اتىراۋدا 19 مامىرعا دەيىن كوروناۆيرۋس ينفەكتسياسىنا قارسى ۆاكتسينالاردىڭ ءى كومپونەنتىن سالدىرعاندار سانى 46 356 ادامعا جەتتى. ال ءىى كومپونەنتتى 15 268 ادام سالدىردى. دارىگەرلەر تۇرعىندار تاراپىنان ۆاكتسينا الۋعا بەلسەندىلىكتىڭ ءالى دە تومەن ەكەنىن ايتىپ وتىر.
دەگەنمەن وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ مالىمەتىنشە, مۇنايلى وڭىردە ۆاكتسينا دوزالارى جەتكىلىكتى دەۋگە نەگىز بار. سونىڭ ءبىر دالەلىندەي, 18 مامىردا اقتوبەدەگى فارماتسەۆتيكا حابىنان سپۋتنيك V ۆاكتسيناسىنىڭ ءىى كومپونەنتىنە ارنالعان 7 650 دوزا جەتكىزىلدى. ۆاكتسينا دوزالارىن ەگۋ بەكەتتەرىنە ءبولۋ مەن تاسىمالداۋ قولعا الىندى. قازىر وڭىردە 41 ەكپە بەكەتى جۇمىس ىستەيدى. ونىڭ ەكەۋى تەڭىز كەن ورنىندا بولسا, حقكو-دا, «تاماشا», «كوكتەم», «اتىراۋ», «بايزار», «دينا» ساۋدا ورتالىقتارىنىڭ ارقايسىسىندا ءبىر-بىردەن ەكپە بەكەتى اشىلدى. بۇدان باسقا, قالالىق, اۋداندىق ەمحانالار جانىندا 23, سونداي-اق 10 جىلجىمالى بەكەتتە تۇرعىندارعا ۆاكتسينا سالىنادى.
تۇرعىنداردىڭ ۆاكتسينا سالدىرۋعا نيەتىنىڭ تومەندىگىنەن بولار, اسىرەسە, اتىراۋ قالاسىندا قاۋىپتى ۆيرۋستى جۇقتىرۋ ازايار ەمەس. ماسەلەن, 18 مامىرداعى دەرەككە جۇگىنسەك, مۇنايلى شاھار تۇرعىندارى اراسىنان 56 ادام كوروناۆيرۋستىڭ «قاقپانىنا» ءتۇسىپ وتىر. سونداي-اق جىلىوي, قۇرمانعازى مەن ماحامبەت اۋدانىنان 8 تۇرعىن اتالعان ىندەتتى جۇقتىردى. ال جىلىوي اۋدانىنداعى تەڭىز كەنىشىندە قاۋىپتى ۆيرۋسقا ەكى جۇمىسشى عانا شالدىعىپتى. دەمەك وتكەن جىلعىداي ەمەس, مۇندا ىندەتتى جۇقتىرعاندار سانى بىرتىندەپ ازايىپ كەلەدى. بۇعان كەنىشتەگى جۇمىسشىلاردىڭ ۆاكتسينانى مەزگىلىندە سالدىرۋىنىڭ وڭ اسەرى تيگەنى داۋسىز.
وڭىردەگى اۋرۋحانالاردا 12 كومپيۋتەرلىك توموگرافيا, 4 مرت, 41 رەنتگەن, 267 وكپەنى جاساندى جەلدەتۋ اپپاراتى, 669 وتتەگى كونتسەنتراتى, 1 514 يمپۋلستىك وكسيمەترى مەن 8 وتتەگى ستانساسى بار. ءۇش كۇن بۇرىن وبلىس ورتالىعىنان شالعايداعى قۇرمانعازى اۋداندىق اۋرۋحاناسى كومپيۋتەرلىك توموگرافيامەن قامتىلدى. قۇنى 360 ملن تەڭگەلىك كومپيۋتەرلىك توموگرافيا كاسپي قۇبىر كونسورتسيۋمىنىڭ دەمەۋشىلىگىمەن ساتىپ الىنىپتى.
– جاپوندىق Hitachi كومپانياسى شىعارعان مەديتسينالىق اپپاراتتىڭ SUPRIA مودەلى ادام دەنەسىن تولىق دياگنوستيكالاۋدى قامتاماسىز ەتەتىن 128 ءبولىمدى سكانەردەن وتكىزەدى. رادياتسيالىق جۇكتەمەنى ازايتۋ ءۇشىن IntelliEC دوزاسىن ينتەللەكتۋالدى قايتا ءبولۋ الگوريتمى مەن IntelliIP يتەراتسياسىنىڭ زاماناۋي ءادىسى قولدانىلادى. بۇل ۆيزۋاليزاتسيا ساپاسىن جوعالتپاي, دوزالاردىڭ ەڭ تومەن ماندەرىمەن زەرتتەۋلەر جۇرگىزۋگە مۇمكىندىك بەرەدى, – دەيدى باسقارما باسشىسى.