اتىراۋ قالاسىندا بالالاردى ورتتەن قۇتقارعان ەكى كىشى سەرجانتتىڭ ءبىرى – ۇلتتىق ۇلاندا, ال, ەكىنشىسى پوليتسيا قىزمەتكەرى بولىپ جۇمىس ىستەيدى, دەپ حابارلايدى Egemen.kz.
كەشە, 19 مامىردا ساعات 8:30 شاماسىندا اتىراۋ قالاسىنىڭ «بالىقشى» شاعىن اۋدانىنداعى تۇرعىن ءۇيدىڭ كىرەبەرىسىندەگى ەلەكتر جەلىسى ورتەنگەن. ءورتتى الدىمەن №5546 اسكەري ءبولىمىنىڭ كىشى سەرجانتى شالقار سابىرعاليەۆ بايقاعان. ونىمەن بىرگە پوليتسيانىڭ كىشى سەرجانتى سالاۋات قاراباەۆ تا ورتەنگەن ءۇيدىڭ تۇرعىندارىن قۇتقارۋعا ۇمتىلدى. بىراق, كىرەبەرىستى قارا ءتۇتىن تۇمشالاپ تۇرعاندىقتان ەكەۋى تەك 3-قاباتقا دەيىن كوتەرىلىپتى. تۇتىنگە تۇنشىققان ولار جوعارى قاباتقا جەتە الماي, دالاعا شىعۋعا ءماجبۇر بولعان.
سول كەزدە شالقار سابىرعاليەۆ كورشى ۇيدەگى پاتەرىنەن اسكەريلەر ءجيى قولداناتىن گازتۇتقىشتى الۋعا جۇگىرە جونەلگەن. گازتۇتقىشتى كيگەن ول 5-قاباتقا كوتەرىلىپ, پاتەردىڭ بىرىنەن بالالاردى بالكونعا الىپ شىقتى. كەيىن پاتەر يەلەرىنىڭ ءبىرى 5-قاباتتا ەكى بالاسى بار تاعى ءبىر وتباسى تۇراتىنىن ايتقان.
ەكى كىشى سەرجانت شالقار سابىرعاليەۆ پەن سالاۋات قاراباەۆ تۇتىنگە قاراماستان 5-قاباتقا كوتەرىلىپ, پاتەردەگى ءبىرى – 2 جاستاعى, ەكىنشىسى – 2 ايلىق بالانى قۇتقارعان.