسا باسەكەگە قابىلەتتى ەكونوميكا قالىپتاستىرۋ مۇمكىن ەمەس ەكەنىن اتاپ وتكەن بولاتىن. وسىعان بايلانىستى ول ەلدى ازىق-ت ۇلىك تاۋارلارىمەن قامتاماسىز ەتۋ, اۋىل تۇرعىندارىنىڭ تابىسىن ارتتىرۋ جانە ەڭبەك ونىمدىلىگىن ارتتىرۋ جونىندە بىرقاتار مىندەتتەردى العا قويدى.

ساراپشىلار سۋارمالى جەرلەردىڭ كولەمىن ۇلعايتۋ جانە ولاردى ۇتىمدى پايدالانۋ العا قويىلعان مىندەتتەردى ورىنداۋدىڭ نەگىزگى كەپىلى دەپ سانايدى. سەنات دەپۋتاتتارى ماسەلەنى ەگجەي-تەگجەيلى زەردەلەۋ جانە وسى سالانىڭ جاعدايىن جاقسارتۋ جونىندە ءىس جۇزىندەگى ۇسىنىمدار ازىرلەۋ ءۇشىن سالالىق كوميتەتتىڭ كوشپەلى وتىرىسىن وتكىزدى. ءتيىستى مينيسترلىكتەر مەن ايماقتىڭ باسشىلىعى, اگرارشىلار, عالىمدار مەن كاسىپكەرلەر وفلاين جانە ونلاين تارتىبىندەگى وسى سىندارلى اڭگىمەگە قاتىستى.

سەنات كوميتەتىنىڭ توراعاسى ءالي بەكتاەۆ وتىرىستى اشا كەلىپ, ەلىمىزدەگى سۋارمالى جەرلەردىڭ كولەمى جالپى يگەرىلگەن جەردىڭ كولەمىنىڭ 8%-ىنان اسپايتىنىن, ال بۇل جەردە اۋىل شارۋاشىلىعىنا ءتيىستى بارلىق جالپى ءونىمىنىڭ 35% وندىرىلەتىنىن اتاپ ءوتتى. دەگەنمەن, سۋارمالى ەگىنشىلىكتىڭ ودان ءارى ۇلعايۋىنا بىرقاتار پروبلەما كەدەرگى كەلتىرۋدە.

«ەلىمىزدەگى يرريگاتسيالىق ينفراقۇرىلىمنىڭ جاعدايى سىن كوتەرمەيدى. رەسپۋبليكالىق مەنشىكتەگى 19 772 شاقىرىم كانالدىڭ 11 881 شاقىرىمىنىڭ جاعدايى قاناعاتتانعىسىز. شارۋاشىلىقارالىق جانە شارۋاشىلىقىشىلىك ارنالاردىڭ 90%-ى ەسكىرگەن, تەحنيكالىق دەڭگەيى تومەن. وسىعان بايلانىستى ەلىمىزدە يرريگاتسيالىق جۇيەلەردى قالپىنا كەلتىرۋ جونىندە اۋقىمدى جۇمىستار جۇرگىزۋ قاجەت»,  دەپ اتاپ ءوتتى سەناتور.

كوشپەلى وتىرىستى وتكىزۋ ورنى كەزدەيسوق تاڭدالعان جوق. ەلىمىزدىڭ بارلىق سۋارمالى جەرلەرىنىڭ 30%-ى تۇركىستان وبلىسىندا شوعىرلانعان. كەزدەسۋدە ءوڭىر باسشىسى ومىرزاق شوكەەۆ تە وسى كورسەتكىشتى ودان ءارى ارتتىرۋ تۋرالى ءوز ويىمەن ءبولىستى.

«تۇركىستان وبلىسىندا سۋ قويمالارى مەن ماگيسترالدىق كانالداردا جوندەۋ جۇمىستارى قارقىندى ءجۇرىپ جاتىر. «كەڭساي-قوسقورعان 2» سۋ قويماسىنىڭ قۇرىلىسى اياقتالىپ كەلەدى. «تۇركىستان» ماگيسترالدى كانالىنىڭ 59 كم كۇردەلى جوندەۋدەن ءوتتى, جالپى ۇزىندىعى 751 كم 161 كانال جاسالدى. ورداباسى, وتىرار, بايدىبەك, ساۋران اۋداندارىندا, سونداي-اق ارىس جانە كەنتاۋ قالالارىندا جۇرگىزىلگەن جۇمىستار سۋارمالى جەرلەردى سۋمەن قامتاماسىز ەتۋگە مۇمكىندىك بەرىپ وتىر»,  دەپ اتاپ ءوتتى تۇركىستان وبلىسىنىڭ اكىمى.

قازاقستان رەسپۋبليكاسىنىڭ اۋىل شارۋاشىلىعى ءمينيسترىنىڭ ورىنباسارى رۋسلان ماناتاەۆ بۇكىل ەلىمىز اۋقىمىنداعى سۋارمالى جەرلەردى دامىتۋدىڭ كەلەشەگى تۋرالى تاقىرىپتى جالعاستىردى. ساراپشىلار كەزدەسۋ بارىسىندا بۇل ماسەلەلەردى كەشەندى شەشۋ جانە ءتۇرلى مەكەمەلەردى تارتۋ قاجەت ەكەنىن اتاپ ءوتتى. سوندىقتان ەكولوگيا, گەولوگيا جانە تابيعي رەسۋرستار ءمينيسترىنىڭ ورىنباسارى سەرىك قوجانيازوۆ قازاقستاننىڭ سۋ قورىن پايدالانۋ جانە قورعاۋ ماسەلەلەرى تۋرالى ايتىپ بەردى.

تالقىلاۋ بارىسىندا وتىرىسقا قاتىسۋشىلارى كوپتەگەن وزەكتى ماسەلەلەردى كوتەردى, ولارعا قۇزىرەتتى مەملەكەتتىك ورگانداردىڭ باسشىلارى جاۋابىن ايتىپ, جان-جاقتى تۇسىندىرمە بەردى.

سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ مۇشەلەرى وڭىرگە ساپارى بارىسىندا تۇركىستان ماگيسترالدى كانالىن جوندەۋ جۇمىستارىنىڭ بارىسىمەن, «كەڭساي-قوسقورعان 2»  سۋ قويماسىنىڭ قۇرىلىسىمەن تانىستى, سونداي-اق سۋ ۇنەمدەۋ تەحنولوگيالارى پايدالانىلاتىن «تۇركىستان-اگرو» جشس-ءتىڭ ەگىس القابىندا بولدى.

سەناتورلار كوشپەلى وتىرىس بارىسىندا كوتەرىلگەن بارلىق ماسەلەلەردى مۇقيات زەردەلەپ, ءتيىستى دەپۋتاتتىق ساۋالداردى جولداۋعا جانە زاڭ شىعارۋ قىزمەتىندە پايدالاناتىن بولادى.